Ciuq bouxdangrap Swcigih Gohgidingh lwnh gou, daj bineix doxdaeuj, gih raeuz 4000 lai boux ndaej daegdaengq baij bae guh hongsaeh gohgi de lienzdaemh haeuj lajmbanj roengz reih roengz naz bae fugsaeh vunzlai guh hongsaeh gohgi. 1 daengz 6 nyied, daengx gih doengh boux ndaej daegdaengq baij bae guh hongsaeh gohgi de gyonjsuenq miz 8.13 fanh ngoenzbaez saeddieg guh hong fugsaeh gohgi, sonlienh 25.64 fanh vunzbaez hagrox gohgi, fugsaeh 9331 aen cunh(segih)、19274 aen dieggoek(giz). Guh hongsaeh fugsaeh gohgi nangqdaengz gij canjnieb nungzyez daeuz daengx gih daegbied dwg gij canjnieb laiak miz daegsaek caeuq gij canjnieb guhdaeuz “5+2” laeng yienh duetgungz.

Ndaejnyi vunz lwnh, doengh boux ndaej daegdaengq baij bae guh hongsaeh gohgi yawj nungzminz siengj guh maz caeuq caengzdaej lajmbanj yaek gaijgez maz vwndiz cix bae guh hongsaeh, vih nungzminz caeuq giyez guh yiengh fugsaeh cinjdeng lumj“dinghdan”baenzde. Caemhseiz, yungh ndei aen bingzdaiz fwj fugsaeh gohgi lajmbanj laeng Gvangjsih, doiq seiz bae fat gij siusik gunghawj baudaengz binjcungj maenhndei、gisuz dajndaem dajciengx ndei、gisuz gyagoeng doxgaiq nungzyez daengj, vih nungzminz caeuq giyez guh yiengh fugsaeh lumj “danbyaek” baenzde.

（Lij Sinhyungz）