Ngeihcib bi gaxgonq, daegnuengx daj swhfan hagdangz bizyez le, de couh angqvauvau bae Lungzdung Siujyoz bauqdaengz, de nyinhnaeuz dwg giz deihfueng ndei ndeu. Hoeng gvaq song ngoenz de couh dauqma lo, duixdwddwd youq ndaw ranz. Gou cam de haujlai baez, daegnuengx cij mbot ok coenz vah ndeu naeuz: Dieg haenx mbouj baenz vunz youq!

Ngoenz ndeu, daegnuengx youh bae hagdangz lo, dwg daxboh dawz faexbien gyaep de deuz song leix gyae. Daxboh itcig ndaq:“Baenzlawz dieg haenx mbouj baenz vunz youq? Cijaeu miz vunz youq, mwngz couh youq ndaej, duzdoq lwg mwngz, danghnaeuz caiq seizbienh buet dauqma, gou yaek dub raek ga mwngz bae!”

Yienghneix, gou couh mbouj ciengzseiz raen daegnuengx, dan gek duenh seizgan ndeu sou ndaej gij saenq daegnuengx. Daegnuengx youq ndaw saenq naeuz:“Giz deihfueng neix lienz duzdoq cungj mbouj ok haex, mbouj miz dienh, mbouj miz raemx, danghnaeuz ingj denyingj bingcaeg haeuj mbanj daeuj, gizneix ceiq habngamj.” Daxboh dingq gou doeg saenq, hw sing ndeu naeuz:“Cungj dwg ma okroet!”

Doeklaeng, daegnuengx youh fak saenq daeuj lo, ndaw saenq naeuz: Gou ciengzseiz ndaej gwn noh gyoengq beixnuengx soengq daeuj, gij noh hoengzhau hoengzhau, aenvih gij lwgnyez gyoengqde rox nyinhsaw lo.Cungj noh haenx gig ndeigwn, gou gwn ndaej gig lai. Doeklaeng, cij rox haenx dwg nohnou、 nohngwz, gou rueg yaek dai. Gou doeg saenq liux riuriu, daxboh dauqfanj najhawq naeuz:“Gij noh haenx gou hix gwn gvaq, feihdauh gig ndei!” Gou cam bi lawz gwn, daxboh naeuz dwg sam bi caivueng seizgeiz.

Caiq doeklaeng, gou sou ndaej aen bauhgoj ndeu, hai le baez yawj, neix dwg geu buhmbangjmbaek naengsiu ndeu, daxboh lumhlumh, hwk naeuz: “Dwg naeng duz nouhenj, neix gig dijbauj!” Daegnuengx youq ndaw saenq sij le geij coenz vah: “Neix dwg vunzmbanj soengq hawj gou, gou siengj daengz daxboh gaenq geq lo, couh cienj soengq hawj daxboh ba!” Daxboh mo liux youh mo geu buh, naeuz:“Geiq baema!” Gou dawz bitceij okdaeuj, naeuz:“Sij fung saenq hawj de ba!” Daxboh maeuq youq bakdou amqhunghung cit ien, amq dem amq, daengz byonghhwnz, daxboh cij nguhnyednyed ok coenz ndeu naeuz:“Gaej luenh niemh ndaw- ranz!”

Geu buhmbangjmbaek naengsiu haenx, daegnuengx doeklaeng gai lo, gai ndaej cienz bae cawx faenjbit、gyaugi daengj doenghyiengh. Ndaw saenq lij naeuz: Mwh mboujmiz faenj- bit, couh aeu baengzuet yub raemx, sij youq gwnz hwzbanj, raemx baez hawq, aen saw couh siusaet lo, neix dauqfanj daezsang le gij suzdu gyoengq lwgnyez rox saw, youq daengx yangh doxdax, aen hagdangz gou ndaej mingz daih’it! Daegnuengx geiq dauq mbaw ciengj he, daxboh cix yawj le youh yawj, naeuz:“Diep ndei, gizlawz yienhda diep gizlawz!”

