原文：

屈原曰：“吾闻之，新沐者必弹冠，新浴者必振衣；安能以身之察察，受物之汶汶者乎？宁赴湘流，葬于江鱼之腹中。安能以皓皓之白，而蒙世俗之尘埃乎？”

渔父莞尔而笑，鼓枻而去，乃歌曰：“沧浪之水清兮，可以濯吾缨；沧浪之水浊兮，可以濯吾足。”遂去，不复与言。

——先秦·屈原《楚辞·渔父》（节选）

译文：

1

Giz Yenz naeuz: “Gou dingqnyi, ngamq swiqbyoem cingh itdingh aeu baet aen mauh ndei, ngamq swiqndang ndei itdingh dawz geubuh saeujsaeuj cijndaej daenj. Aen ndang seuqrikrik yienghlawz ndaej hawj gij uqcouj bungqhaeuj ndang daeuj? Gou nyienh diuqroengz Dahsienghgyangh bae, dai youq ndawdungx duzbya. Yienghlawz cungj mbouj nyienh gij oemjsoemq seiqgyaiq bungqhaeuj ndang gou daeuj.”

Goengdwkbya dingq le riufifi, vaijruz liz bae. Ciengq naeuz: “Raemxdah cingh youh cingh, ndaej swiq cingh fohmauh gou, raemxdah uq youh uq, ndaej aeu daeuj swiq din gou.” Menhmenh bae gyae lo, mbouj caiq caeuq Giz Yenz gangjvah.

（平果市 Luz Lilanz/陆丽兰）

2

Giz Yenz gangj caenlili：“Gou nyinaeuz, bouxvunz raeuz ngamq swiqgyaeuj cingh le bietdingh bongx faenx gwnzmauh seuqsat bae, boux- vunz raeuz caemxndang cinghseuq le lij aeu saeuj geubuh gwnzndang raeuz geij baez hawj gij faenx sinz deuz, yienghneix ndang raeuz haet soengsupsup. Baenzlawz lij hawj aen ndang seuq swhgeij lah dwk gij uq baihrog? Gou cingznyienh giengh- roengz Dahsienghgyangh bae ciengx bya hung liux, hix mbouj hawj gij mingz gou deng gij uq baihrog oep dwk uqnyoeknyoek.”

Canghdwkbya dingq le riu- nyumj, ndoiq gaiqsaz yamq yungjyat bae le, ndawbak de eu fwen:“Aenhuz raemxsaw lumj aengingq nei, bang gou swiq fohmauh, saeg moq aen mauh gou lumj ngamq cawx nei; aenhuz raemx doengqnyoetnyoet, bang gou sah song faj din gou.” De couh yienghneix eu fwen bae gyae le, mbouj caeuq Giz Yenz gangj gijmaz lo.

（都安瑶族自治县 Vangz Fung- mingz/黄凤明）

3

Giz Yenz naeuz:“Gou dingq vunz naeuz, ngamq swiqgyaeuj gvaq, itdingh aeu bongxbongx aen mauh, swiqndang gvaq lo, itdingh aeu bongxbongx buhvaq cij daenj. Mbouj hawj namhfaenx uq ndang. Aen sim gou caemh ityiengh, ningznyienh diuqroengz dah (Dahsienghgyangh) bae hawj bya gwn，hix mbouj caeuq vunzyak caemh guh vaihsaeh.”

Bouxdwkbya dingq le riuriu mbouj gangjvah, vad aen ruz bae lo, caiq ciengq go hwnjdaeuj：“Raemx Dahcanghlang saw youh saw, aeu daeuj swiq cag mauh gou, raemx Dahcanghlang hoemz youh hoemz，aeu daeuj swiq din gou. Bouxdwkbya caiq mbouj caeuq Giz Yenz gangj lo.

