“Yauzcuz youq byasang, Myauzcuz youq byonghbya, Bouxgun youq diegbingz, Bouxcuengh caeuq Dungcuz youq luegbya”, vahsug naeuz ndaej doiq ha, youq Byada’myauzsanh, beix- nuengx Yauzcuz dingzlai youq dingjbya guh ranz, cingq dwg coenz gangj “miz bya couh miz Yauz”. Youq ranghdieg Yungzgyangh laeng Yungzsuij Myauzcuz Swciyen, Linzvangzdingj youq megbya Yenzbaujsanh sangnengneng haenx. Daj giz de yiengq doeng bae, miz geij aen Mbanjyauz, ndawde gij vunz Mbanjyauz Gyanghbauj gangj Vahbanjyauz, ndang daenj buh Dingjbanjyauz.

“Dauq yawj roen doxdaeuj, miz rumz youh miz fwn, dauqbae, caih de dwg fwn dwg rumz roxnaeuz mbwn’gvengq.” Haj bi gonq, gou bae aen yangh ndeu dangsaeh, roxnaj bouxau ndeu——De dwg Bouxmyauz, ndangmaengh、dungxrauz, vunzlai cungj heuh de guh Daconh. Seizhah, de gyaez daenj buhmbengq、vaqdinj, guhhong gig roengzrengz, ciengzseiz hwng dwk hanh dumz ndang liux, bouxvunz cix dak dwk henjgeq.

Bi 2019, ciengz ciengq duetgungz gunggeng haeujdaengz mboengq gaenjcieng, Daconh guh boux lienzhaeh bet aen mbanj Liengzsangh Cunh haenx. Ranzhoj miz Bouxmyauz、Bouxyauz, aen rap duetgungz naek、 diemj lai mienh gvangq、hong lai raixcaix, yienghyiengh cungj aeu goq, ciengzseiz ranzrongh couh okbae、ranzlaep coh haeujranz.

Daconh yenzlaiz dwg boux ganbu bingz- ciengz ndawmbanj, baez yamq baez yamq byaij ndaej maenhsaed, doeklaeng youh youq aen cwngfuj ndawyangh guh ndaej ngeihcib lai bi. De dwg boux lauj dangjyenz ndeu, lumj “duz cwzgeq” nei gaenxguh, lauxsaed vih vunzmbanj guhsaeh. Ganbu ginzcung dangdieg cungj saenq de raix. Duetgungz gunggeng hainduj le, de cawzle guh gij hong ancienz gamduk、dangjvu cihbu, lij yaek haeuj ndawmbanj cug ranz liebbyaij bangfuz、senhconz cwngcwz, vih vunzlai baizyou gej- nanz.

Gyanghbauj Dunz Mbanjbanjyauz dwg Daconh guh lienzhaeh, aen de youq gwnz dingjbya sang bet bak daengz gouj bak mij, daengx bi fwj geux mok cw, ndwennit miz nae daebdong mbouj vaq. Vih bang gyoengqde duetgungz, Daconh gwih mozdozceh, dap youzgwn、haeuxhau, benz hwnj Ndoicihdunghbo, gvax gvaq gouj aen van, byaij gvaq roenbya gumzgamx, daengz gwnz dingjbya bae lieb Ranzyauzcuz baenzhoj haenx.Camcaz gyoengqde vih gijmaz baenzgungz caeuq ndaej baenzlawz bang gyoengqde duetgungz, youh soengq bae doxgaiq naicam.

Ranzyauzcuz baenzgungz de bang haenx, miz ranz ndeu heuhguh Yizyangz. Ranz vunz neix aenvih mbouj rox gisuz、caeuq baihrog baedauq noix、swhsiengj lotlaeng、roenloh souhaeuj mbouj lai, ndigah baenzhoj. Daconh daj “couhnieb banggungz” ra roenloh, heuh lwg de、lwgbawx de gvanbaz neix bae hag dinfwngz guhhong, gvaqlaeng bae ndawsingz ra hong, bi ndeu souhaeuj haj fanh lai maenz ngaenz, bi haenx ranz neix couh miznaj duetgungz.

Lij miz ranzgungz Bouxyauz singq Cau ndeu, aenvih dahnuengx daihsam miz bingh, daengx bi aeu vunz ciuqgoq, youh soengq song boux lwgnyez doegsaw, mbouj ndaej okrog racienz, ndwenngoenz hojnanz. Daconh ciuq gij cwngcwz banggungz mizgven, lienzhaeh minzcwng bouhmonz, bang ranz neix sinhcingj dihbauj; lwgnyez hix ndaej yiengjsouh gij cwngcwz bangcoengh hagseng, gaijgez le gwnheiq ndawranz de.

