Laengcin bi 2020, youq baihsae Gvangjsih, rogsingz Bwzswz Si Denzyangz Gih Denzcouh Cin, dieg moh Vajsi Fuhyinz mbwn gvengq ndit raeuj, geij benq fwj hau lumj gangfung hau gwnzhaij nei youq gwnzmbwn fouzfed, rumzcin ci gvaqdaeuj liengzsizsiz, hawj vunz roxnyinh sangj raixcaix. Youq seiz laengcin neix, gou caeuq doengzdoih Denzyangz daeuj neix dwk moh Vajsi Fuhyinz. Aen dieg moh neix yiemzsuk、ancingh、gvangqlangh, vunzlai seizseiz daeuj neix niemhcingz mehmbwk ak Bouxcuengh Mingzdaih neix, geiqniemh youq seiq bak bi gonq de daiqbing hoenx gyoengq caeggeq Yizbwnj.

Vajsi Fuhyinz heuhguh Cwnz Vah, bi 1496 youq Cingsih giz dieg gyaeu neix doekseng. De dwg dahlwg Cwnz Cangh boux hakdoj Gviswnh Cizlizcouh (dwg seizneix Cingsih Si Giucouh Cunh) haenx. Cwnz Vah daj iq couh gvai, doegsaw youh ak, lienh goengfou, rox dawzbing, simndei haengj bang vunz. De hung le ndeiyawj daihfueng, haq hawj Cwnz Mungj boux hakdoj Denzcouh (dwg seizneix Bwzswz Si Denzyangz Gih Denzcouh Cin) guh yah. Mwh Dujswh Bouxcuengh, miz gij sibsug yaejnaek song fueng diuzgen doxboiq、fuengzhak doxaeu、Bouxcuengh lauxcong cix ndaej doxaeu. Cwnz Vah singq Cwnz, vihmaz heuh “Vajsi”? Laxlawz dwg Cwnz Vah haq Cwnz Mungj dwg suenq lauxcong, mbouj hab gij gvidingh “sam gangh haj cangz” cauzdingz, vah caeuq vaj doengz sing, yienghde couh aeu mingz dang singq heuh de“Vajsi”.

Ciuhvunz Vajsi Fuhyinz miz haujlai gojgaeq cienzgeiz. De youq Denzcouh dangcawj seizhaenx, daeglan daj iq couh baenz lwggyax, de daiq daeglan cienj hoenx Gyanghnamz, dwkhoenx gyoengq caeggeq Yizbwnj. Seizneix, doengh gij gojgaeq cienzgeiz caeuq gij saeh ak de lij youq Denzyangz cienz naeuz dem.

Ciuhvunz de ginglig fukcab mboujswnh. Bi 1527, bouxgvan de hakdoj Denzcouh Cwnz Mungj deng vunz naeuz dwg bouxbuenqluenh, deng cauzdingz dwkhoenx, Cwnz Mungj caeuq lwg de Cwnz Banghyen hoenx baih dai bae, gvaqlaeng daengz daeglan Cwnz Cih swnj dang hakdoj Denzcouh. Aenvih Cwnz Cih lij iq, guh bouxnaih Cwnz Cih, Vajsi Fuhyinz dangcawj bang dajleix gijsaeh cihcouh guenj haenx. Seiz dangcawj, Vajsi Fuhyinz gaghaed, guhsaeh naemqsim, rox guenjleix cwngvu, andingh le ndawbiengz. Doengzseiz, de cikgig fazcanj dajndaem, hwnq hagdangz, banh gyauyuz, gak fuengmienh cungj miz cingzcik, beksingq gyaez de haeuj de raixcaix. Bi 1550, Cwnz Cih deng cauzdingz ciudiuh bae Haijnanzdauj bingz gij luenh Lizcuz Gijyi, vutmingh gizhaenx. Guh boux naihmangh, Vajsi Fuhyinz caiq ciengx Cwnz Dasou、 Cwnz Daluz song boux lwg Cwnz Cih neix, laebdaeb guenjleix cwngvu ndaw couh.

Seiz Mingzcauz laeng Cinghcauz codaeuz, gueknden raeuz Yizbwnj cingq dwg seizgeiz Namzbaek Cauz, baihnamz baihbaek hoenx- ciengq luenhcabcab, haujlai bouxfanhcuj (dangq bouxcuhhouz) deng gaj, seiqlig deng ciemqlingx, doengh boux vujsw、langyinz deng boenq haeuj diegwnq bae. Doengh gij vunz neix mbouj dajndaem gvaq, mbouj rox baenzlawz lix roengzdaeuj, bouxfanhcuj gyoengqde deng gaj le, gyoengqde mbouj miz maz ndaej gwndaenj lo, couh doxcomz hwnjdaeuj dauqcawq dajgiep, bien bang ndeu caegsuenq daeuj daengz henzhaij Cungguek dajgiep ciemqdieg, daiq gij nanh daeuj hawj henzhaij guek raeuz.

Bi 1554, henzhaij Cungguek ciengzseiz deng gyoengq caeggeq Yizbwnj gwnzhaij yoekyau, gyoengqde daengz gizlawz cungj moegmyaix dued gij cienzcaiz vunz dangdieg, ciengj gij huq aenruz guh seng’eiq, coemh haujlai ranz, gijmaz yak cungj guh caez, hangz daengz gij sengmingh cienzcaiz vunz henzhaij guek raeuz caeuq gij ancienz guek raeuz lailai. Mingzcauz baij bing hoenx lai baez, cungj hoenx mbouj hingz.

Caeggeq Yizbwnj mbouj cawz, beksingq mbouj onj, guekgya mbouj onj. Cauzdingz baij binghbu sangsuh Cangh Gingh guh cungjduh dunghnanz gozvu dacinz, ciudiuh gij binglangz hakdoj Bouxcuengh Guengjsae guenj haenx caeuq gij budui siujsoq minzcuz gizyawz haenx bae daengz henzhaij doengnamz hoenx caeggeq Yizbwnj. Cangh Gingh guenj gvaq song Gvangj ginhvu, rox binglangz Guengjsae damjlaux akhoenx, couh cienzlingh ciudiuh hakdoj Denzcouh Cwnz Dasou、Cwnz Daluz lingx bing okciengq. Seizde Vajsi Fuhyinz 58 bi, de naeuz Dasou、Daluz lij iq, gyoengqde mbouj ndaej rapnaek faen gihciz neix, cam duhfuj hawj de caenndang daiqbing bae baihnaj Gyanghcez hoenx caeggeq Yizbwnj. Duhfuj rox Vajsi mbeifag、miz mingzmuengh, rox daiq- bing, goengfou ak, couh doengzeiq gij cingjgouz de, caiq souh ginhhanz “guen mehmbwk canhcieng cungjbingh”. Seiz yaek okbing, Vajsi caeuq cauzdingz gangj gawq vahmieng “baez neix bae, mbouj caeuq caeggeq Yizbwnj caez lix” ndeu, biujmingz le de naemqsim yaek caeuq caeggeq Yizbwnj hoenx daengz daej.