（ciep geiz gonq）

Gohcangj: “Dwg mwngz gag naeuz nw.”

Gohcangj hai bonjgeiqloeg daeuj raiz naeuz: Ngoenzneix Daegmuz hwnjban seizgan bae ngonz duzdaek gaeb non.

Daegmuz:“Gohcangj, mbouj yienghneix raiz ndaej ma? Neix dwg daih’it bae, caiq- naeuz, da gou mbouj lizhai douhung saek- yaep. Ciuq Fuzwjmozswh gij lijlun buqanq de, duzdaekmax gaeb duzbib, roeglaej youq laeng.”

Gohcangj: “Gou raiz gij neix dwg mbouj dwg caen?”

Daegmuz: “Dwg.”

Hauhneix mwngz lij miz maz ndeigangj dem? Gohcangj geuhgen bae lo.

Ngoenz daihngeih banhaet, gohcangj daeuj dingj lingh bouxhendou hwnjban. Banringz, Daegmuz daeuj ciepban, de youq bonjgeiqloeg raiz naeuz: Ngoenzneix gohcangj daeuj dingj- ban, mbouj ngonz duzdaek gaeb non.

Gohcangj hozndat lo: “Mwngz baenzneix raiz, boizhaemz gou?”

Daegmuz: “Mbouj gamj? Nanzdauh mwngz hix ngonz?”

Gohcangj: “Gou mbouj lumj mwngz guh gij saeh lwgnyez haenx.”

Daegmuz: “Neix couh baenz lo.”

Gohcangj: “Ndei！ Daj ngoenzcog hwnj mwngz bae dieghong soujdou, gizde noix vunz, gizde duzdaek duznon cingq lai.”

Giz dieghong dwg dieghong guhranz, aenlaeuz cingq hwnj ndaej bet caengz. Aen diucehhung cingq baenqlulu guhhong. Gyoengq vunzhong boux nengh gik, boux laeb gik, boux nengh sahoi, boux gwed faex daengjdaengj, bouxboux nyaengqfofo.

Douhung dwg aeu faexbenj daep baenz, aen congz ndeu, song aen daengq, cungj dwg faexbenj guhbaenz, coyod, saedyungh. Aen denfunghcen ndeu daengj gwnznamh, swenj huhu.

Daegmuz naengh gwnz daengq, ngiengx- gyaeuj yawj coh dingjlaeuz, sim ngeix: Cograwz ndaej youq laeuzsang, yawj doh daengxsingz. Cihbak loh miz sairiu.

Aen ciiq ndeu hai haeuj, Daegmuz ndwn youq bakdou, fat mbaw gaj ndeu hawj de. Youh miz aen gajceh ndeu hai haeuj, Daegmuz fat mbaw gaj ndeu hawj de. Miz aen gajceh ndeu hai ok, Daegmuz sou mbawgaj dauq, bin hwnj ci bae yawj, mbouj raen miz maz, cuengq bae lo.

Haetneix, miz 30 lai boux minzgungh, miz bouxsai bouxmbwk, yaek roemx haeuj dieghong bae, ngaiz Daegmuz laengz dwk.

Daegmuz dawz gep baiz ndeu daeuj daengj: Dieghong haihong, vunzhoengq gaej haeuj!

Gyoengqvunz naeuz: Vunzhoengq? Dou mbouj dwg vunzhoengq. Dou daeuj aeu goengdauh. Gangj sat, couh yaek cung haeujbae. Daegmuz aj song cikgen lanz dwk.

Seizneix, miz boux he daj gyang vunzlai byaij okdaeuj, yawj le yawj Daegmuz, naeuz: “Mwngz mbouj dwg youq giz roencibcih dang gyauhgingj ma, vihmaz daengz neix soujdou ne?”

Daegmuz: “Deng! Gunghcoz aeuyungh. Sou mbouj ndaej haeujbae, ndawde yungyiemj.”

Boux haenx naeuz: “Vihliux aeu goeng- dauh, hwnj bomid roengz haijfeiz cungj mbouj lau, gyoengq beixnuengx cung ha! Vunzlai caiq roemx baez moq.”

Daegmuz aenq saeh mbouj ndei, gaem- dawz aen duigyangjgih hemq:“Bangunghsiz, bangunghsiz, miz 30 lai vunz cung haeuj douhung bae.”

Ndaw duigyangjgih naeuz:“Lanz dwk! Mbouj cix haep dou.”

Roengzban lo, Daegmuz bae ciep mehyah, youh ciep daeglwg caemh maranz. Gwnzroen, samde lwnh gij saeh ngoenz neix. Daeglwg: “Ngoenzneix gou ndaej ciengj, boh, mwngz ciengj maz hawj gou?” Daegmuz: “Maz ciengj? Mbouj dwg danyienz gaujsi ba?” Daeglwg: “Boh, mwngz yawjsiuj gou lo, sengj cozvwnz doxdax ngeih daengjciengj.”Daegmuz: “Daeg- lwg gou ak bw, wnggai ciengj, mwngz siengj aeu maz?”

