（ciep geiz gonq）

Mbouj rox daj seizlawz hwnj, mehyah Yenzhaij yinx guhdoj, ngoenznaengz gueng daeglwg gwn imq le, couh vut hawj bohmeh Yenzhaij guenj, bae guhdoj faenh de lo.

Ngamq bae guhdoj seiz, mehyah Yenzhaij hingz di cienz, de angq raixcaix, sim naemj: Gaxgonq baenzlawz mbouj naemj guh gij hongmbaeu hongsoeng neix ne? Mbouj yungh bae ndaw reih ngaemgyaeuj guhhong dak ndit rwed fwn, mbouj lae saek ndik hanh couh miz cienz haeuj daeh, ciuhneix baenzneix guh roengzbae, cungj miz saek ngoenz fatcaiz. Mehyah gwq naemj gwq gag riu.

Mehyah mbouj goq hongranz, ngoenzngoenz bae guhdoj, Yenzhaij doiq de naeuz:“Vah naeuz cib boux guhdoj, gouj boux saw, raeuz aeu guh hongranz ciengx lwgnyez cij baenz.”

“Gou doj hingz ndaej cienz mbouj dwg haemhhaemh riuj noh riuj byaek dauqranz ha? Mwngz gwn roengz dungx lumz cingz vunz lo.” Mehyah haennaj naeuz.

Mehyah ngoenznaengz okbae, cigdaengz mbwnfuemx cij haeuj- ranz, dauq hix raen de haemhhaemh riuj di byaek noh dauq, vunz cungj laihnaeuz de caen ngoenzngoenz doj hingz cienz ne.

Laxlawz, boux dojdaeuz vih ciuyinx gyoengqvunz ngoenzngoenz daeuj guhdoj, mboujlwnh saw hingz, daengz lajbyonghngoenz le, couh fat boux ngeih samcib maenz ngaenz hawj gyoengq bouxdoj guh ngaenz byaek. Gyoengq bouxdoj ndaej di cienz neix, ngoenzlaeng youh angq- fwngfwng laebdaeb bae guhdoj.

Guhdoj diuz loh neix byaij mbouj ndaej, Yenzhaij moix baez naeuz mehyah, mehyah gig hozhwnj, baenqndang youh okdou bae lo.

Ngoenz he, Yenzhaij cingq youq ndaw cinjsoj nyaengqfoedfoed, sawqmwh miz geij ndaek bouxsai byaij haeujdaeuj. Ndaek bouxsai ndangdaej sanghung he naeuz Yenzhaij:“Mehyah mwngz ciq dou aeu ngaenz bae guhdoj, seizlawz ndaej boiz?”

Laxlawz, mehyah yied doj yied saw, gij cienz ndaw ranz cungj hawj de saengq liux lo. Mehyah siengj doj hingz ngaenzgoek ma, couh muenz Yenzhaij bae gwnzhaw ciq ngaenz vunz. Gyawz rox doeklaeng gij ngaenz haenx hix doj saw liux lo, leih gyonj leih, yiemq vunz bit ngaenz ndeu.

Mehyah doiq Yenzhaij naeuz：“Mwngz bang gou boiz ngaenz hawj vunz, mboujnex couh doxliz.”

Daeglwg lij iq, mbouj ndaej mbouj miz daxmeh, Yenzhaij mbouj siengj caeuq mehyah doxliz. Aen cinjsoj neix cijdwg swnjcienz bonj- saeh daxgoeng, mbouj miz geijlai cienz haeuj daeh. Mizseiz bungz- daengz doengh boux ndaw ranz gungzhoj, Yenzhaij cungj mbouj sou cienz, seizneix bae gyawz aeu cienz boiz vunz ne？

Caet

Ngoenz he, miz song beix- nuengx daeujdaengz ndaw cinjsoj Yenzhaij. Daegnuengx gwih cimoz- doz laemx deng gaiq ga’gvaz raek bae lo, daeggo soengq de daeuj yw.

Yenzhaij yawj gij ndangdaenj song boux, couh rox ndaw ranz saedceij gvaq ndaej mbouj loek. Naemj daengz mehyah guhdoj iemq cienz vunz, ndawsim de sawqmwh miz aen naemjfap he mauh okdaeuj.

