Ciet “haj it” yaek daengz seiz, dou geij boux baengzyoux doxyaeng yaek bae gizlawz youz baez he, bae gizlawz youz niq? Daihgya cungj nyinhnaeuz bae gizgyae baebae dauqdauq ndanggvaih mbouj gangj, mbouj itdingh guhcaemz ndaej haisim, youz gizgyawj gangj mbouj dingh ndaej gip angq rom feih. Coenz vah ndeu, sim baez angqyangz, couhdwg faex iq nya roz hix seng ok saeh mizyinx siengj mbouj daengz daeuj. Sim mbouj angq, couhdwg youz diegsien hix mbouj miz yungh.

Miz boux baengzyoux he naeuz: “Raeuz bae youz Dava bakleix valangz ba.”

Dava bakleix valangz gou dingq vunz gangj gvaq, hoeng caengz daengz gvaq, Dava liz dieg dou mbouj suenq gyae, gag hai ci bae couh ndaej. Couh yienghneix, geij boux couh gietdingh bae youzyouz bakleix valangz.

Caeux couh dingqnaeuz Dava Dahraemx- hoengz bakleix valangz dwg gyaengh Dahraemx- hoengz Dava Dencan daengz Gyanghnanz Yangh, raez 50 goengleix, seiq baih miz 200 lai bingz- fueng goengleix. Dava Dencan guh baenz le, gyaengh Dahraemxhoengz neix baenz aen suijgu gvangq 300 daengz 500 mij, laeg 30 daengz 50 mij ndeu. Raemxdah heungeungeu, song haenz byasoem daengjswgswg, gofaexcuk loegauau. Seizcin, vareux ndingfwgfwg; seizcou, faiqreux mbin rim dah; mbanj Bouxcuengh、mbanj Bouxyauz doxgyonj youq; reihnaz raih rangh raih, faexmak bo dab bo, naengh ruz gvaq ndawdah, rumz ci ruz doengh, raemxsaw ingj raen ngaeuz.

Danghnaeuz bungz daengz miz fwn miz mok, ngaeuzbya saek raemx couh lumj youq ndaw diegsien nei, loq raen loq mbouj; lumj youq ndaw fangzhwnz nei, loq miz loq ndwi……dingq daengz gijneix, dou engq muengh gig vaiq bae daengz, caenda yawjyawj, caenndang youzyouz.

5 nyied 3 hauh banhaet 9 diemjcung, dou haj boux hai aen ci ndeu, angqangq riuriu ok dou lo, song bi gonq gvaq roen ngeihgaep, aeu hai ci song diemj lai cung cij ndaej daengz Dava, seizneix doeng roen gauhsuz lo, dou diemj lai cung couh daeuj daengz dieg.

Daj sokdah Gyanghnanz hwnj ruz, caen dwg bak baez rwz dingq mboujyawx baez caenda raen. Vunz ndwn youq sokdah, cuengq da yawj bae, raemxdah gvangqlangh gyaenau, rim rumj dwg bya loeg、 raemx saw、 ngaeuz faex, rim da dwg gij doz lumj veh nei. Rumz liengz fefe ci daeuj, aen ruz vad gij raemxdah saw lumj gingq haenx yaengyaeng youz baenaj, ngaeuzbya doengh- yubyub, bya caeuq bya mizseiz doxnep, mizseiz dingz youq. Youq baez luep baez luep naemjngeix ndawde not bae, youq baenz mboengq baenz mboengq ngeixlangh ndawde baenaj.

Sing yiengj aen ruz con rin gvaq raemx, nyengq rwz baez dingq, dauq dwg sing yiengj mbouj miz gijmaz cauznauh. Aenvih, gij raemx gizneix gaeuq unqswnh, mbouj rox mbouj nyinh gaenq dawz gij nyapmbwq bouxvunz lijcaengz foekfan okdaeuj haenx caem roengzbae.

Ruz daengz bakleix valangz, yaengyaeng hai youq gyangdah unqswnh, mwngz mbouj yungh ok sing, gij sing roeg mbinbengbeng haenx gag rox gejhai mizyinx sengmingh. Raemx gyaeu, youq laj song haenz byaheu haeujsim bae umjrungx caemrig; saek raemx, youq ndaw gosangh caeuq gofaexcuk nye moengx mbaw heu haenx doxheuh doxgangj. Ngamq hai din, couh deng gij gingjsaek mboujmiz banhfap bae yaenq veh haenx lwt bae le geij faen saenzgeiz.

Gou naemj, danghnaeuz mwngz loekgvaq aen geiq neix, yienghneix, gij haemzhoj mwngz mbouj ndaej gangj ok bak haenx couh mboujmiz banhfap hawj vunz sim’in lo.

Riengz raemxheu foebfep youz bae, rumz ci sanq byoemgyaeuj, ndang mbaeu lumj enq cibfaen haisim. Mwh byai byoem biufiegfieg, ga giuz Giuzmbanjgyangh lumj duzbeih yaeb raemx nei yaepyet couh gvaqbae. Raemxdah song haenz, haeuxyangz gwnz bo biendah heu lo, mbawsangh hix heu lo, mbaw gocuk bienreih heu lo, mbaw- gyoij heu lo……

Gij byaek ndaw suen seiqcingq moengx- hubhub, gij nya bienroen uteuj nanwtnwt, rim da cungj dwg gizgiz heuauau, gij sengmingh neix ngaeunyinz sailwed, itloh mbouj bienq dwk coh baihnaj mbehai, youq gwnzdah saekloeg bu baenz lumj ndaundeiq luemjmyigmyig, youh habhab sanqsanq, lumj baenz vanj baenz vanj souh haeuxyangz, cang rim cukhoh caeuq fungsou.

