Daegbiuh caeuq gyoengq hujgeiq de gwn laeuj seiz naeuz, ngoenzlwenz de daengz aen Mbanjyauz ndeu bae banggungz, ngamq haeuj bakmbanj, youq henzroen couh raen aen diengziq ndeu. Seizhaenx, de cingq nyouh gaenj, caj mbouj ndaej yawj ndaw diengz de miz gijmaz, couh aj lahlen youq bakdou aen diengziq oknyouh. Ngamqngamq ok, youq ndawdiengz couh miz boux mehmbwk ndeu swenj hwnjdaeuj:“Duz marae lawz, oknyouh saj gwnz gyaeuj gou? De yaek dai lo!” Daegbiuh muengzfwd buet deuz lo, lahlen cungj mbouj gib rag hwnj, couh buet haeuj ndaw mbanj bae lo.

Gyoengq hujgeiq cam Daegbiuh:“Gvaqlaeng baenzlawz yiengh ne?”

Daegbiuh caj mehyah de byaij ok baihrog bae le cij naeuz: “Mehmbwk neix gig hozndat, gyaep daeuj riengz gou gaem genbuh gou mbouj cuengq, de naeuz, aen diengz haenx dwg aen diengzgaeq de, mbouj dwg diengzhaex, mwngz baenzlawz oknyouh haeujbae, lij saj nyouh deng gwnz gyaeuj gou ne, mwngz vaiqvaiq hawj gou bak maenz ngaenz gvaqhoengz, mboujmiz mwngz mbouj ndaej bae! Gou baez yawj, boux mehmbwk neix daihgaiq miz samcib lai bi, daenj geu buhraiz nding ndeu, gyaeb geu dox heiz- nyidnyid ndeu, byoemgyaeuj nyungq- nya’nya, gij bak de vej gvaq baih ndeu bae, gou couh rox boux mehmbwk neix mbouj ndei doiqfouq, couh hawj bak maenz ngaenz hawj de, de cij wh dauqbae.”

“Mwngz raen fangz loba? Cungj mbouj bae lajmbanj byaijbyaij, couh dwg yienghneix lo!” Gyoengq hujgeiq riu naeuz.

“Mwngz geijlai bi mbouj baema ranzmbanj lo?” Daegsam cam.

Daegbiuh nunaenj gyaeujien roengz ndaw gang’ien bae, vah’w naeuz: “Samcib bi loba?”

Samcib bi gaxgonq, Daegbiuh ngamq ndaej cibbet bi. Aenvih de gauj mbouj hwnj daihhag, couh siengj haeuj ndawsingz bae ra hong guh. Hoeng bae daengz ndawsingz, de cungj ra mbouj ndaej hong guh. Daegbiuh byaij youq gwnz gai, de mbouj roxnaj bouxlawz, de daj gyaeujgai byaij daengz rienggai, caiq daj gaidoeng byai daengz gaisae, de byaij baeg lo, roxnyinh nyouh youh raengbwngbwng. De siengj ra aen diengzhaex he oknyouh, couh baenq- cienq ra hwnjdaeuj. Daegbiuh cam haujlai vunzhaw aen diengzhaex youq gizlawz, bouxboux cungj bi gyaeuj naeuz mbouj rox. Daegbiuh nyaenx dai nyaenx liz, de youq ndawsim ndaq hwnjdaeuj: Aen singz baenzlai hung, mboujmiz aen diengzhaex hawj vunz- lai ok haexnyouh, caen siengsim o!

Daegbiuh naengh youq doiqnaj aen laeuz bakhuq, fwngz gaemh lajga, mbouj rox baenzlawz guh ndei, de caen yousim nyouh rih dangzvaq.

Daengngoenz menhmenh doek roengz bya lo, fwjhaemh menhmenh remj hwnjdaeuj, fanciuq dwk aen naj Daegbiuh nding lumj boux laeujfiz. Mbouj geijlai nanz, miz boux vunz sauqgai ndeu cingq sauq gvaq doiqnaj de daeuj. Daegbiuh siengj: Riengz bouxsauqgai bae, gangj mbouj cinj couh ra raen diengzhaex bw. De yienghneix baez naemj, couh riengz bouxsauqgai bae. gvaq liux geij aen gox, caiq sohsoh haeujbae cib lai mij, caencingq yawj raen miz haujlai doengjlabsab, doengjlabsab bangxhenz miz aen bingzfangz ndeu. Daegbiuh byaij haeujbae, raen geij boux mehmbwk cingq yungh raemx swiq fagcanj. Daegbiuh couh cam:“Beix- nuengx, gizneix miz diengzhaex lwi?” Gyoengqde aeu fwngz ceij haeuj baihswix bae, naeuz giz de dwg aen diengzhaex bouxsai. Daegbiuh doq gyo’mbaiq doq buet haeujbae lo.

