8 nyied 16 hauh,《Giuzsi》2023 nienz daih 16 geiz fat bien faenzcieng《Sonrox Cawjdaez Baenzsaeh Cix Bienqbaenz Rengznyoengx Hungloet Hawj Raeuz Baedrengz Haigvangq Aen Buenz Moq Hwnqguh Aen Gvangjsih Maenghndei Seizdaih Moq》youz Gvangjsih Bouxcuengh Swcigih Dangjveij suhgi、Swcigih Yinzda Cangzveijvei cujyin Liuz Ningz raiz. Bien faenzcieng neix daj seiq aen fuengmienh bae lwnhgangj, baudaengz“seizseiz yungh sim bae doeg、doeg rox‘sim’saw, haenqrengz yungh Aen Swhsiengj Sevei Cujyi Miz Gij Daegsaek Cungguek Seizdaih Moq hawj vunzlai doengzsim caezhoz”“dawzdingh rox caenleix、aeu caen rox, haenqrengz hawj gij bonjsaeh guhhong guhsaeh lai ak raeuh”“dawzdingh guh baenzsaeh caen、gingciengz guh youh guh nanznanz bae, haenqrengz muzlienh baenz boux gangj caen guh caen ndang seuq ndang cingh gwn noix yungh noix mbouj doenghngauz saekdi” “dawzmaenh saedguh ak、doeksaed ndei, haenqrengz haicauh aen buenz moq hwnqguh aen Gvangjsih maenghndei seizdaih moq”. Bien faenzcieng neix vixok, daj sonrox cawjdaez hagrox gvancez Aen Swhsiengj Sevei Cujyi Miz Gij Daegsaek Cungguek Seizdaih Moq doxdaeuj, Gvangjsih gaemdawz aen cwngci yinvu hungnaek neix ndaetndaet bae, ndaej Cunghyangh Cijdaujcuj vixyinx, nyinhcaen gvancez doeksaed gij gezcwz baijbouh Dangjcunghyangh, haeujlaeg bae hagrox gvancez gij cingsaenz vahgangj youqgaenj baenzroix caeuq cijsi bihsi youqgaenj Siz Ginbingz cungjsuhgi gangj daengz sonrox cawjdaez, diepnet hopheux gij iugouz youqgaenj“haj yiengh lai ak”cungjsuhgi gangj daengz baedrengz haicauh aen buenz moq hwnqguh aen Gvangjsih maenghndei seizdaih moq, gaemndaet gij iugouz cungjdaej、moegbiu yinvu caeuq banhfap daeuz guh sonrox cawjdaez, dawzmaenh yawjnaek baenzsaeh caen、saedguh ak、doeksaed ndei, comz rengz bae hag rox sim dingh、hag rox uk raeh、hag rox niujcingq、hag rox ak guh, doinyoengx sonrox cawjdaez haeuj lai laeg guh lai saed、caen bae guh baenz dahraix, diepnet riengzlaeng bouxdaiqloh fukhwng hungmbwk haenqheiq saedguh, raiz ok bien faenzcieng moq hwnqguh aen Gvangjsih maenghndei seizdaih moq, lai ok goengrengz、lai hawj najrongh bae hwnqguh guek ak、 fukhwng minzcuz.

（bonj bauq cunghab/本报综合）