It

Gou ngamq roxyiuj di seiz, raen gvaq Goengmumh.

Goengmumh ndangdaej sang- hung, saeknoh ndaemhoengz, doiq lwgda youh hung youh rongh, gwnznaj maj rim mumhgeuzvaiz. Aenvih gwnznaj miz mumh lai, gyoengqvunz cungj heuh de guh Goengmumh.

Goengmumh dwg goengsae goengmo, mbanj lawz ranz lawz miz begsaeh cungj cingj de, de couh daiq bang goengdauh he bae guhdauh.

Gij ranz saenq saenz saenq fangz haenx, bae mbanj cam yahsien le, naeuz ndaw ranz miz doxgaiq uq, cungj heuh Goengmumh bae gyaep fangz.

Cienznaeuz gij vunz bae ndaw bya guhhong mbwnlaep mbouj raen dauqranz, naeuz dwg deng fangzdoz, hix cingj Goengmumh bae ra. Goengmumh baez hat geij sing, rongx geij mbat le, duzfangz couh cuengq boux vunz haenx okdaeuj lo. Gijneix cungj dwg dingq bouxlaux gangj, mbouj rox dwg caen dwg gyaj,cigdaengz seizneix hix mbouj nyi byawz raen gvaq duzfangz maj baenzlawz yiengh.

Goengmumh guhdauh gyaep- fangz lumj gangjgoj, mbouj suenq citgeiz, hawj vunz ceiq boiqfug couh dwg de dwg dieg dou boux canghywjdoj haemq ak ndeu.

Daxboh Goengmumh dwg canghywdoj, daxgoeng Goengmumh hix dwg canghywdoj. Goengmumh mboujdanh rox aeu ywdoj yw gij bingh wnq, lij yw ndaej gen in ga raek gij bingh sieng neix dem.

Mwh vunzwnq deng gen raek ga goenq daeuj ra Goengmumh, de aeu fwngz lumhlumh gizsieng gonq, sawqmwh singhung doiq bouxsieng naeuz:“Mwngz yawjyawj gizhaenx dwg maz?”

Bouxsieng mbouj rox maz saeh, baenqgyaeuj yiengq gizde muengh bae. Couh baez yaepda neix, Goengmumh gaemdawz gizsieng, yungh rengz nyaenj song sam mbat, cij dingqnyi bouxsieng “aiya” swenj sing ndeu, giz ndok raek gaenq deng Goengmumh ciep ndei lo.

Goengmumh rox bouxsieng lau in youh gaenjcieng, ciep ndok gaxgonq, de cungj dwg yienghneix caeuq bouxsieng gangj gij vah fouzgven, yienzhaeuh swnh boux- sieng mbouj haeujsim seiz, couh roengzfwngz lo.

Ngeih

Mehyah Goengmumh dai ndaej caeux, vut roengz song dah lwg Dahdaih caeuq Dahngeih. Goeng- mumh bingzseiz cawz le youq ranz coengh vunz yawjbingh, yw gen ga raek, mizseiz hix bae mbanj guhdauh guhmo, sinhoj ciengx song dah lwg majhung.

Song dah lwg daengz nienzgeij baenzgya, Goengmumh lau songde haq bae ranzvunz dang lwgbawx gwnheiq sinhoj, couh naemj ciu lwggwiz daeuj hwnjranz.

Ciu lwggwiz dwg gienh saeh haemq sinhoj he, mbangj bouxsai nyienh ciuhvunz aeu mbouj ndaej yah cungj mbouj nyienh bae guh lwggwiz hwnjranz, gyoengqde naemj: Bae guh lwggwiz vunz, couh lumj lwgsau bae ranzvunz guh lwgbawx nei, ndei cij dwg, mbouj ndei sinhoj doh ndwenngoenz. Caiq naeuz bae ranzvunz guh hongranz mbouj baenzgwn, hix deng vunz yawjsiuj ne.

