Haetrongh, ciseiqloek、cisongloek、vunz byaij din caenj gwnzgai ndaej rimfoed, dangq boux gipmuengz baenaj, seizneix dwg seiz hwnjban、hwnjhag. Daegmuz hai denceh laemx youq gyang vunzlai, baihlaeng dap daeglwg caeuq mehyah.

Youq douhung siujyoz, daeglwg roengzci haeuj ranzhag bae. Daegmuz youh ganjroen lo, yaep he, youq naj aen laeuzraizsaw ndeu daengx ci, mehyah roengzci hwnj laeuz bae lo. Daegmuz laebdaeb ganjroen, yaepyet, daengz giz roencibcih cungqgyang singz, de daengx ci youq henzroen, haeuj aen ranziq henzroen bae, yaep he couh okdaeuj lo, daenj buhvaq gingjcaz、mauh gingjcaz, buetregreg bae coh aen diengzgang gyangroen roencibcih, youz de cijveih gyaudoeng.

Daenghoengzloeg lajde cijveih gyaudoeng, dungcoz de yienznaeuz mboujdaih biucinj, hoeng, gig nyinhcaen、yiemzsuk. Ci、vunz lairaeuh, de baez cuengqhai, ci、vunz geuj- foedfoed, lumj raemx dongj doucab nei cung baenaj. Vuenh linghbaih ndeu, hix dwg yienghneix. De hanh rim naj, ndit ciuq aennaj manhsadsad.

Daeng bienq hoengz seiz, ci、vunz noix di lo, de mbon daeh aeu soujbaq uet hanh, caengz uet ndaej gip, fwt raen aen ciiqfonx ndeu roemxgvaq daenghoengz daeuj, Daegmuz sikhaek buet bae lanz dwk. Ciiqfonx gaenjgip dingz ci, loekci cusat najroen ok song diuz rizfonx. Bouxhaici dwg daegmbauq ndeu, de hujdengdeng roengz ci daeuj, fwngz vix coh najbyak Daegmuz, najhaenq najhawq naeuz: Mwngz mbwq haeux ha? Mwngz ra dai!

Daegmuz yiengq de gingqlaex: Cingj mwngz dawz cingq okdaeuj.

Gij vifung bouxhaici daemq di lo, naeuz: Gou miz saehgaenj, cingj mwngz cuengq gou gvaqbae.

Daegmuz youh gingqlaex: Cingj mwngz dawz cingq okdaeuj.

Bouxhaici: “Mwngz roxnaj aenci neix lwi?”

Daegmuz: “Mbouj rox. Cingj mwngz dawz cingq okdaeuj.”

Bouxhaici: “Ci neix dwg ci sicangj, geiq cinj nw. Gou caen miz saehgaenj, ngamqngamq ciep ndaej denva, heuh gou youq 10 faencung ndawde bae daengz camhci ciep boux hakhung ndeu.”

Daegmuz:“Neix hix aeu ciuqsouj gveih- cwz. Danghnaeuz oksaeh, mwngz mboujdan mbouj guhsat hong, lij……”

Bouxhaici:“Mwngz siengj mbouj siengj youq aen ganghvei neix dem?”

Daegmuz:“Haenx caeuq neix miz maz gvanhaeh?”

Bouxhaici:“Miz! Uk mwngz noix gaenj yienz ndeu.”

Daegmuz:“Mbouj ciuqsouj gveihcwz, mwngz cij noix gaenj yienz he.”

……

Yaepyet, youh miz aen cidihsw ndeu, gyaeujci gaenq mauhgvaq roenci wnq daeuj, yaek ciuci, deng Daegmuz lanz dwk, caemh genjcaz gij cingq de. Bouxhaici raen yienghneix, cix yienh bauien ndeu caeuq aen hoengzbau ndeu hawj Daegmuz. Daegmuz yawj gij doxgaiq neix mbat ndeu, mbouj ciep, heuh de doiqdauq diuz roenci swhgeij, daengq de baezlaeng mbouj ndaej baenzneix guh, cix cuengq de bae lo.

……

Dauqdaengz aen ranziq henzroen, de dawz cingq daeuj daenggeiq:“Hw hw, ndaek fangzbyaiz haenx, ndoj ndaej gvaq da gou? Lij naeuz aenci dwg ci sicangj dem, boux hawj sicangj haici ndaej baenzneix moegloet ha?”

Bouxdoengzsaeh naeuz:“Mwngz naeuz ndaej deng. Hoeng, mwngz bungz saeh lo, ndaek haenx beij sicangj lij yakguh.”

Dahraix, gvaq le aen lai cungdaeuz, gohcangj ra Daegmuz: “Dingqnaeuz ngoenzneix mwngz gaeu bonj cingq ndeu?”

Daegmuz: “Deng. Bouxhaici naeuz dwg ci sicangj.”

