原文：

屈原曰：“吾闻之，新沐者必弹冠，新浴者必振衣；安能以身之察察，受物之汶汶者乎？宁赴湘流，葬于江鱼之腹中。安能以皓皓之白，而蒙世俗之尘埃乎？”

渔父莞尔而笑，鼓枻而去，乃歌曰：“沧浪之水清兮，可以濯吾缨；沧浪之水浊兮，可以濯吾足。”遂去，不复与言。

——先秦·屈原《楚辞·渔父》（节选）

译文：

1

Giz Yenz naeuz: “Gou dingq gangj, swiqgyaeuj gvaq liux yaek daenj mauh, itdingh aeu danhdanh aenmauh; swiqndang gvaq liux yaek daenj buh, itdingh aeu saenqsaenq geubuh. Aen ndang baenzneix saw, baenzlawz hawj gij namhfok seiqsug luk ndang ne? Gou ningznyienh diuq roengz Dahsienghgyangh bae, dai youq ndawdungx duzbya, hix mbouj hawj namhfok seiqsug luk ndang gou.”

Bouxdwkbya dingq le, riu dwk gauruz bae lo. De ciengqgo hwnj- daeuj: “Raemx Canghlang lae saw, gou bae saeg cag mauh; danghnaeuz raemx noengz laux, gou sauz din gaijmbwq. ” Doeklaeng bouxdwkbya bae lo, caiq mbouj hoizvah Giz Yenz.

（西林县 Vangz Civeij/黄志伟）

2

Giz Yenz naeuz：“Gou dingq naeuz, ngamq swiqgyaeuj sat itdingh aeu bongxbongx mauh；ngamq swiqndang liux itdingh aeu saenq- saenq ndangdaenj. Baenzlawz hawj gij faenx gwnzbiengz daeuj uq aen ndangdaej seuqsagsag gou ne? Gou ningznyienh saet roengz ndaw Dah- sienghgyangh bae, vutmingh youq ndawdungx byadah. Baenzlawz hawj gou cinghdikdik caiq bae souh gij oepsaep gwnzseiq ne?”

Goenggeq dwkbya dingq le, baez riunyumj le couh ngauz fagcauh vadruz lizbae. De ciengq naeuz：“Raemx Dahcanghlang sawdikdik ha, ndaej daeuj swiq diuz saimauh gou；raemx Dahcanghlang noengz- nwtnwt ha, ndaej yungh daeuj swiq faj din gou.” De ciengq sat couh bae gyae lo, mbouj caiq riengz Giz Yenz gangjvah.

（平果市 Lij Yungzcangh/李雄章）

3

Giz Yenz naeuz:“ Gou roxnyi fwx naeuz, ngamq swiqgyaeuj liux aeu baet mauh. Ngamq caemxndang liux aeu bongx buh. Guh daengj lawz hawj ndang seuq gou luk daeuhbyaeuh le? Gou nyienh saet haeuj Dahsienghgyangh, caem youq ndaw dungx bya. Guh daengj lawz hawj ndang hau gou luk boengz biengz neix le?”

Bouxdwkbya gaen rwz liux，riuamqamq, vadruz baenq ndang deuz, ciengq fwen ok:“Raemx Dah- canghlang saw lai lo, aeu daeuj swiq fohmauh gou. Raemx Dahcanghlang doengq lai lo, aeu daeuj swiq faj din gou.” Doq bae lo，mbouj riengz de gangj lo.

（天峨县 Yaz Veijbungz/牙伟鹏）

4

Giz Yenz naeuz: “Gou dingq gangj, ngamq swiqgyaeuj aeu baet aenmauh baez ndeu, ngamq swiq- ndang aeu saeuj geubuh baez ndeu; baenzlawz hawj aen ndang seuq nem gij uq ne? Gou cingznyienh diuq roengz Dahsienghgyangh bae, haem youq ndaw dungx bya. Baenzlawz hawj aen ndang seuq gou nem gij faenx gwnzbiengz ne?”

