Daengngoenz veq baihsae, nditndat doiq lo, Vangz canghyw heuh gou daiq de bae Mbanj- datsangj yawj aen ranzgaeuq Leiz Yinh sienseng, hawj gou caiq baez dauq cunz dieggaeuq, gizde geij bi gonq gou ndaej bae lai lo.

Vangz canghyw daj diegwnq daeuj vei- swnghyen ndawhaw dou guh canghyw, de gag hag Sawcuengh, caeuq gou boux haengj raiz faenzcieng Sawcuengh neix maqhuz ndei. De yawj gvaq bien faenzcieng《Ranzgaeuq Leizyinh》gou le cij rox baih dou seiz Minzgoz conienz ok boux hakhung mizmingz ndeu, caemhcaiq aen ranzgaeuq de seizneix lij baujlouz ndaej caezcaez cingjcingj.

Aen ci menhmenh hai haeuj Mbanjdatsangj, gwnz lanzgiuzcangz, sai mbwk laux coz nyaengqyiyi comz haeux baenz doi baenz doi, bouxboux laengbuh dumzhanh liux. Mbangj vunz gaenq yungh baengzgeu cw hwnjdaeuj aeu gyaeujcien dimz seiq gok. Vunz lajmbanj dakhaeux cungj dwg yienghneix, caengz gaeuq sauj doengxhaemh cungj mbouj yungh sou bae ranz ce, caenh youq giz diegdak comz doi cw baengzgeu roxnaeuz ceijyouz re fwn re raiz couh ndaej, mbouj yungh hen, hix mbouj miz vunz caeg, ngoenzlaeng laebdaeb hai okdaeuj dak. Gyoengqvunz cungj mbouj yawj coh baih dou daeuj, aiq dwg raen ci haeuj mbanj gvenq le roxnyinh mbouj citgeiz.

“Aen mbanj guh ndaej giuzcangz neix caen ndei dakhaeux ho.” Vangz canghyw haenh naeuz.

“W, ndei dakhaeux.” Gou swt coenz ndeu gudndwt, ndawsim gag doeng ngeix sae siengj, fubfab mbouj dingz.

Dou dingz ci youq aen “doengzsim gvangj- cangz” najbakdou ranzgaeuq Leiz Yinh. Gizneix dieg loq gvangq, guh miz daengqrin daizrin caeuq gij sezsih bouxlaux lienhndang, ndaem miz baenz coij faex baenz rangh va nywj, dwg giz ndei guhcaemz ndawmbanj. Gou roengzci daeuj, din caij gij cienndaek camh ndaej bingzbingz cingjcingj gwnznamh, najda fouzyienh ok gij cingzgingj gaxgonq：Lodaeuh、rienghmou fwz aen vang aen raeh doxgaz luenhlablab, geij boux gunghcoz duiyenz caeuq cunhveij ganbu aemraemh siencienz gij cwngcwz “sam cing sam cek”, gyoengq vunzmbanj bouxboux dan goq bonjfaenh, mbouj goq daengxcungq, nyaemh gangj mbouj haeujrwz, caenh naeuz aen neix mbouj hawj cek, aen haenx mbouj ndaej beuj, fanj dai fanj lix. “Mboujguenj deng mbouj deng, ceng naj hoengz naj aeuj, naeuz aeu dieg okdaeuj, bwn’gyaeuj deu ndaej sae.”

Gou doiq Vangz canghyw naeuz：“Vunz mbanj neix hah dieg youqgaenj, aeu dieg guh hanghmoeg daengxcungq capheiq lailai.”

“Haujlai mbanj cungj yienghneix, mwngz dwgrengz vih de ndei, de cix mbouj rox mwngz ndei.” Vangz canghyw naeuz.

Dou byaij haeuj aen ranzgaeuq Leiz Yinh hwnqguh mauhgvaq 200 bi nanz haenx bae, fadou facueng, saeufaex doenrin, gyaeujliengz lajroq, cungj caengz deng vaih, lij raen gaek lungz gaek fungh deu roeg deu va caencaen yienhyienh.