Gohcangj: “Caen mbouj dwg ci sicangj. Da mwngz gig soem. Mboujgvaq, boux neix raeuz nyex mbouj ndaej, mwngz gojyij gyauyuz de lwnz ndeu le hawj cingq dauq hawj de.”

Daegmuz: “Neix……Nanzdauh gou gaeu loeng?”

Gohcangj:“Mbouj loeng! Mboujgvaq banhsaeh aeu lingzvued di.”

Daegmuz: “Neix……”

Gohcangj: “Dingqnaeuz mwngz riengz- laeng mbouj dwg cuengq aen cidihsw ndeu gvaqbae ma?”

Daegmuz: “Cidihsw dwg ciengjroen, goj fad goj mbouj fad, de dwg baeznduj famh, gyauyuz le goj cuengq de.”

Gohcangj: “Boux haenx hix gyauyuz le cuengq……”

Daegmuz: “Boux haenx dwg roemx daeng- hoengz……”

Gohcangj: “Mwngz ya mwngz, caen dwg noix gaenj yienz ndeu.”

Roengzban lo, Daegmuz bae ciep mehyah, youh bae ciep daeglwg. Daeglwg youq douhung caj, miz boux doengzhag ndeu cam, boh mwngz guh maz hong?

Boh gou dwg gingjcaz! “Ba ba” song sing, de guh gij hai cungq dungcoz, gyoengqnyez henzndang raen le, hozhaenz dangqmaz.

Banhaemh ndaejhoengq seiz, Daegmuz dawz cek saw 《Fuzwjmozswh Buqanq》 daeuj yawj.

Daeglwg cam: “Boh, mwngz boux gyauh- gingj ndeu, lij siengj dang Fuzwjmozswh ha?”

Daxboh naeuz:“Fanzdwg gingjcaz byawz mbouj siengj dang Fuzwjmozswh?”

Daeglwg naeuz:“Mbouj itdingh! Gou raen mwngz ndwn youq gyangroen cibcih, daegbied akwtwt, dungcoz gingqlaex mwngz daegbied swnzswng, ndeiyawj!”

“Dingling” soujgih yiengj, gohcangj dwk denva daeuj, daengq Daegmuz haetcog bae ndawgiz, gizcangj ra de. Daegmuz ndawsim gag naeuz, “lauheiq dwg hawj gou cienjguh boux gingjcaz cingqsik luba? Gou camgya gunghcoz sam bi lo caengz ndaej cienjcingq bw.” Baenzneix naemj le de miz di daekeiq.

Haetrongh, Daegmuz caeuxcaeux daengz gizcangj bangunghsiz, gizcangj naeuz, seizneix gunghcoz guhdi diuzcingj, aeu mwngz dauq ndawgiz guh bouxhendou.

Daegmuz daengz mwnzvei, cam boux- hendou gaeuq, hong bouxhendou dwg maz? Boux haenx naeuz, haeujsim gij vunz haeujok najseng haenx, aeu baujhoh gij caizcanj ndawgiz raeuz ancienz.

O! Gou mingzbeg lo.

Henzranz mwnzvei miz gomakgai sang, hix miz godoengcingh daemq, Daegmuz baij aen daengqraez ndeu youq bakdou, de cix naengh youq laj godoengcingh, mbouj haeujsim yawj, caen yawj mbouj ok miz vunz youq gizde. Yienznaeuz de youq gizde lumj ndoj vunz nei, hoeng, lwgda cix cim coh bakdou seiqlengq, baez miz vunz daengz, de couh ndonj okdaeuj: Niemhcingq, daenggeiq, cuengqganj, sat le youh ndoj haeuj laj godoengcingh bae.

Ngoenzhaenx, daegmbauq coz ndeu, gveijgveij gvaiqgvaiq, fwtndonj haeuj douhung bae, coh giz guggeh byaij bae, doiq aen denceh gizde “roengzfwngz”. Daegmuz fwt daengz henz, dawz ndaej de, denva hawj baicuzsoj daeuj aeu de bae.

Ngoenz ndeu, Daegmuz youh ndoj youq laj godoengcingh. Gohcangj enjaek enjai byaij daeuj, gyae’gyae couh hemq: Daegmuz！

Daegmuz cingq ngonz duzdaekmax gaeb duzbib. Gohcangj hemq daihngeih sing le de cij han, doq han doq ngonz okdaeuj. Gohcangj najlaep cam: Bae gyawz?

Daegmuz: “Youq ne.”

Gohcangj:“Youq? Gou heuh baenz song mbat!”

Daegmuz:“O! Gou cingq yawj duzdaekmax gaeb duzbid, mbouj gamj oksing……”

Gohcangj:“Maz? Hwnjban seizgan mbouj youq ndawranz ndeindei soujsauq, bae yawj duzdaek gaeb non?”

Daegmuz: “Mbouj deng……”

（caengz sat）