Daeggo bouxsieng doiq Yenz- haij naeuz: “Dou bonjlaiz siengj bae yihyen yw, dingqnaeuz mwngz dwg daeglan canghyw ak Goengmumh, yw ndok raek gig ak, dou couh ganj daeuj doh mwngz gizneix.”

Hawj daegmbauq haenx ciep ndok seiz, Yenzhaij lawq yaep he, fwngz loq mizdi saenz, de daeg- daengq mbouj dawz giz ndokraek ciep daengz vih.

Yenzhaij yienghneix guh, dwg hawj daegmbauq youq de gizneix yw nanz di, lai ndaej di cienz boizcaiq.

Ndwen ndeu gvaqbae lo, daeg- mbauq roxnyinh ga’gvaz gizsieng haenx lij gig in, couh bae yih- yen ingjsiengq, yawjyawj gizsieng baenzlawz yiengh lo.

Canghyw naeuz:“Gij ndok raek ciep mbouj daengz dieg, seizneix noh moq maj okdaeuj lo, mbouj gibseiz coih cingq, nanz bienq ndei.”

Daegmbauq dingq canghyw baenzneix gangj le, mizdi yousim. Madaengz cinjsoj le, daegmbauq couh dawz gijneix lwnh hawj Yenzhaij nyi.

Yenzhaij dingq le, ndaw sim baez daenh, naeuz:“Gijneix aeu menhmenh yw, mbouj ndaej gip, gou ngoenzngoenz hawj mwngz nyaenj coih, lai roengz di yw, mbouj nanz couh ndei lo.”

Mbouj nanz, daegmbauq youh bae yihyen ingjsiengq gizsieng. Canghyw naeuz:“Baezgonq naeuz mwngz mbouj dingq, seizneix giz ndokraek gaenq dingh roengzdaeuj lo, nanz yw ndei lo.”

Mbatneix, daegmbauq nyengh lo, de hix mbouj rox swhgeij baenzlawz byaij ok yihyen.

Daegmbauq dauq ra Yenzhaij naeuz baenzneix baenzneix. Yenz- haij gangj mbouj ok vah, muengh dwk gwnzciengz mbaw siengq daxgoeng, raemxda gwq doek.

Daegmbauq gauq Yenzhaij lo, Yenzhaij deng boiz bit cienz hung ndeu. Mehyah hix caeuq Yenzhaij doxliz.

Bet

Susu baih neix, de gangj ndaej caemh guh ndaej, gyoengqvunz deng ndok raek cungj daeuj de gizneix yw.

Ngoenzhaenx banringz, meh- mbwk cungnienz he cung haeuj ndaw cinjsoj Susu daeuj, baez raen Susu couh daejfwtfwt naeuz:“Ranz gou youq ndaw rungh. Bouxgvan gou hwnj bya raemjfaex, deng faex laemx roengzdaeuj gen ga cungj raek bae lo. Ndaw rungh ngamq miz dou ranz ndeu, lwgnyez hix bae dajgoeng lo, mbouj miz vunz ram bouxgvan gou okdaeuj, gou daeuj cingj mwngz gaen gou bae yawjyawj.”

Bingzseiz cungj dwg bouxbingh bouxsieng daeuj ra Susu, loeklak hix miz vunz cingj de bae ranz ywbingh. Hoeng caengz miz vunz cingj de haeuj ndaw rungh bae gvaq. Seizneix mingh vunz youqgaenj, Susu mbouj lawq saekdi, couh gaen mehmbwk haenx bae lo.

Lohbya gumzgamx hoj byaij, lingqlanglang lumj benz hwnj bangxciengz nei, baihlaj dwg dat laeglumlum, muengh roengzbae hawj vunz ndang saenz. Susu siujsim riri, hanh roenx rim ndang, haujlai nanz cij daengz ranz mehmbwk haenx.

Susu sijsaeq cazyawj gizsieng bouxsai, gaiq gen he caeuq gaiq ga he cungj raek bae lo, miz lwed iemq okdaeuj. Laengmbaq bouxsai hix deng sieng, diuz ndok he doed okdaeuj, in ndaej de saeknaj bienq liux, gyangzrwdrwd.

