8 nyied 11 hauh, Cunghgoz Cozgyah Hezvei haida(goengbouh) gij gezgoj bingzsenj Gaiq Cib’it Mauzdun Vwnzyozciengj, gungh miz 5 bouh cozbinj ndaej ciengj, bouh cozbinj《Doxhap》youz Dunghsih boux canghraiz Gvangjsih raiz baenz de hix ndaej ciengj, neix dwg canghraiz Gvangjsih baez nduj aeundaej aen ciengj ceiq sang faenzhag Cungguek, canghraiz Gvangjsih baez nduj ndaej Mauzdun Vwnzyozciengj, dakdoz le gij loqsiengj canghraiz bangeqlaux ban- cungnienz bancozoiq Gvangjsih, hawj aen binjbaiz“Bingdoih Faenzhag Gvangjsih”lai najrongh raeuh, gya rengz lai ak hawj vwnzva seizdaih moq Gvangjsih mwnhoengh hwngfat.

Bouh sawcuenh raez《Doxhap》dwg Swcigih Dangjveij Senhconzbu guh aen gunghcwngz cauhguh vwnzyoz yisuz ciuhneix laeng Gvangjsih ndawde aen hanghmoeg bangfuz ndeu, daj bi 2019 doxdaeuj gungh bangfuz le 109 aen doenghgij hanghmoeg neix, doiok 800 lai gienh cozbinj, miz 300 lai gienh ndaej ciengj guekgya gaep、ndaej guekgya okcienz bangfuz roxnaeuz ndaej senj bae langhbaij, cozbinj lailai, baenzsaeh lailai, ok rengz hawj Gvangjsih cauhguh vwnzyi ndaej byongh hwnj dieg lai gvangq、bin hwnj bya lai sang.

Baez neix“Bingdoih Faenzhag Gvangjsih”ndaej ciengj hung, yinx- hwnj Gvangjsih vwnzdanz“fanjwngq”haenq lai, hawj Gvangjsih com goeng- rengz ce、haebheuj laemxsim yaek guh ndei hongsaeh cauhguh vwnzyi.

“Mauzdun Vwnzyozciengj laeb ndaej 40 lai bi lo, raeuz Gvangjsih baez nduj ndaej aen ciengj neix, neix mboujdan dajheiq hawj‘Bingdoih Faenzhag Gvangjsih’lai maij haenq- rengz, hixdwg dajheiq hawj raeuz dieg minzcuz vunznoix lai maij haenqrengz. Gaxgonq doxdaeuj cungj dwg baenz- neix, Swcigih Dangjveij、Cwngfuj bi beij bi lai okrengz bangfuz canghraiz cauhguh cozbinj vwnzyi maenhndei, ok baenzroix cwngcwz bangfuz cauh cozbinj nduj, yawjnaek cauhguh binjbaiz vwnzva miz gij daegsaek Gvangjsih, neix cij hawj raeuz mizmbei mizdamj mbouj dingh mbouj duenh bae byongh hwnj dieg lai gvangq、bin hwnj bya lai sang. Vwnzyi yaek hwngfat, gangj daengz goekrag couhdwg yaek ok cozbinj maenhndei、miz vunzcaiz maenh’ak, raeuz itdingh haenqrengz caiq guh baenzsaeh lai lai dem.”Dunghsih naeuz.

Mauzdun Vwnzyozciengj dwg Cungguek raeuz yiengh ciengj faenz- hag ceiq miznaj ndeu, youz Cunghgoz Cozgyah Hezvei cawjbanh, ciuq gij vah Mauzdun sienseng lij lix cix daengq ce, hawj vunz lai maij okrengz cauhguh sawcuenh raez maenhndei、doinyoengx gij faenzhag sevei cujyi Cungguek de ndaej mwnhoengh cix cauhlaeb, seiq bi bingzsenj mbat ndeu. Gaiq neix 4 bouh cozbinj ndaej ciengj wnq dwg 《Byanae Deih Gvangq》youz Yangz Ciginh raiz、《Raemxbauj》youz Gyauz Yez raiz、《Bwnjbah》youz Liuz Liengcwngz raiz、《Doz Diegguek Cien Leix》youz Sunh Ganhlu raiz.

（Linz Seznaz Lij Yingzdingz）