（西林县 Liengz Fungh/梁 锋）

4

Giz Yenz hoiz dap:“Gou nyinaeuz, ngamq swiqgyaeuj aeu baet mauh caiq daenj, ngamq dajcaemx aeu saeuj buh nungh ndang; yienghlawz hawj aen ndang seuqsat bae gyuj gij doemboenq seiqsug? Gou nyienh saetroengz ndaw Dahsienghgyangh bae hawj bya gwn, hix mbouj nyienh hawj aen ndang cingh ronghsag bae uq gij doem- boenq.”

Goengdwkbya riunyumnyum vadruz baenaj, ajbak guh fwen:“Raemx Canghlang saw youh saw ha, aeu ma saeg fohmauh; raemx Canghlang hoemz youh hoemz ha, aeu ma swiq song din.” Lizbae seiz, de caiq mbouj riengz Giz Yenz gangjvah lo.

（平果市 Veiz Dayaj/韦大雅）

5

Giz Yenz hongznaeuz:“Gou reh(dingq)gangj gvaq, ngamq fou- gyaeuj gvaq itdingh aeu baetbaet aenmauh, ngamq swiqndang gvaq itdingh aeu saeujsaeuj geubuh. Vih gijmaz hawj aenndang sawseuq bae uq gij rabnyap doemmoeg gwnzseiq ni? Gou ningznyienh diuqroengz ndaw Dahsienghgyangh bae, dai youq ndawdungx duz byadah. Vih gijmaz hawj aenhoenz cinghrang sawsag gou, deng gij doemmoeg gwnzseiq gyuj dawz ni?”

Goengdwkbya baez reh(dingq), saeuqyaeuz riu mbat ndeu, couh gaem gaiqcauh cauh aenruz bae lo. De ajbak eu fwen naeuz：“Garaemx Canghlang sawdikdik, ndaej aeu- daeuj saeg cagmauh gou; garaemx Canghlang hoemz raixcaix, ndaej aeudaeuj swiq bajga gou.” Riuriu bae gyae lo, mbouj caez Giz Yenz gangjvah nauq.

（隆安县 Liengz Cauzcieng/梁朝将）

6

Giz Yenz ceiq gyaez guek,

Buekmingh ce biengz riuz;

Gienq vuengzdaeq ndi ndiu,

Diuqroengz dah bae dai.

Song cien lai bi daeuj,

Duenngux raeuz suek faengx;

Bae henzdah dwkcuengq,

Muengh guen ndei dauq biengz.

Giz Yenz de dingqnaeuz,

Ngamq swiqgyaeuj cinghseuq;

Mbouj ndaej muengz daenj mauh,

Bongx faenx deuz caiq daenj.

Daegbied ngamq dajcaemx,

Ndang heizuq deuz cingh;

Yaek daenjbuh gyaeuh cingh,

Ndangnoh dingh ndi uq.

Bouxvunz raeuz okseiq,

Byawz ndi gyaez ndang cingh;

Deng mehndang haeusing,

Saeh rwix ciennienz cienz.

Gou nyienh guh vunzndei,

Hawj biengz geiq mingz riuz;

Gamj yiengq Sienghgyangh diuq,

Angq riu cangq dungxbya.

Byawz dawz ndang cingh neix,

Bae gyaz haeuj aepsaep;

Cog bae daengz ndawlaep,

Nyinzlaz gaeb diuqnengh.

Ngoenzneix da lij rongh,

Ngongz cix gauj fujbai;

Seng daeuj cienz ndi daiq,

Dai le byawz aemq bae.

Okseiq ndang gou cingh,

Bouxlawz ninz lajnyak;

Goeb da rwz ndaeng bak,

Cakdai leix guhmaz?

Canghdwkbya dingq le,

De gag riunyumnyum;

Gau cauhruz hwnjdin,

Swnh ciengq fwen danq naeuz:

“Sienghgyangh bou raemx saw,

Ndaej dawz swiq mauh ndeu;

Danghnaeuz bou raemx uq,

Ndaej guh raemx swiqdin.”

Canghdwkbya ciengq sat,

Mbat ciengj cauhruz bae;

Dajgangj caiq ndi ndaej,

Ciuh daez faengx Duenngux.

（都安瑶族自治县 Lanz Gozvuj/蓝国武）