8 nyied 31 hauh 7 diemj 33 faen, Fuzhingh Hauh dungceh cuj baez lezceh G4308 diemjcung bae 350 goengleix de daj Nanzningz Dunghcan hai okbae, buet bae vaiqvet, soh bae coh Gveiyangz. Ngoenzde, Gveiyangz Bwzcan hix hai ok gauhdez lezceh bae coh Nanzningz. Neix biuhauh le daengx diuz Gvei (Gveiyangz) Nanz (Nanzningz) Gauh- dez haidoeng daehyinh lo.

Daengx diuz Gvei Nanz Gauhdez raez 482 goengleix, dwg diuz dezlu daih’it lienz Gveicouh、Gvangjsih song dieg dajsuenq diemjcung bae 350 goengleix, daengx diuz haidoeng le cix baenz diuz maeg(meg) gyaudoeng daeuz hawj song swngjgih doxbaedauq ceiq bienh ceiq vaiq. Suenq daengz neix, Gvangjsih 14 aen si laeb gih ndaej “aen’aen doeng gauhdez dungceh caez”.

Gvei Nanz Gauhdez cuen(con) gvaq dieg miz Mauznanzcuz、Yauzcuz、Buyihcuz daengj 30 lai aen minzcuz vunznoix comzyouq. Vanzgyangh dwg daengx guek aen Mauznanzcuz swciyen dog, 2020 nienz 5 nyied, Siz Ginbingz cungjsuhgi doiq Mauz- nanzcuz ndaej daengx cuz duetgungz guh’ok cijsi youqgaenj. Seizneix, Fuzhingh Hauh hai haeuj Vanzgyangh, gyoengqvunz youq gyang doengh ndaw naz guhhong de boux liux boux dem vad fwngz gingqlaex aen lezceh buet bae vaiqvet.

Dahsau Mauznanzcuz Veiz Gyanghlij maij lijyouz, baez ndaejnyi Gvei Nanz Gauhdez haidoeng, de couh caeuq baengzyoux hainduj dajsuenq“naengh gauhdez bae youz”lo,“henz loh Gvei Nanz Gauhdez miz haujlai aen gingjdenj, dou dajsuenq aen’aen cungj daengz.”

“Neix dwg diuz sienq doxgiet、diuz loh vuenyungz, cog de ndaej ok rengz hung coihaeuj dieg henzguek dieg minzcuz hwngfat ndei saed, coengh guhhoengh lajmbanj.”Hozciz Si Fazcanj Gaijgwz Veij fucujyin Vuz Lijveij lwnh dou, daengx diuz Gvei Nanz Gauhdez haidoeng, Hozciz caencingq haeuj daengz seizdaih gauhdez, si neix yaek gaemhdawz seizgei ndei miz gauhdez, gaenxmaenx nda buenz canjnieb henz roen gauhdez, haenqrengz dajcauh aen gapgyaq moq hwngfat daengxbuenz lijyouz.

“Gvei Nanz Gauhdez dwg aen bouhfaenh youqgaenj gapbaenz diuz roenloh Bauhdouz(Yinzconh) daengz Haijgouj ndaw gauhsuz dezlu vangj‘bet vang bet raeh’, caeuq gij sienq- loh gauhdez Cwngz(Cwngzduh) Gvei (Gveiyangz)、Nanz(Nanzningz) Gvangj (Gvangjcouh) daengj doxdam ndei le, couh gyoebbaenz diuz roenloh hung gauhsuz dezlu daj baih Saenamz daengz baih Vaznanz riengz dieg Bwzbuvanh bae, doiq laebcaez aen dijhi cotsim lai yiengh roenloh daehyinh、hwnqguh‘it rangh it loh’ ndei saed cix dij lailai bae.”Swcigih Cwngfuj canhsw Vangz Gen naeuz.

（Cwnz Ginz Danz Cozvwnz）