Lij iq lauxboh gou sinhoj,

Ngoenz goq bin bya faeg fwnz gai;

Aemq ndaundeiq bae dauq dak raiz,

Lauxboh gai fwnz ciengx gyaranz.

Gai fwnz hawj gou bae doeg saw,

Gai fwnz hawj gou cawx buh daenj;

Caek hanh mehdin bouxlawz raen,

Lauxboh aencingz lwg gaej lumz.

Boh gou bwz laep bae Gujsanh,

Gyu nyanh naekgez rap hwnj geuq;

Bueng vunz guhdoih hanz domxneuz,

Baedauq neuznenh ranz ngamq rongh.

Nanznaih hwnj haw bae gai cawx,

Cietheiq cawx ndaej noh rangh ndok;

Lwg gwn noh le boh henx ndok,

Ndomq ok sim boh ndangq lumj rin.

Boh gou gyangngoenz guh suijli,

Yietnaiq saekyaep lij doq daengq;

Soek faex dauq ranz doq congzdaengq,

Dozcienz ma ciengx daengx gyaranz.

Byasang ndoilingq roen byaij hoj,

Miz bya moj hoengq mbwn mbouj bingz;

Ganbu ginzcung haenqrengz dingj,

Raemxmboq yinx daeuj sawsiengqsiengq.

Lajmbanj lengj dwk raemxdah saw,

Raemxmboq sawsiengq diemz youh van;

Neix dwg aencingz gungcanjdangj,

Gaijsan（gaijndei） minzswngh daeuj duet- gungz.

Seizneix miz gwn youh miz daenj,

Hojsik boh gou dawz bak caeux;

Yaek bae hauqswnh ndwi dieg naeuz,

Boh raeuz aencingz lwg gaej lumz.