It

“Siujgauh dungzci, gij raetrang mbanj Yauzcuz dou aeu bae cawj dang ceiq diemz, mwngz daj diegrog daeuj, aiq caengz ndaej gwn gvaq bw, daiq di baema cimzcimz yawj.” Mwh lingjdauj cienq ndang hwnj ci, boh’au Yauz- cuz laeglemx rag Siujgauh gvaq rieng ci bae, ndenq song gaen lai raetrang hawj de, doiq rwz daengq naeuz.

Mboengqneix, Siujgauh ciengzseiz gaen lingjdauj roengz lajmbanj Yauzcuz bae, cujyau dwg aeu caenh’itbouh doicaenh gij hong cungqdiemj saenqhwng lajmbanj, gyamaenh haigvangq gij cwngzgoj duetgungz gunggeng, doidoengh gij canjnieb lajmbanj hwngfat ndei saed. Gyoengqvunz ndwenngoenz gvaq ndaej ngoenz beij ngoenz ndei, mboujdan gwndaenj mbouj you, vanzlij yied daeuj yied fouqmiz, gyoengqde gyo’mbaiq dangj raeuz dangqmaz, engq gyo’mbaiq gyoengq dangjyenz ganbu itcig buet hwnj buet roengz caenhsim bangcoh, daiq gyoengq vunz lajmbanj baenzfouq, ndigah moix baez raen gyoengqde roengz mbanj daeuj guhhong, cungj siengj ceuj geij aen byaek ndei daeuj dakdaih, caemhcaiq siengj soengq di huqdoj gyo’mbaiq gyoengqde, neix dwg gij laex vunz lajmbanj doiqdaih bouxhek. Hoeng, lingjdauj hix dwg lwg nungzminz, rox vunz lajmbanj guhgwn mbouj yungzheih, mbaet gwn mbaet yungh hawj lwgnyez doeg saw engq dwgrengz, cungj gag daiq ringz, mbouj nyaenxsim lai mazfanz gyoengq beixnuengx, gij huqdoj engq dwg gij huq demsou nungzminz, engq mbouj ndaej sou. Ndigah, moix baez nyaengq sat le, lingjdauj couh coh Siujgauh caeuq bouxhaici yaepyaep da, eiqsei dwg heuh gyoengqde vaiq di hwnj ci baema.

Ngeih

Lwnhnaeuz Siujgauh dwg boux misuh henz ndang lingjdauj ndeu, de simdingh sijsaeq youh gaenxguh, de ciengzseiz riengz lingjdauj guh saeh, vahsug naeuz “raen lai cij gvai, guh lai cij rox.” De caeux couh lienh ndaej rwz swnh da raeh, mboujdan dawz ndaej sim lingjdauj, guhsaeh caeuq gangjvah hix gig habdangq. Gij hong lingjdauj ngoenznaengz youh lai youh cab, hoeng saeh gaenj saeh mbaeu de cungj gig vaiq couh anbaiz ndaej miz goek miz byai, gig noix loekcak, lingjdauj rox de guh gijmaz cungj habhoz, daj ndawsim haenh de dwg boux bangfwngz ak.

Lingjdauj gig yawjnaek seizgan, moix baez yaek hai hoih roxnaeuz camgya hozdung, mboujlwnh geijlai nyaengq, de cungj gvenq bae gonq cib faen cung daengz hoihciengz. Moix baez yaek daengz seizgan, de cungj gvenq yaengx gengoenh baihswix hwnj, nyeux gyaeuj bae yawj aen biuj ndaem gengoenh. Lingjdauj daiqdaeuz guh hong、haenqriengj、heiqciet giendingh sawj Siujgauh simfug raixcaix, caemh dawz de guh yienghndei geiqmaenh ndawsim.

Sam

Hoeng mboengqneix, Siujgauh cix laeg- lemx riengz lingjdauj youheiq hwnjdaeuj lo. Ngoenzhaenx, aen genjcazcuj baihgwnz couh yaek daeuj daengz genjcaz hong lo, Siujgauh raen lingjdauj iet fwngz swix hwnjdaeuj siengj yawj seizgan, hoeng mbouj raen aen biuj ndaem haenx, lingjdauj simnyap dwk najbyak nyaeuqnyatnyat hwnjdaeuj. Siujgauh cij fatyienh gaiq biuj ndaem de mbouj lumj doenghbaez nei gaep youq gwnz gengoenh baihswix lingjdauj, caemhcaiq lienzdaemh geij ngoenz “ra mbouj raen” dem. Lingjdauj aen dungcoz gvenq yawj biuj caeuq de naj nyaeuqnyat cix lumj diuz cag yawj mbouj raen ndeu nei mbouj dingz mbouj duenh yien dawz sim Siujgauh.

Siujgauh gag siengj: Swhgeij ngamq dayoz bizyez seizhaenx, gyoengq doengzhag bouxboux simhoengz guh saeh, cungj miz aen simmuengh hung ndeu, youq ndaw singz hung ra hong guh. Hoeng “roengz dah cij rox raemx laegfeuh”, hawsingz vunzcaiz lai ra hong hoj. Siujgauh vih caenhvaiq youq gwnz sevei ra dieg ndwn maenh, de couh caeuq gyoengq doengzhag doxbiek dangq boux dangq bae ra hong lo. De genj aen yienhsingz liz soujfuj mbouj gyae lai, youh miz gak minzcuz doxcomz caezyouq neix, gauj ndaej aen ganghvei vwnzmi danhvei neix.

