9 nyied 2 hauh, daiz gihcuj ceiq doeklaeng cotsim suijli Dadwngzyaz aen gunghcwngz dingxdaeuz youq- gaenj ndaw suijvangj guekgya neix cingqsik douzcanj fatdienh, neix mai ok le aen gunghcwngz goek guh sat caez gvaq, neix beij geizhong guekgya han hawj de daezgonq le 4 ndwen.

Cotsim suijli Dadwngzyaz dwg aen hanghmoeg ndaej dang geiqhauh ndaw 172 aen gunghcwngz suijli hungnaek mbaet raemx gung raemx youz Gozvuyen doekdingh de, dwg aen gunghcwngz gaemdawz youqgaenj rangh dieg dah Cuhgyangh aen ndeu gyonj ndaej fuengzre raemxrongz、gvaq dah daehyinh、aeu raemx fatdienh、nda raemx boiq raemx、dwkraemx reihnaz daengj. Gij yauqik lai yiengh aen gunghcwngz neix yienhda lai, fuengzre raemxrongz ne, caeuq gyoengq suijgu rangh dieg dah neix lienzhab anbaiz, hawj Vuzcouh Si 50 bi bungz mbat raemxrongz hamj sienq gya nanz daengz 100 bi bungz mbat, bauj hawj Gvangjcouh Si ndaej fuengz ndei yiengh raemxrongz bi 1915, hawj ranghdieg aeu comzrengz fuengzre ndei raemxrongz laeng Cuhgyangh Sanhgozcouh de 50 bi bungz mbat raemxrongz hamq sienq gya nanz daengz 100-200 bi bungz mbat; gvaq dah daehyinh ne, hawj Dahgenzgyangh doeng gij ruz ndaej cang naek 300 dun hwnjsang daengz 3000 dun, dwk doeng hothoh youqgaenj diuz roen- raemx gim Dahcuhgyangh; fatdienh ne, cungj cang gih 160 fanh cenhvaj, suenqveh bi fatdienh 60.55 ik cenhvajsiz, baenz aen dencan daeuz laeng Gvangjsih denvangj; nda raemx boiq raemx ne, hawj gij seizgan han- wngq bouj raemx wngqgip rangh dieg dah neix youz 10 ngoenz sukdinj daengz 3 ngoenz, mizrengz bauj hawj Yez Gangj Au Davanhgih gungraemx ancienz; dwkraemx coq reihnaz ne, ndaej hawj 120 fanh moux reihnaz deng rengx、138 fanh vunz raemx mbouj gaeuq gwnyungh dieg Gvei- cungh(ranghdieg gyang Gvangjsih) de gwn raemx yungh raemx gaeuqget bae, neix cix okrengz coengh guhhoengh lajmbanj.

（Couh Yingj Cinz Yangz）