Haemhhaenx, Daegbiuh haeuj aen hekdiemq ndeu bae ninz, aen hekdiemq neix dwg boux lwgsau ndeu guh lauxbanj. Boux lauxbanj neix daih’iek ndaej ngeihcib lai bi, de ndang sang、hangz soem、naj raez; de daenj geu buhhau ndeu, ronghcingx yaek yawjraen ndangnoh bae; de dangq gij byoemgyaeuj goz lumj ngwz nei, hung lumj aen ndij dozfaiq, geu vinjhoengz dinj haenx ngamq goemq roengz caekhaex de bae. De ndwn youq henz daizsoungaenz, cingq nyumx gij gyaepfwngz de.

Daegbiuh cam:“Lauxbanj, ninz haemh ndeu geijlai ngaenz?”

Dahsau gangj:“ Haemh ndeu haj maenz ngaenz.” Daegbiuh ndenq haj maenz ngaenz gvaqbae, dahsau couh daiq Daegbiuh hwnj ngeih laeuz bae lo. Dahsau naeuz: “Aen daeng haephai youq gizneix, ninz le aeu geiq ndaej gven daeng!”

Daegbiuh buet ngoenz ndeu, daengxndang haeu hanh, de siengj ndeindei mad mbat ndang ndeu cij bae ninz. De laihnaeuz lumj youq ndawranz nei miz gangraemx cang raemx, yungh rok vaeg couh ndaej, de couh bae ra gangraemx, ra bae ra dauq ra mbouj raen gangraemx, De geizgvaiq lo, guhmuengz buet roengz lajlaeuz bae cam dahsau gangraemx youq gizlawz.

“Gangraemx? Miz gijmaz gang- raemx? Caen dwg vunzrungh lajmbanj ha!” Dahsau da’mbot bae coh Daeg- biuh naeuz, yienzhaeuh riengz Daeg- biuh hwnj gwnzlaeuz bae.

Dahsau daiq Daegbiuh haeuj ranzdajcaemx bae, fwngz baez niuj suijlungzdouz, raemx couh lae okdaeuj lo.

Daegbiuh doeksaet lo, de cungj nyinhnaeuz lumj lajmbanj nei, raemx aeu gang cang, fwnz aeu mbaq rap, byawz rox ndawsingz raemx rox gag daeuj? Daegbiuh aeu aen doengj ciep doengj raemx ndeu, yungh sujbaq uetuet ndang, yienzhaeuh hwnj congz bae ninz lo.

Byonghhwnz, aen dungx Daeg- biuh yiengj mbouj dingz, de siengj daengz itdingh dwg okdungx lo, de fanndang hwnjdaeuj, bae ra diengz- haex, de youq henz suijlungzdouz yawjraen aen gangmeng hau ndeu, hoeng youh mbouj rox dwg aen gijmaz? Daegbiuh hai fa aen gang- meng, cijraen ndawde miz di raemx ndeu, Daegbiuh mbouj rox aen neix miz maz yungh, fanjcingq mbouj lumj giz okhaex. Daegbiuh dungx in nanznyaenx, haex yaek daeuj lo, de couh ra aen daehsuliu ndeu daeuj, ok- haex roengz ndaw daehsuliu bae.

Haetlaeng bet diemj cung, Daeg- biuh couh dawz daeh “doxgaiq” haemhlwenz okrog bae vut, de roen gvaq daizsoungaenz seiz, dahsau nyaeuq ndaeng cam:“Mwngz riuj gijmaz doxgaiq? Baenzneix haeu?” Dahsau goemqbak cam.

“Dwg…… dwg…… dwg……”Daegbiuh gangj vah gazgwdgwd.

“Duz marae mwngz, baenzlawz yungh daehsuliu cang haex ni? Ndaw rug mboujmiz aen okhaex ma? Dai lo, mwngz vaiqvaiq dawz dauqbae dauj.” Dahsau hat naeuz.

“Mwngz dingq gou gangj, ndaw fuengz mboujmiz diengzhaex, haemh- lwenz gyanghwnz gou okdungx, ra mbouj raen diengzhaex, gou couh aeu daehsuliu cang lo, seizneix gou cingq yaek dawz okrog bae vut……”

Dahsau heuh Daegbiuh hwnj laeuz bae, vix aen gangmeng gangj: “Aen neix mbouj dwg aen okhaex ma?”

Daegbiuh baez yawj, de ngauz- gyaeuj naeuz: “Aen neix mbouj dwg ba?”

Dahsau naeuz: “Aen neix dwg aen naengh okhaex, rox ma?”

“Naengh okhaex? Gou mbouj raen gvaq, dou youq lajmbanj cungj dwg aeu song saenj faex gangq gwnz cingj, song din yamq gwnzfaex maeuq ok ne, mbouj raen naeuz naengh okhaex gvaq.”

“Vaiq, vaiq dawz cumh neix bae dauj roengz ndaw doengjnyouh bae caiq cung raemx.” Dahsau doq gangj doq buet roengzlae bae.