Biendah giz gyae miz ranz ciengx nonsei, myag raen duznonsei lwg yaengyaeng gaet gwn mbawsangh, gyoengqde lumjnaeuz youq ndaw mbawoiq mbouj dingz dwk gangj vah, gij sainyaeuq gwnzndang ciemhciemh bienqndaej youh biz youh gyaeu.

Ruz lae youq gwnz raemxheu, foebfeb youq gyang bakleix valangz, gij saekloeg gagmiz daegsaek byaraemx ndwenngux caemroengz daejsim bouxvunz. Gij saekloeg haenx noengz ndaej heu bae, lumj raemxgiengh, lumj raemxraiz, lumj yiengnong, youq ndaw saekloeg nyinhdumz raezrangrang, cit dwk vunz feiz bae, sawj vunz gikdoengh nanznanz bae.

Gij saek rongh yienznaeuz mbouj ngamq dwg heuoiq, hoeng youq ndaw mbouj rox mbouj nyinh, dauq hawj vunz maez. Youq ndaw gyaeundei heuauau, mboujmiz banhfap swiqsanq gij vaiqvued hawj vunz sim’in haenx.

Vasien ngamq dwg yaep seiz maez da vunz, cijmiz gij saekloeg comzroenx sengmingh haenx cijndaej nanznanz ngaeu dawz aen sim.

Nguxnyied, dauqngeix gij doeksaet cibleix vadauz gyaeundei haenx, yienznaeuz ngoenzndei ngamqngamq gvaqbae, hoeng baenzlawz hix beij mbouj ndaej gij byaheu raemxloeg bakleix valangz yienghneix sawj vunz sim unq!

Ruz laebdaeb boq hauh hai baenaj, caiq yawj gij byaheu youq gwnz raemx foebfeb bae mbouj dingz haenx, sawj vunz gag ngeix goekdah daj gizlawz lae daeuj?

Ndit sanq lumj muengx nei, ronghsagsag lumj va ngamq hai, gadah utut vanvan famzfub sanqok yienghsiengq mbouj doengz daeuj. Rumz mbouj dingz mbouj duenh, liengzsausau, gij loeg lumj roxyiuj nei youq laj mbwnheu fwjhau doenghyubyub, doxgyaep doxlaeh baebae dauq- dauq. Ruz gvaq bakleix valangz, sim fiz gij sei、 gij doz byasang caeuq dahgoz neix. Lau loeng gvaq aen gingj lawz, cungj mbouj nyienh yaengx fwngz hwnjdaeuj bae cw gij ndit gwnz najbyak.

Gij roeg heuh mbouj ok mingz haenx yaepseiz daj haenzdah angqangq yangzyangz mbin okdaeuj, gij ngaeuzfwj youq ndaw raemxsaw gveujgaeq yaengyaeng gangjgoj, saek heunaunau dwg gij saekrongh gagmiz daegsaek bakleix valangz, hix dwg gij yienghsiengq daegsaek Dahraemxhoengz.

Vihmaz, gij raemx gizneix baenzlai loeg, baenzlai unqswnh, baenzlai gyaeundei. Mbouj yungh naemj bae gyae, raeuz gag rox, danghnaeuz mbouj dwg gij bya yunghsim dab heu, danghnaeuz mbouj dwg gij faexcuk caenhcingz rom heu, danghnaeuz mbouj dwg gohaeux caenhrengz majheu, baenzlawz miz gij mwncupcup mbouj dwg rongh seizcin dauq maenh gvaq rongh seizcin neix.

Bakleix valangz mbouj ndaej mbouj sawj vunz fiz dwk mbouj miz vah, fiz dwk yaek giet baenz gaemz bae. Fobfeb youq gwnz dah luemjnyignyig, ndawda lumjnaeuz daek hwnj geng raemxdang oiq nyibnyib ityiengh, daengx ndang hoij rim gij rang heuau raemhrwg, gangjvah gingz fwngz gig lumj dahsau mbanj Gyanghnanz baenzde unqswnh gyaeundei.

Youq raemx baih haenx, bya ciuqyiengh ce roengz gij daegbied de, bya ciuqgaeuq dodyienh gij soemfwt de. Ruz hai gvaq bakleix valangz, sim rox raiz sei rox ciengqgo rox boiq yaem, raemx mbouj saet bae daegsingq unqswnh, bya lij dwg hungsang maenhmwdmwd, neix dwg mbwn gag caux baenz, youh doxgap ndaej baenz siengq baenz yiengh.

Naengh baez ruz couh ndaej yawj daengz “gaeqciengq heuhmbwn” “vaizlungz ndoet raemx” “bya ndwenvauq” “byaanmax” “bya- douqyawh” “roeggungjcoz mbe fwed” “lingzgeq yawj ronghndwen” “ndoeng gocuk bakmax”“dahsien ciuqgingq” gij gingj neix, danghnaeuz mbouj naengh ruz hwnj haenz bae, cix ndaej yawj gamjgoengsien、gamjdahsien caeuq gamjmehsien, gizgiz lumj veh, ndeiyawj youh maezvunz.

Youq gyang bakleix valangz, rumz laebdaeb ci daeuj, sawj vunz simsangj, saekloeg baenz rangh baenz rangh, sawj vunz baez yawj couh yaenq youq ndaw sim，daengz laep hix youz mbouj mbwq.