Gij saeh daegnuengx naeuz mboujmiz faenjbit, hawj gou doeksaet, gou guhcaeg sij saenq bae cam.Daegnuengx hoiz saenq naeuz: “Bouh denyingj《Mbouj Ndaej Noix Saek Boux》youz Cangh Yimouz daujyenj mwngz yawj gvaq ba? Ndaw ban Vunz Siujvei lauxsae miz boux hagseng ndeu buet bae dajgoeng, de bae ra, mboujdanh ra ndaej hagseng le, lij ra dauq ci doxgaiq hagsib yungh ndeu. Gou ne? Hagseng gou siengj noix boux ndeu cungj noix mbouj ndaej! Aenvih, gyoengq beixnuengx ndawmbanj couhsuenq baeg dai iek, hix mbouj nyienh hawj gyoengq lwg mbouj hag!”

Gvaqlaeng daegnuengx sij saenq dauqranz, de cungj noix gangj gij saehcingz bonjfaenh, naeuz gij hag- seng de couh ciemhciemh lai hwnj- daeuj, cienzbouh dwg gij coh hagseng de byawz baiz youq doekgonq lo, byawz gauj ndaej gig ndei, byawz bae ndaw yangh、ndaw si doxdax ndaej ciengj lo, daengjdaengj. Gou sing sang doeg saenq, daxboh youq henz dingq couh itcig ngaek gyaeuj. Gou doeg saenq caez lo, daxboh lij ngaek gyaeuj: “Mbouj dwg vunzbou, mbouj dwg vunzbou ha……”

Gou sikhaek fak saenq bae hawj daegnuengx naeuz daxboh haenh de, daegnuengx gvaqlaeng hoiz naeuz, de daej lo.

Gvaq cieng seiz, daegnuengx mbouj dauq. Daxboh dawz daeng- loengz youq gyaeuj mbanj ndwn caj daegnuengx daengz byonghhwnz, daegnuengx lij caengz dauqma.

Ndwencieng caengz gvaq liux, daxboh couh dingj mbouj ndaej lo, de lumj bae roemx geuq nei, ndang raek rim doxgaiq hwnjdin bae ra lwg iq de lo.

Daxboh gvaqlaeng daej dauqma. Daxboh raemxda roengzyagyag yawj gou naeuz:“Mwngz rox lwi? Daeg- nuengx mwngz mbouj dauqma, dwg sij mbouj ndaej yungh geij cib maenz feici, mwngz rox lwi?” Daxboh naeuz de youq ndaw bya baenqcienq ra daegnuengx, gig mbouj yungzheih bungz deng boux vunz ndeu, daxboh byaij hwnjbae cam: Beixnuengx, cam baez roen ndeu……Boux haenx baez nyeux gyaeuj:“Aeya—dwg dax- boh!”

Seizneix, daxboh itcig nyapheiq cienq baebae dauqdauq. Gou cam: “Baenzlawz la?”

Daxdoh naeuz:“Dieg haenx mbouj baenz dieg vunz youq o!”

Daxboh naeuz gou hoizsaenq hawj daegnuengx, heuh daegnuengx dauqma, ndaw saenq naeuz:“Mwngz mbouj yungh son saw lo, dauq gaen daxboh youq ndaw bungz hung ndaem gij byaek fanj geiqciet, ra cienz ndaej lai gvaq!”

Daegnuengx gig vaiq hoizsaenq lo, naeuz: “Gou gietdingh lo, mbouj dauqbae!” Daegnuengx lij youq ndaw saenq naeuz: “Seizcin daeuj lo, haujlai va cungj hai lo, gyoengq hagseng hwnj bya bae aeu va, mbouj dwg rag goenq, cix dwg lienz rag namh vat dauq, ndaem youq rog gyausiz, miz haujlai rwi doq daeuj aeu va, gig gyaeu- ndei……”

Daxboh dingq gou doeg saenq liux, raemxda lae’byoegbyoeg.