“Aeu bya hawj vunz, mboujyawz son vunz dwkbya”, Daconh cujciz ganbu “song veij”ndawmbanj、dangjyenz daibyauj、yinzda daibyauj、cwnghez veijyenz、boux guh ndaej gwn、ranz- gungzhoj daibyauj daengj daeuj caemh naengh caemh gangj. Daihgya naengh youq gwnzdeih, conz siengjfap yigen ndei, gietdingh guh gij canjnieb raetmoegngaex、byaleix haeuxva、faexsamoeg daengj hab aen mbanj cingzgvang haenx. Bi haenx, daengx mbanj miz song bak lai ranz guh canjnieb dajndaem、dajciengx, gij souhaeuj vunzguhnaz dem lai lo. Gij genyi ndei de, bang daengx mbanj bienq “hawjlwed” banggungz baenz “cauhlwed” banggungz. Seizneix, Mbanj- banjyauz doeng roensuijniz lo, vunzmbanj ndaej youq ranzmoq, miz le canjnieb, yienghsiengq moqsagsag.

Bi 2019 ndwen 10 ngoenz ceiq doeklaeng, aenvih gyaban baeg lai, gij hong duet mauhgungz “song nyinhdingh” yaek cug ranz bae guh, Daconh baeg lai couh baenzbingh. Haemhneix, de sawq- mwh ngaiz ukoklwed, laemx youq ndawrug, lwg de Siujbingz soengq de bae yienhsingz ciengjgouq le, cienj bae Liujcouh binghfuengz binghnaek.

Dingqnyi aen siusik neix, gou aek diuq- yupyup, ndangcieg mboujonj, gij hong ancienz gamduk caj Daconh, hong banggungz caj Daconh, beixnuengx Yauzcuz lij miz haujlai saeh muengh Daconh……Gizsaed, gek geij bi le, dou lij muengh Daconh dauqma. Gij saeh beixnuengx caemhsingq neix, hawj gou youq aen Mbanjmyauz liz diegseng bak lai leix gyae, gag roxnyinh miz di siengsim.

Gou lumjbaenz yawjraen de hai mozdozceh, riengz boux hai civat youq roen wgizlu haiguh, daezsingj bouxguhhong dawz ancienz haeujsim; gou lumjbaenz yawjraen de dingj nditndat, soengq faenh liengz hawj vunzlai; gou lumjbaenz yawjraen de daenj buhlaux, youq ndaw diegnae henz goengloh baek gaiq baizdwenyawj “doeknae roen raeuz、louzsim ancienz”……

Goengmbwn baujyouh, Daconh ngaiz soengq bae ciengjgouq le, diuz mingh gouq ma lo, hoeng aen ndang baihswix doengh mbouj ndaej, doeklaeng lij miz bingh. Seizneix caenh ndaej lienhndang hawj aende dauqndei、menhmenh ywbingh.

Lwg Daconh heuh Siujbingz, de daihhag bizyez le caemh bae guh hong duetgungz gunggeng lo. “Lwg ciep hong boh, ceiq youq beksingq”, daxboh youq gwnzroen duetgungz baenzfouq dwg “boux byaijgonq”, lwg youq gwnzroen saenqhwng lajmbanj dwg “boux cienzswnj”. Neix gangj ok aen gojgaeq “bohlwg cungj dwg bing” gamj- doengh vunz ndeu, baihlaeng dwg fouzsoq vunz Bya’myauz daj duetgungz gunggeng byaij coh lajmbanj saenqhwng.

Geij ngoenz gonq, gou caiq dwk dienhvah hawj Daconh, ndawsim bonjlaiz gikdoengh raix, dingqnyi sing “duh、duh……”, aensim couh dauq dingh lo. Seizneix de youq baihrog bya’hung, doiq gij saeh “lwg ciep hong boh”, aiq cij youq baih dienhvah riunyumnyum.

Ndwendoeng, Mbanjmyauz nae hausaksak, lumj daenj buhngaenz, gou dauqbae ndawmbanj, caiq yawj mbouj raen Daconh youq gwnz roenbya homq hai mozdozceh……Mwh gou fan yawj mbawsiengq caeuq de caemh guhhong, nyaenx mbouj ndaej danqheiq, caeklaiq sam bi gonq lwg de Siujbingz dauqma, mboujne Daconh mbat neix caen yaek bae raen Yenzvangz lo.

Seizneix, Siujbingz lij buet youq gwnzroen lajmbanj saenqhwng, ciepswnj gij saehnieb boh de, caij gij riznae byaij diuz roen Daconh caengz byaij sat haenx, gangj gij gojsaeh beixnuengx Myauzcuz Yauzcuz “ranz vunz ndeu”……