Bouxsai mbiengj haenx baenz- neix naemj, lwgsau mbiengj neix hix yienghneix naemj: Vah naeuz aeu bawx yawj mehdaiq, haq vunz yawj goengbuz, miz bohmeh yienghlawz, couh miz lwgnyez yienghlawz. Ciu lwggwiz caemh doxdoengz, cawz le yawj bohmeh de baenzlawz yiengh, lij aeu yawj de bonjfaenh baenzlawz yiengh, beizheiq ndei roxnaeuz yak, rox mbouj rox dauhleix? Lij aeu hauqswnh bouxlaux, aeu gaenxguh, yienghneix hongranz cij guh ndaej baenz.

Ndaw rungh lohrin byaij hoj, mbouj miz dahsau nyienh haq daeuj, haujlai lwgsai cungj aeu mbouj ndaej yah. Youq ndaw rungh lauq gvaq ciuhvunz, mboujyawx bae baihrog guh lwggwiz hwnjranz. Ndigah ndaw rungh gij ranz miz lwgsai haenx, cungj nyienh daeglwg cihgeij bae baihrog hwnjranz, naeuz couh dangq dwg senj dieg, vih swhlwg daihlan naemj.

Vah gangj yungzheih, guh hwnjdaeuj cix nanz, song dah lwg yaek ndaej samcib bi seiz, couh miz song daeg mbauq ndaw rungh nyienh daeuj ranz Goengmumh. Song daeg mbauq neix yiengh ndei beizheiq caemh ndei, youh gaenxguh, Dahdaih Dahngeih rim- hoz, Goengmumh hix rimhoz.

Sam

Dahdaih seng miz sam dah lwg, Dahngeih seng miz sam daeg lwg. Lansai lanmbwk cungj miz, Goeng- mumh ndaw sim diemzswdswd.

Ndaw ranz miz baenzlai lan iq, Goengmumh mbouj caiq bae mbanj guhdauh guhmo lo, ngoenznaengz youq ranz guenj lan iq caeuq hawj ywbingh yw ndok raek vunz.

Ndwenngoenz baenaj, gyoengq lan ciemhciemh majhung, Goeng- mumh hix geq lo. Goengmumh heuh song dah lwg song ranz vunz daeuj doxyaeng naeuz: “Gou geq lo, yw ndok raek cungj bonjsaeh neix mbouj ndaej saet, aeu laebdaeb swnjcienz roengzbae. Raeuz dang boux canghyw, dwg gouq bouxsieng bouxbingh, hawj vunz duet ek duet nanh, bouxwnq baenz ndei, raeuz caemh roxnyinh vaiqvued.”

Dahdaih naeuz:“Dou geq lo, couh yawj bang lwgnyez neix lo.”

“Sou lwgnyez dwg aen daeng- ngoenz gyanghaet ngamq hwnj, daengzcog couh baengh sou bae buek lo.” Dahngeih naeuz.

Song boux lwggwiz mbouj guh- sing, youzcaih gyoengqde lwnh- saengsaeng.

Dingq daxgoeng caeuq daxmeh baenzneix naeuz, song ranz vunz roek boux lwgnyez cungj caemrwg lo, bouxboux ngaemgyaeuj naemj- saeh.

Gvaq yaep ndeu, Susu byaij bae coh daxgoeng, naeuz:“Dax- goeng, gou dwg dahlan laux mwngz, gou aeu swnjcienz cungj bonjsaeh mwngz.”

Susu dwg dahlwg hung Dah- daih, bineix ngamq daj veiyau bizyez.

Goengmumh muengh coh Susu, riunyumnyum, ngaekngaek gyaeuj.

Seizneix, Yenzhaij hix byaij bae coh daxgoeng, naeuz:“Dax- goeng, gou hix gaen mwngz hag cungj bonjsaeh neix .”

Yenzhaij dwg daeglwg hung Dahngeih, nuengx Susu bi he, bineix gauhgauj doekbuengj le, ngamq dauqranz mbouj nanz.