Susu youq laenghwet bouxsai lumh yaep he, roxnyinh diuz ndok neix dwg duet hoh, mbouj deng raek. De aeu fwngz youq laengmbaq bouxsai haenx yunghrengz baez nyaenj, diuz ndok doed okdaeuj haenx couh coih ndei lo.

Ciep dwk, Susu youh coih ndei gaiq garaek caeuq gaiq genraek bouxsai.

Mehmbwk haenx naeuz:“Dah- sau, docih mwngz lo, hoeng, hoeng…… dou……”

Mehmbwk haenx gangjvah gaz- gwd, lwgda mbouj gamj yawj coh Susu.

“Daxsauj, mwngz cuengqsim, gou moix ngoenz lij aeu cazyawj gizsieng bouxgvan mwngz, ciemh- ciemh couh ndei lo.” Susu naeuz.

“Dwg yienghneix, dou ndaw ranz seizneix mbouj miz baenzlai cienz, ndaej di hawj mwngz gonq, gvaqlaeng caiq bouj hawj sat.” Mehmbwk haenx sing daemq naeuz.

“Ranz sou haemq gungz, gij cienzyw gou faen he cungj mbouj aeu.” Susu riu naeuz.

Mehmbwk haenx cengq hung lwgda muengh coh Susu, gig doeksaet, ndaw da miz raemxda yapmyabmyab.

Susu ngoenzngoenz byaij loh- bya bae hawj bouxsai haenx cazyawj gizsieng, oep yw vuenh yw. Ndwen lai gvaqbae, gen ga bouxsai haenx ciemhciemh doengh ndaej di lo, Susu cix bienq ndaej youh byom youh ndaem.

Bingh neix bingh haenx, aen cinjsoj Susu mbouj ndaej mbouj ngoenzngoenz haidou, geijlai sinhoj hix aeu guh. Miz haet he, Susu gyae’gyae couh muengh raen boux vunz he yiengq de mbiengj neix byaij daeuj. Caj boux haenx byaij gyawj le, Susu cij rox dwg mehmaiq Simjit ndawmbanj.

Simjit song fwngz do dawz aen hangz, aen bak aj gvangq, raemx- myaiz rih okdaeuj.

Susu baez yawj, aen hangz Simjit duet okdaeuj lo, hwkgwnz caeuq hwklaj doxliz lo. Susu fuz Simjit naengh ndei, song fwngz riengjret baez doengh, aen hangz Simjit couh dauqma daengz dieg lo. Simjit faj fwngz doq mbon daehbuh doq cam Susu, “Deng geij lai ngaenz ne?”

Susu vadfwngz riu naeuz:“Gij bingh’iq neix mbouj aeu ngaenz lo.”

Laxlawz, haetneix hwnjdaeuj, Simjit ndwn youq ndaw gyanghongh raurumz, mbouj rox vihmaz, aen bak de hwkgwnz caeuq hwklaj doxliz lo, haepbak gangjvah cungj mbouj ndaej, cijndei daeuj ra Susu.

Lumjbaenz vunzmbanj byaij loh mbouj siujsim daemjndoet deng din goenx la, lwgnyez guhcaemz deng di naengnoh lotsieng la, roxnaeuz gyaeujngunh daraiz la, doengh gij sieng iq bingh iq neix, Susu bang yw ndwi, cungj mbouj aeu cienz.

Cwngfuj youq gwnzhaw hai aen yihyen cienmonz yw ndokraek he. Yencangj mbouj rox daj gyawz ndaej rox Susu dwg boux canghyw yw ndokraek gig ak he, couh cingj Susu bae yihyen guhhong. Susu doiq yencangj naeuz:“Daegnuengx gou Yenzhaij caemh sug monz hong neix, maqmuengh de ndaej caemh gou caez bae.”

Yencangj itsim gouz vunzcaiz, couh dapwngq lo, gvaqlaeng Susu caeuq Yenzhaij song cejnuengx neix, ngoenzngoenz itheij bae yihyen hwnjban, laebdaeb hawj vunz ywbingh ywsieng.（sat）