Sinhvazse Baekging 8 nyied 28 hauh dienh Aen baugau gvendaengz hongsaeh bauj ndei guekgya haeuxgwn ancienz duh Gozvuyen 28 hauh daezcingj Gaiq Cibseiq Daengx Guek Yinzda Cangzveijvei Baez Hoih Daihhaj saemjlwnh. Aen baugau neix daezok, yaek daj 8 fuengmienh bauj hawj guekgya haeuxgwn ancienz, baudaengz gyaak bonjsaeh caeuq laeb ndei aen dijhi bauj hawj haeuxgwn ancienz、hai rengz hung bae aeu reihnaz cwk haeux、gaenxmaenx doihaeuj baengh gohgi dem haeux、lai roengzrengz bae haeujcoengh baujhoh nungzyez、cietsaed gyaak bonjsaeh diuzgung haeuxgwn、gyavaiq cauhlaeb aen dijhi canjnieb haeuxgwn caeuq aen dijhi riuzdoeng haeuxgwn ciuhneix、mbouj dingzduenh bae gyaak bonjsaeh gunghawj gijgwn laiyiengh、haeujlaeg bae mbaetyungh caeuq gemjsied haeuxgwn daengj.

Aen baugau neix vixok, geij bi neix doxdaeuj, guek raeuz swnghcanj haeuxgwn fatmaj onjdangq, hawciengz gunghawj gaeuqget、yinhhengz cungjdaej bingzonj, gij bonjsaeh fuengzre vaqgej fungyiemj diuhcan hungnaek de mboujduenh gyaak, gij suijbingz bauj hawj haeuxgwn ancienz de gyaak lai raeuh. Gij canjlieng haeuxgwn guek raeuz lienzdaemh 8 bi onj miz 1.3 fanh ik gaen doxhwnj, bi’gvaq haeuxgwn canjlieng 13731 ik gaen, guh reih guh naz moix moux ndaej haeuxgwn 386.8 goenggaen, song yiengh neix faenbied beij bi’gyai gyalai 498 ik gaen、13 goenggaen；suenq daengz gyaeujvunz moix boux miz haeuxgwn 486.1 goenggaen, sang gvaq diuzsienq haeuxgwn ancienz 400 goenggaen daengx seiqgyaiq cungj nyinh de.

Bauj hawj haeuxgwn ancienz dwg yiengh hongsaeh ciengxlwenx aeu guhndei. Aen baugau neix lwnh vunzlai rox geij bi doxgyawj neix guh maz hongsaeh daeuz bauj hawj guekgya haeuxgwn ancienz caeuq guh baenz maz saeh, caemh gijneix de hix vixok guek raeuz bauj hawj haeuxgwn ancienz cix bungzdaengz maz vwndiz caeuq fungyiemj daeuz. Naemjngeix hongsaeh bauj hawj guekgya haeuxgwn ancienz, aen baugau neix daezok, yaek ciuq gij gezcwz baijbouh Dangj- cunghyangh bae guh, seizseiz naemj daengz daejsienq、lai rox youheiq, lai ok banhfap、doengbuenz bae nda hong guh saeh, daj gak fuengmienh bae cuknet aen goekdaej haeuxgwn ancienz, lai roengzrengz vaqgej gij yingjyangj mbouj leih youz aen hawciengz haeuxgwn daengx seiqgyaiq yinxhwnj, laemxsim dawzmaenh diuz daejsienq guekgya haeuxgwn ancienz.

（Yenz Fugingj Yi Gingzyenz）