Gienh saeh neix, Daegbiuh dauqbae daengz ranz, de cungj mbouj naeuz vunz nyi, de gag ndaenq swhgeij mingh mboujbaenz.

Haemhhaenx, daxboh de cam: “Ra hong baenzlawz yiengh ha?” Daegbiuh ngoemgyaeuj, mbouj gamj yawj daxboh de saek mbat, de sing iq naeuz: “Lumj gou mboujmiz gisuz, miz maz hong hawj gou guh?”

Daxboh caiq mbouj gangjvah lo, de ndingq boilaeuj rimrim ndeu menhmenh gag gwn. Daxmeh Daeg- biuh nep geij naed duhmeuz hawj Daegbiuh, naeuz: “Dingqgangj geij bi neix daeuj, ndaw yen miz gaujsi aeu ganbu, mwngz ndeindei un saw, sawq bae bauqgauj mbat ndeu yawjyawj!” Daegbiuh naengh youq mbouj gangj- vah.

Gyanghwnz, Daegbiuh lumjbaenz ndaejnyi daxmeh de heuh de, de baez singj gvaqdaeuj, daxmeh de cingq ndwn youq henzmbonq. Daxmeh naeuz:“Vaiq, daxboh mwngz doek roengz ndaw cingj diengzhaex bae lo! Cungj gvaiq gou haemhneix hawj sou gwn duhmeuz.”

Daegbiuh baez doeksaet, buet daengz aen diengzhaex henz roen, raen daxboh cingq youq ndaw cingj diengzhaex yaek hwnjdaeuj cungj hwnj mbouj ndaej. Cingj diengzhaex lajmbanj cungj miz song mij laeg, ciuq bouxlaux gangj, cingj diengzhaex aeu vat laeg cij ndaej cang haex lai, haex lai lo cij ndaej aeu bae ndaem haeuxyangz. Diengzhaex lajmbanj, itbuen guh youq ndawsuen swhgeij, vat baenz lo, couh aeu song diuz faex hung doengzbingz camh gvaq gwnz- cingj bae, song diuz faex haenx cuengq doxliz cib goengfaen gvangq, couh ndaej okhaex roengzbae lo.

Daegbiuh ra daeuj aen lae ndeu cuengq roengz ndaw cingj bae, song fwngz rag daxboh hwnjdaeuj. Daxboh daengxndang nem miz haex caeuq nyapnyaj, Daegbiuh aeu raemx swiq seuq aen ndang daxboh, cij aemq de dauqbae.

Ginggvaq gij saeh youq ndaw- singz fatseng haenx caeuq daxboh doek cingj diengzhaex gienh saeh neix, ndaw sim Daegbiuh cibfaen saenqdoengh, de byonghhwnz ninz mbouj ndaek, gyangngoenz gwn haeux mbouj van, de gietsim itdingh gauj okbae.

Bi daihngeih, Daegbiuh cinjbi bae gaujsi, daxmeh de cien geij aen gyaeq hawj de gwn. Daegbiuh naeuz: “Meh, gou gijmaz cungj mbouj gwn, gij gyaeq neix mwngz couh caeuq daxboh gou gwn ba.”

Daxmeh cam:“Lwg ha, mwngz baenzlawz mbouj gwn lo?” Daegbiuh najnyaeuq hwnjdaeuj, naeuz: “Meh ha, gou lau gwn imq liux bae daengz ndawsingz ra diengzhaex mbouj raen.” Daxmeh dingq le laeglemx mad raemxda.

Baez gaujsi neix, Daegbiuh gauj ndaej ganbu lo, faenboiq youq ndawsingz Cwngzgengiz, mbouj geijlai nanz, de dauq ranzcoj daiq bohmeh haeuj ndawsingz bae gwnyouq, daj mbat haenx hwnj, Daegbiuh couh gig noix dauq ranzmbanj lo.

Dingqnaeuz, Daegbiuh haj bi gvaqlaeng couh hwnj gaep dang gizcangj. De sien dawz gij diengzhaex goengyungh ndawsingz guh ndei, hawj doengh boux beksingq lajmbanj haeuj singz miz dieg okhaex oknyouh.

Daegbiuh caeuq gyoengqdoih gangj liux, de danq amq heiq raez- rangrang naeuz:“Gou ngamq dajsuenq bae lajmbanj guh diengzhaex goeng- yungh, byawz rox lajmbanj ranzranz hwnj ranzlaeuz liux, diengzhaex cungj guh youq ndaw ranz, caiq mboujmiz vunz bae baihrog okhaex lo. Ciuq yienghneix roengzbae, gou youq lajmbanj mboujmiz ranzcoj, yaek dauqbae saek baez cungj lau mboujmiz giz okhaex. Gou naemj bae naemj dauq, lij dauqbae ranzcoj hwnj aen ranzlaeuz ndeu ba!”