Bouxdwkbya dingq le riu- nyumnyum, cauhruz lizbae lo. Eu fwen naeuz: “Gij raemx Dahcangh- lang neix saw youh saw o, goj ndaej aeu daeuj saeg fohmauh gou. Gij raemx Dahcanghlang neix uq youh uq o, goj ndaej aeu daeuj swiq faj din gou.” De doq eu doq bae gyae lo, mbouj caiq caeuq Giz Yenz gangjvah.

（平果市 Vangz Gozgvanh/黄国观）

5

Giz Yenz naeuz:“Gou dingqnyi miz cungj gangjfap neix, gij vunz ngamq swiqgyaeuj seuq itdingh aeu bongx faenx gwnzmauh deuz, ngamq dajcaemx seuq itdingh saenq gij uq gwnz doxgaiq bae. Byawz nyienh hawj ndangseuq cihgeij bae gyuk gij uq baihrog ne? Gou ningznyienh diuq roengz Dahsienghgyangh bae, dai youq ndawdungx byadah, hix mbouj nyienh hawj gij doengsae gwnzndang humj naedcaw seuqsag nei bae nem gij uq gwnzbiengz ne.”

Canghdwkbya dingq le riu- nyumj dawz gaiqcauh vadruz bae- naj, eu naeuz:“Langh raemxdah saw heu, ndaej swiq seuq fohmauh, raemxdah uqngaungau, dauq ndaej swiq song din.” Eu sat vadruz lizhai lo, mbouj caiq caeuq Giz Yenz gangj gijmaz.

（来宾市 Hoz Cunghliuj/何宗柳）

6

Giz Yenz naeuz：“Gou dingq gangj, vunz raeuz ngamq swiqgyaeuj seuq le, gaej gaenj dauq daep aen mauh, aeu doepdoep gij moekmoenq ndawmauh liux bae caiq dauq daep. Ngamq swiqndang liux, itdingh saeujsaeuj gij moekmoenq gwnz buhvaq liux bae caiq dauq daenj. Vihmaz hawj moekmoenq aen seiqsug neix daeuj nyap aen sim seuqsag boux vunz raeuz ha? Gou nyienh diuq roengz Dahsiengh- gyangh bae dai, hawj bya gwn. Vihmaz hawj daiq gvenq rabraz ndaw seiqsug neix uq aen yienghsiengq ndongqragrag gou ha?

Bouxgeq dwkbya dingq le, riunyumnyum, vad aen ruz bae lo. Doq vad doq ciengq:“Seiqvunz baenzlawz gaemzgaz sinhoj, aeu miz aen uk singjsak ndeu, couh ndaej doi aen fungheiq mbouj ndei neix. Seiqvunz baenzlawz sinhoj haemz- hoenz, hix aeu aen rabraz seiqsug neix swiq de seuqsag bae.” Ciengq le de mbouj caiq caeuq Giz Yenz gangjvah, yied bae yied gyae lo.

（天等县 Leiz Mingzgenz/雷鸣乾）

7

Giz Yenz naeuz：“Gou dingq- naeuz, ngamq swiqgyaeuj itdingh aeu bekbek aen mauh, ngamq swiqndang itdingh aeu saeujsaeuj buhvaq，baenzlawz hawj namhfok seiqsug bae uqlah ndangdaej cingh- beg ne？Gou ningznyienh diuq roengz ndaw Dahsienghgyangh，haem youq ndawdungx byadah，baenzlawz hawj gij muenz cinghseuq uq namhfok seiqsug ne？”

Bouxdwkbya dingq le riu- nyumnyum, vaijruz bae lo, ciengq hwnj:“Raemxdah Canghlang saw youh saw a, ndaej aeu daeuj swiq aen mauh gou, raemxdah Canghlang gunq youh gunq a, ndaej aeu daeuj swiq faj din gou.” Ciengq liux ciemhciemh bae gyae, mbouj caiq gaen Giz Yenz gangjvah.

（平果市 Vangz Haijyen/黄海燕）