Diegcoj gou dwg youq Denh- dwngj Yen Yangduh Cin Dingzloz Cunh Mbanjdingznen, mbanj neix sam mienh miz bya humx. Daengx mbanj miz hajbak lai ranz, songcien hajbak lai vunz, ciemq dieg betcien lai moux, ndawde miz itcien betbak lai moux reih naz .

Vunzmbanj bibi ndaem haeux- yangz caeuq gooij. Saedceij gvaq ndaej an’onj youh fouqmiz.

Gyang mbanj miz aen gvangj- cangz ndeu, hix heuh guh dieg gunghgung. Youq Denhdwngj Yen lajmbanj sojmiz cunhbu dieg youq ndawde daeuj suenq, aen dieg gunghgung neix dwg aen ceiq hung ndeu, dingz ndaej songbak lai aen ci. Lijmiz giuzcangz caeuq daizheiq dem. Dieg gunghgung, baet ndaej seuqsak, hawj vunz roxnyinh gig cwxcaih.

Mbanjdingznen fouqmiz nauh- yied.

Vunz Dingznen gig swnhheiq ndei gangj.

Mwh mwngz daeuj daengz Dingznen, muengh gvaqbae, hajbak lai aen ranz, aen’aen dwg laeuz moq, mbouj miz saek aen ranzrwix.

Bien giuzcangz, miz haj gorungz hung. Moix ngoenz daj banhaet daengz banhaemh, cungj miz haujlai vunzgeq comz youq goek gorungz, mizmbangj vunz dwkbaiz, mizmbangj vunz gangjgoj, miz di vunz eu fwen, boux- boux najriu, bouxboux angqfwd- fwd.

Banhaemh, naengh youq bak- mbanj couh raen gij vunzmbanj guh hong dauqma ranz, miz vunz rap doenghyiengh, miz vunz mbek fag- gvak, itmienh byaij roen itmienh ciengqgo, bouxboux angqfwtfwt.

Yaep he, daengngoenz ciemh- ciemh roengz byaibya bae. Mbwn laep lo, haeuj mbanj bae cungj sup daengz gij heiq homfwdfwd haenx, neix couhdwg vunz ndaw mbanj cawj byaekcaeuz ne.

Banhaemh bet diemj buenq cung, giuzcangz dienhdaeng ronghsagsag lumj banngoenz nei. Yaep he aen sing yinhyangj yiengjgokgok, seizneix miz bouxsai miz mehmbwk daeuj diuq gvangjcangzvuj lo. Gyoengqvunz moix haemh diuq daengz cib diemj cung cij dauqbae ranz guh fangzhwnz.

Daj bakmbanj yiengq baihbaek byaij bae, nanz mbouj nanz yawj raen laj dinbya miz baenz momq baenz momq ranz. Neix couhdwg gij ranz ciengx yiengz vunzmbanj. Dingq gangj daengx mbanj Dingznen miz geij fanh duz yiengz bw. Vunzhek baihrog ciengzseiz daeuj gizneix cawx yiengz, aeu cihung cang baenz ci baenz ci rag okbae ne.

Caiq daj bakmbanj yiengq baihsae yawj bae, hix miz haujlai momq ranz, dwg ranz ciengx mou ciengx gaeq vunz Dingznen, mou miz fanh lai duz, gaeq hix miz song sam fanh duz. Neix couhdwg gij cwngzgoj guekcoj banghoj aen cwngcwz neix daiq daeuj. Daiqdoengh le aen mbanj Dingznen ginghci cienz- mienh fazcanj.

Mbanjdingznen, youq Denhdwngj Yen lajmbanj ma gangj, suenq dwg aen mbanj hung daihngeih, vunz lai labcab, daengx mbanj miz cib geij aen singq. Danhseih, aen mbanj neix gig doxgiet, bak lai bi roengzdaeuj, soqlaiz mbouj miz vunz yawj vunz mbouj hwnj da gvaq, ndaw mbanj miz bouxlawz miz nanh, daengx mbanj vunz gag bae bangcoh.

Seizneix vangjloz fazdaz, cunh- veij couh laeb miz aen ginz veizsin daengx mbanj ndeu, ranz lawz miz nanh, cunhveij couh fat hwnj ginz bae hawj daihgya rox, gak vunz couh gag ok ngaenz daeuj bang lo.

Geij bi gaxgonq, miz boux vunzmbanj ndeu baenz binghnaek, bae daengz Namzningz ywbingh, ranz de ngaenz mbouj gaeuq, ndaw mbanj rox le, couh dawz aen saehcingz neix fat hwnj aen ginz ndaw mbanj bae, aeu daihgya ok ngaenz daeuj bangcoh, boux youq ranz, boux youq baihrog dajhong cungj gien ngaenz lo, mbouj daengz haj ngoenz seizgan, gungh ndaej geij fanh maenz ngaenz hawj de ywbingh.

2018 nienz, miz ranz ndeu mbouj siujsim deng feiz coemh ranz le, gij doenghyiengh mbouj lw saek di, aen ranz hix deng coemh vaih lo, cunhveij doiq gienh saeh neix gig yawjnaek, sikhaek fat hwnj aen ginz ndaw mbanj bae lwnh, daihgya gag ok ngaenz daeuj bang ranz de dauqcungz guh ranz moq, hix mbouj daengz haj ngoenz seizgan, cib geij fanh maenz ngaenz couh daengz gwnz fwngz boux de lo.

Couh yienghneix, haujlai bi roengzdaeuj, Dingzloz Cunh cungj bingz ndaej Denhdwngj Yen haj singhgiz vwnzmingz cunh.

Mbanjdingznen miz gienh saeh ndeu caeuq mbanjwnq mbouj doengz, gig daegbied. Gangj okdaeuj miz haujlai vunz mbouj saenq. Danhseih, saedsaed saehsaeh dwg yienghneix ne. Miz vunz heuh aen mbanj neix guh mbanj “sam mbouj miz”:

Daih’it mbouj miz fangzbaed. Aen mbanj neix bak geij bi roengz- daeuj, mbouj laeb miz ranzmiuh, bungz daengz ciet hung, vunz mbanj- wnq cungj aeu gaeq bae caeq miuh, Mbanjdingznen couh mienx bae aen hong mazfanz neix. Daengx mbanj mbouj miz saek boux guh gvaq goengdauh, mbouj miz saek vunz guh gvaq mehgimq, hix mbouj miz saek vunz saenq baed saenq dauh gvaq, mbouj miz saek boux cingj gvaq goengdauh caeuq mehgimq, couhdwg miz vunz dai, mboujlwnh vunzgeq roxnaeuz vunzcoz, cungj mbouj cingj goengdauh daeuj guhdauh gvaq, cijmiz dunghcih beixnuengx daeuj bang hong, ram boux dai bae moek le, dauqma gwn donq ndeu couh liux saeh lo.

Daihngeih mbouj miz vunz guhdoj.

Daihsam mbouj miz vunz gwndoeg.

Ginggvaq diucaz, Mbanjdingznen daengz seizneix caengz miz saek boux guhdoj, caengz miz saek vunz gwndoeg gvaq. Bouxboux gag ciuqsouj faplwd fapgvi, bouxboux gag ciuqsouj gij goeng’iek ndaw mbanj, noix raen miz vunz famhfap.

Diegcoj gou couh yienghneix, seuq lumj mbwn, saw lumj raemx.