“Ndwenloeg caez haengjheiq, haeuxmoq ndaej cawj ngaiz, cam sou song mbauqgvai, nyaenx gvaiz daj lawz daeuj?” Sawqmwh miz vunz guh hot fwen ndeu, sing loq sugrwz, lumj dwg dongx dou. Gou coh singfwen yawj bae. O, dwg Auswnh, de fwngz ndeu gaem gaiq sauqbaetem fwngz ndeu gaem aen gei’nyapnyaj, gwnzndang geu buhhoengz baihlaeng yaenq geij cihsaw “cenghseuq lajmbanj” haenx gaenq doiqsaek yaek bienq hau lo.

“Auswnh,” Gou naeuz, “Dou daj Nazheuj daeuj ha, mwngz lumz gou lo?”

“O! Laxlawz dwg laux cujyin ha!” Auswnh yawjraen dwg gou, song da fwt rongh, guhmuengz cuengqcak sauqbaet caeuq gei’nyapnyaj, gaem gvaq fwngz daeuj ndaetndwtndwt, doq riu doq eu naeuz：“Duenhnanz mbouj raen naj, go’gyaj dok baenz congz (caz), vunzgeq cix gwq ngonz, damong nyinh mbouj ok.”

Bi haenx, ranzgaeuq Leiz Yinh ndaej Namzningz Si Cwngfuj dawz daeuj guh vwnzvuz baujhoh danvih, gingciengz miz vunz daeuj guhhong genjcaz cijdauj. Baezbaez miz vunz daeuj, cin cwngfuj cungj daezgonq dunghcih hawj cunhveij dou bae baet seuq. Ndaw cunhveij hong lai gvaq maetma, lij ciengzseiz deng daeuj guh gij hongcab neix, bouxboux mbwq raixcaix. Doeklaeng bungz daengz baihgwnz roengzdaeuj guh banggungz, dou couh anbaiz Auswnh boux duisieng banggungz haenx haeuj aen ganghvei goeng’iksingq, hawj de cienmonz fucwz baetsauq aen ranzgaeuq neix, ndwenndwen miz ngaenz boujdiep souhaeuj. Yienghneix it daeuj ndaej coengh de duetgungz, ngeih daeuj ndaej gaijgez aen vwndiz baujgez ranzgaeuq Leiz Yinh.

Vangz canghyw baenz fungh baenz fungh bae sijsaeq ngonzyawj aen ranzgaeuq, gou cix naengh roengzdaeuj nem Auswnh gangjgoj.

“Seizneix mbangj cunhveij, mbouj beij doenghbaez sou, caih vunz gangj vunz naeuz, gik okdou roengzmbanj.” Auswnh lij lumj doenghbaez nei maij aeu fwen guh coenz, de doiq aen banhswj cunhveij seizneix mbouj rimhoz geijlai.

Gou daengh de eu naeuz：“Auswnh ha Auswnh, hixnaengz lwnh naeuz mwngz, bouxvunz song cik fwngz, goq gwnz mbouj ndaej laj. Baenq hwnj youh baenq roengz, ngoenz nyaengq dangq daemjrok, baihlaj fagcim dog, baihgwnz baenz bog mae.”

“Ngoenzngoenz gongz hong gaenj, dauqdaej nyaengq gijmaz? Dou ndi raemx ndaemnaz, mbouj raen caz saek gawq(coenz).”

“Ngoenzngoenz dangq baenqcuenh, yiengh- yiengh guenj dohcaez, guh dai guh mbouj ndei, ciengzseiz deng lauqgvaq.”

……

Gou caeuq Auswnh fwen bae fwen dauq cingq hwnjyinx, Vangz canghyw youq ndaw ranzgaeuq lauh ngonz hop ndeu le, couh heuh ok rog bakdou daeuj ingj aen siengq louzniemh. Auswnh biek dou baenqndang byaij bae ranz de.

“Yu, nyaenx haemh lij miz vunz daeuj? Daj lengqlawz daeuj ha?” Auswnh caengz bae gyae, miz vunz doq byaij daeuj doq cam Auswnh, gou nyeux gyaeuj yawj gvaqbae, fwt roxnyinh dungxfan hwnjdaeuj. Dwg goeng najfonx daengxmbanj ceiq rwix haenx, seizcoz de haengj bae faengzgaeq, vunz an vamingz hawj de guh “Maraegeq”.