Ngamq daengz dieg neix, Siujgauh cij rox diegdieg mbouj sug, vunzvunz mbouj rox, gvaq ndwenngoenz、guhhong cungj mbouj miz baengh caen mbouj yinx. Mbouj geij nanz, gij yiedcingz siengj haenqrengz bae “roemx” haenx, cugciemh deng gij hong fanzcab youh mbouj yinx haenx dumhmued lo, caemhcaiq siengj vut hong baema dem.

Lingjdauj yawj de yienghneix, simgip dangqmaz, de couh lumj daeggo nei doq gvansim de, mboujlwnh dwg guhhong roxnaeuz gvaq ndwenngoenz cungj daegbied ciuqgoq de, lij dinghsim rox de dwg gaiq “caizliuh cauh ndaej” ndeu. Yienghneix itloh gujli caeuq beizyangj de, de hix mbouj caiq doeknaiq, roengzrengz buekguh baenaj. Geij bi seizgan gvaqbae, de youq ndaw danhvei couh sug hangz sug loh, caemhcaiq baenz boux misuh lingjdauj ceiq daekeiq ndeu……Aencingz neix, Siujgauh itcig mbouj rox baenzlawz bauqdap cij ndei.

Seiq

Seizneix dauqdaej miz aen gihvei ndeu lo. “Deng, couh yienghneix guh!” Bingzseiz, fanzdwg gij saeh gvendaengz lingjdauj, Siujgauh cungj gienhgienh caeuq lingjdauj naeuz, mbouj gamj luenh guh. Hoeng, gienh saeh neix de gingqyienz gag guhcawj, caemhcaiq gig byoengqbyat dem.

Ngoenz daihngeih, Siujgauh yawj aen hablaex iq gyaeundei haenx, youh youheiq lo. Ciuq leix gangj, aen laex iq neix mbouj dij gijmaz ngaenz, aeu daeuj guh laex soengq hawj daegbeix bonjfaenh gingqgyaez haenx hix dwg cingzleix ndei……Hoeng, baenzlawz banh cij guh ndaej habdangq ni? Lingjdauj dangjsing giengz, yienghyiengh yiemzhaed bonjfaenh, fwngzseuq sohcingq. De youq ndaw danhvei ciengzseiz naeuz: Gyoengq dangjyenz、ganbu bouxboux aeu daj bonjfaenh guh ndei, mbouj ndaej dam’aeu bienzngeiz, engq mbouj ndaej aeu saek fag cim geu mae ginzcung, danghnaeuz miz byawz famh, dingh aeu yiemzfad!

Dingjlingz ngoenzhaenx roengz mbanj ma daengz buenq loh, Siujgauh laeglemx liuq da yawj lingjdauj mbat ndeu, cij raen de cingq ing youq gwnz eij laep da yietnaiq. Siujgauh couh gaem maenh daeh raetrang, ndaw sim sikhaek miz cawjeiq lo.

Ngoenzlaeng, de laeglemx cuengq aen- daeh haeuj ndaw doengjdaiz dieg lingjdauj naengh banhgoeng bae, cij lumj vaiz duet ek nei doq ciengq go, doq yamqdin vaiqriengj coh bangunghsiz swhgeij.

Haj

Siengj mbouj daengz, ngoenzhaenx Siuj- gauh aenvih ok rog guh hong, baema couh baenz bingh lo, de cijndei cingjgyaj bae aeu yw, yietnaiq geij ngoenz.

Ngoenz daihngeih banringzgvaq le, yienznaeuz de lij miz di ndang nyieg, hoeng hix cengj hwnjdaeuj caenh cwzyin dawz faenh caizliuh baujmiz haenx guh hawj lingjdauj. Mbouj geij nanz, de couh ciep ndaej aen denva heuh de roengz laeuz bae aeu vaiqsoengq.

Vaiqsoengq ciemsou le, “docih” song cih neix daj ndaw goujcau “sueng baujyiemj” haenx caenx okdaeuj, miz di ngeizvaeg. Aen vaiqsoengq neix gig caem, hoeng mboengqneix Siujgauh mbouj youq gwnz vangj cawx saek yiengh doxgaiq, vihmaz sou ndaej aen vaiq- soengq neix ni?

Siujgauh haeuj ranz naengh roengz sahfaz le, geizheih dwk daet baengzgyauh aen vaiqsoengq bae, siujsim hai aen bak hab okdaeuj. Sawqmwh miz gij heiqrang mak- bingzgoj ndonj haeuj ndaeng daeuj. Ndawde lij miz geij hab yw dem, henz de dwg daeh raetrang, aen hab soujbiuj caengz hai fung hix cuengq youq ndawde. Gwnzde lij miz mbaw saenq ndeu, gij bitcik gig sugnaj:“Soujbiuj daeggo gaenq coih ndei, muengh daegnuengx ndangdaej vaiq di coekcangq!”

Aen vaiqsoengq gag daeuj neix sawj Siujgauh sim diuqbubbub, fanfoek mbouj dingz: Aenvih binghraq, de gaenq sam bi mbouj ndaej baema lo, baez haenx de fatbingh seiz, binghyiengh ceiq naek, gyoengqvunz cungj gag goq mbouj gib, daeggo neix ndangdaej ndei mboujdan mbouj baenz bingh, vanzlij mbouj lau maz daeuj ciuqgoq de……

Siujgauh nyaenx mbouj ndaej mbouj dingz lumh aen dangjyenz veihcangh gwnz daiz, aen dangjyenz veihcangh neix ndwengonq lingdauj ngamq dawz hawj de, mwhneix dik raemxda ciuq dwk de engq ronghsien lo. Gwnz daiz song goginhswjlanz doxdoiq hai dwk, yiengh lumj aensim nei, gyoengqde doxcoengh dawzneuz, youq laj ndit engqgya ronghsagsag.