Daegmuz gangjsat nyeux yawj mehyah mbat ndeu, cij raen naj de nyaeuqnyat, lumj mbouj simhai nei.

Daegmuz: “Mehyah, mwngz simnyap maz ni?”

Mehyah: “Ngoenzneix gou sou ndaej mbaw ngaenzgyaj ndeu.”

Daegmuz: “Neix mbouj youqgaenj ndwi, baezlaeng siujsim di couh baenz lo.”

Mehyah:“Mbouj youqgaenj? Mwngz laih- naeuz mwngz dwg bouxmiz ha? Mboujdan ngaiz ndaq, lij gaeu bae gij cienzciengj ndwen neix dem.”

Daeglwg:“Boh, mwngz ni, miz maz saehndei?”

Daegmuz: “Gou ya……”

“Gouq mingh ha……”

Cingq youq seizneix, ndaejnyi sing mehmbwk ndeu hemq gouqmingh. Riengz sing yawj bae, baihnaj giz mbouj gyae haenx, miz vunz dajgiep, song daegmbauq cingq dajgiep aen daeh dahsau ndeu. Dahsau buekmingh gaemmaenh aendaeh mbouj cuengq, gyoengqde doxdog doxlaengq.

Daegmuz daengx ci. Mehyah got de ndaetndaet. Daeglwg dwglau dwk yawj gizhaenx.

Daegmuz gyod fwngz mehyah, mehyah got ndaej engq maenh: “Mwngz mbouj ndaej caiq cauxhux lo, raeuz boekfan mbouj hwnj……”

Daegmuz okrengz cengq mbat ndeu, mehyah dauqdaej guh mbouj gvaq de, Daegmuz vaiqvid cung baenaj.

Song daegmbauq raen miz vunz daeuj- daengz, cix dawz mid okdaeuj, bi bae bi dauq, naeuz, “gaej guenj saeh neix, gvaqdaeuj couh aeu mingh mwngz.”Song fag mid lwenq- myigmyig.

Daegmuz daihsing hemq:“Dingzfwngz! Caeuq gou bae douzanq.”

Daegmbauq ndeu: “Hw hw! Dwgriu!”

Daegmuz cung gvaqbae, fwngz dub ga dik.

Mehyah gingmwnh yaep he cij siengj daengz bauqanq.

Daegmuz mbouj rox bae lawz aeundaej baenzlai rengz, mbat gienz ndeu、mbat din ndeu couh dawz song daegmbauq dik laemxboek gwnznamh, youh riengjret dwk dik duet fagmid gyangfwngz boux haenx, ciengj ndaej dauq aendaeh hawj dahsau. Dahsau dwglau dwk daengx ndang saenzdedded, suk baenz gaemz ndeu. Daegmuz fuz de hwnq, cingq youq seizneix, ndaejnyi daeglwg daihsing hemq: “Boh! Baihlaeng miz vunz……”

Hoeng, ceiz lo, baihlaeng Daegmuz ngaiz mid coeg deng.

Aen ci gingjcaz swenj “vi u vi u” daengz lo. Song daegmbauq buetdeuz, hoeng, deuz mbouj gvaq gingjcaz.

Cigouqmingh daeuj aeu Daegmuz bae yihyen.

Ndaw binghfuengz, mehyah souj youq, daeglwg hix youq, de mbouj dingz mbouj duenh heuh: “Boh boh……”

Lingjdauj hix daeuj lo, lingjdauj gaem- fwngz Daegmuz heuh: “Daegmuz Daeg- muz……”

Daegmuz mbouj oksing. Mehyah siemq goekrwz de naeuz:“Lingjdauj daeuj yawj mwngz lo.” Daegmuz menhmenh haida. Lingjdauj naeuz:“Daegmuz dungzci, gou daibyauj giz- dangjcuj naeuz gienh saeh ndeu, gizdangjcuj yenzgiu gietdingh hawj mwngz geiq baez sam- daengjgoeng ndeu, doengzseiz hawj mwngz cienjguh boux gingjcaz cingqsik ndeu.”

Raemxda Daegmuz lae okdaeuj, riengz gaeuda lae daengz goekrumz, lae daengz gwnz swiz, aenbak doenghyedyed, haemq nanz cij gangj ndaej ok vah: “Gou dauqdaej ndaej guh boux gingjcaz cingqsik ndeu lo!”

Mehyah gaengawq gij ronghda bouxgvan, aeu aenmauh daeuj hawj de.

Aen gingjveih ronghlwenq gwnz mauh, Daegmuz rubluh bae rubluh dauq……

（sat）