“Laux cujyin daiq baengzyoux de daeuj guhcaemz.” Auswnh lwnh “Maraegeq” nyi.

Seizneix, “Maraegeq” yawj gvaq baih dou daeuj, dingjlingz caeuq song da gou doxbungz, cij raen de sikhaek veqnaj byaij deuz.

Gou rox, “Maraegeq” dwg mbouj siengj raen gou, “Gaxgonq doxceng gvaq, mbouj miz naj doxraen, bouxboux cungj hozhaemz, caengz dangq caengz gong haex.”

Daengngoenz roengzcongh lo, dienheiq lij oem dwk sawj vunz hojsouh, dou hwnjci hai ci dauqma, gven cuengci ndaetndwt hai gunghdiuz cij roxnyinh lai ndeiyouq di.

Vangz canghyw doq haici doq cam：“Haxbaenh goenglaux haenx vihmaz yaek byaij gvaqdaeuj youh mbouj daeuj?”

“O, mwngz naeuz ndaek haenx ha.” Gou gej naeuz, “Vunz heuh de guh ‘Maraegeq’, de raen gou youq couh mbouj gvaqdaeuj lo. Doenghbaez guekgya cwng’aeu mbangj nazreih gya’gvangq goengloh, miz bep diegfwz ndeu gyawj reih de deng cwng’aeu, de naeuz dwg dieg de, yaek baqciemq aeu gij ngaenz guekgya boizbouj hawj cizdij haenx, hoeng ndawmbanj mbouj haengj, cengceng cauqcauq, gauq bae cunhveij gauq bae swhfaz bumwnz geijlai baez, gou mbouj haeuj de, ndigah de haemz gou yaek dai bae……”

“Gvaiq mbouj ndaej de baez raen mwngz couh baenq deuz. Yawj daeuj cunhganbu caemh mbouj heih guh vw.”

“Couh dwg lo, cunhganbu ndaej ngaenz noix mbouj gangj, lij deng bwh song aen dungx dem, aen ndeu coq ngaiz, aen ndeu coq heiq.”

“O, mwngz mbouj nyienh laebdaeb guh cujyin couh vih gijneix?”

“Neix mbouj dwg cujyau, cujyau dwg hong daiq lai, gijmaz duetgungz gunggeng、dihbauj riengzlaeng diucaz、saenqhwng lajmbanj、fugsaeh nungzlinz、fugsaeh sevei ciengxlaux baujyenj、fugsaeh veiswngh caeuq giva senglwg、diuzgaij doxceng daengjdaengj, yienghyiengh deng gvaq- fwngz, gij seizgan gou deng doenghgij saeh fanzcab neix ciemq liux lo, siengj yaek lai yawj di saw raiz di faenzcieng cungj mbouj ndaej.”

“Gou rox lo, raiz faenzcieng Sawcuengh cij dwg gij cingqnieb mwngz, vihliux gijneix, mwngz ningznyienh mbouj guh cujyin?”

“Dwg ha, cingq ngamj bungz daengz cunh songveij vuenhgaiq senjgij, gou couh doi mbouj camgya gingqsenj, nyiengh hawj bouxcoz bae guh. Sawj ngoenzlaeng gvaq ndaej lai soengset miz seizgan yawj saw hagsib, maqmuengh raiz ndaej di faenzcieng haemq ndei daeuj.”

Dou doq gangjgoj doq haici dauqma, mwh mbwnfuemz ra laep, ci hai gvaq najbakdou cunhveij, ndawding banhsaeh cunhveij daeng lij ronghsag. Gou daj cuengci goemzgyaeuj ndomq haeuj cunhveij bae, fuk geizman ndingfwg “aen banhswj guhhong maenh’ak” gaxgonq baihgwnz fat hawj dou haenx lij hoij youq bangxciengz, geij boux ganbu coz hix lumj gaxgonq dou ityiengh gyaban gyadiemj ngaemgyaeuj nyaengq guh daizciengq.

Maqmuengh ban bouxcoz neix guh ndaej beij dou engq ndei, cauhfuk hawj vunzlai.