Goengmumh raen song laeq lan baenzneix mizsim gaen swhgeij hag bonjsaeh, angq raixcaix.

Seiq

Daj neix hwnj, Goengmumh mienh hawj vunz ywbingh ciep ndok raek, mienh yunghsim son’gyauq song laeq lan.

Susu hai aen cinjsoj he, Yenzhaij hix hai aen cinjsoj he, song boux lumj daxgoeng nei, hawj vunz yw di gyaeujngunh daraiz, hix hawj vunz ciep ndok raek, ciep ndaej youh vaiq youh cinj, aen sim Goengmumh onj lo.

Youq dangdieg, Susu caeuq Yenzhaij ciemh miz mingzdaeuz, haujlai bouxbingh bouxsieng gag ra daeuj, ndaw mwnzcinj boux haeuj boux ok ndaetfoedfoed.

Goengmumh naeuz:“Sou song laeq lan guh baenz yiengh lo, danghnaeuz ngoenzlawz gou laepda bae, hix ansim lo .”

Ngoenz ndeu banringz, Goeng- mumh sawqmwh roxnyinh gyaeuj- ngunh daraiz, song da laepmok, daengx ndang unqnumnum, de ganjmuengz bin hwnj mbonq bae ninz.

Banhaemh yaek gwncaeuz seiz, Susu bae heuh daxgoeng gwncaeuz. Susu heuh geij sing, mbouj nyi daxgoeng han, haeuj ndawrug baez yawj, daxgoeng mbouj doengh saekdi ninz youq gwnz mbonq. Susu vuengmuengz aeu fwngz bae lumh faj fwngz daxgoeng, roxnyinh faj fwngz daxgoeng gyoetswdswd, de gip ndaej daej hwnjdaeuj. Daengx ranz vunz dingqnyi gij sing daej Susu, muengz ganj gvaqdaeuj, cij rox Goengmumh couh yienghneix bae lo, de bae ndaej caemrwgrwg, gwnznaj yienh ndaej gig andingh.

Haj

Ndwenngoenz ciemh bae, Susu caeuq Yenzhaij cungj daengz nienzgeij baenzgya lo, bohmeh coi ndaej gaenj. Susu naeuz:“Haujlai doxgaiq gou caengz hag rox, lij aeu nyinhcaen bae hag.”

Susu cawz le hag rox gij cihsiz daxgoeng cienz hawj de haenx, de lij cawx haujlai saw cunghyih ma gaghag, ywbingh yw ndok raek engq miz gingniemh lo.

Yenzhaij euq mbouj gvaq bohmeh, caeuq ndaw mbanj dah sau he doxaeu lo. Dahsau neix dwg lwgbyai, maj ndaej noh maeq ndang reux, bohmeh gyaezcungh, daengx- ngoenz youq ranz maz cungj mbouj guh.

Haq hawj Yenzhaij guh yah le, dahsau lij lumj youq ranzmeh nei, moix ngoenz ndit dak caekhaex cij hwnqmbonq. Cawj gwn le dahsau hix mbouj bae guh maz hong, mbouj dwg daengxngoenz yawj densi couh dwg bae haw youzlangh.

Raen lwgbawx baenzngoenz gikgyakgyak, bohmeh Yenzhaij hix mbouj ndei gangj maz, gag naemj: Seizneix lwgbawx lij nienzoiq, caengz roxyiuj geijlai, daengz miz lwgnyez bande le, couh gaenxguh lo.

Roek

Mbouj nanz, yah Yenzhaij couh seng daeg lwg ndeu, daengx ranz vunz angq raixcaix. Daeglwg loq hung di, yah Yenzhaij hix mbouj guh saekdi hong, mizseiz lienz cawj gwn cungj gik. Dan baengh aen cinjsoj Yenzhaij aeu cienz yungh, saedceij gvaq ndaej mizdi hoj.

（caengz sat）