Guekgya Dungjgigiz baijok gij soq hawj vunzlai rox, Gvangjsih bineix dajndaem 180.15 fanh moux haeux seizhah, gya ndaem 3.15 fanh moux moq, gyahwnj 1.78%, youq daengx guek baiz daihbet; moux baenz haeux 160.95 goenggaen, moux lai ndaej 5.05 goenggaen, gyahwnj 3.24%, gij soq gyahwnj neix youq daengx guek baiz daihseiq; gyoebgyonj soundaej 29 fanh dun, lai ndaej 1.4 fanh dun, gyahwnj 5.07%, gij soq gyahwnj neix youq daengx guek baiz daihroek, baenzneix suenq cix laebdaeb bauj hawj gij soq dieg dajndaem、moux baenz haeux、gungh soundaej de cungj gyalai.

Ciuq vunz gyoepsuenq gij soq nungzyez, bineix suenq daengz 7 nyied 25 hauh, daengx gih sou 1099.16 fanh moux haeuxnaz saujdau gvaq, ciemq gij soq dajndaem saujdau bae 88.27%; dajndaem 630.14 fanh moux vanjdau gvaq, beij bi’gvaq caemhseiz lai ndaem 5.44 fanh moux. Riengzhaeux hom doh doenghnaz, neix yinxhwnj vunzlai deqmuengh baez- laeng youh ndaej haeux lai.

（Cinz Cing Ning Swhyauz Vangz Youcwngz Cinz Hungzyij）