Youq ngoenz ok mbaw buengj mingzdan ranzgungzhoj haenx, Veiz bohlungz youheiq raixcaix! Gij coh swhgeij baiz daih’it! Miz vunz hoh naeuz:“Veiz bohlungz, angqhoh mwngz lo, gwnzbuengj miz mingz le, couh mbouj you lo! Miz vunz gvaqniemh gij gwndaenj mwngz lo!” “Gangj maz vahbemx ne? Mwngz vihmaz youh mbouj siengj aeu ne?” Veiz bohlungz baez dingqnyi miz vunz hoh de, hozndat raixcaix. Veiz bohlungz miz sam daeg lwg, cungj bae dajgoeng lo, lij caengz aeubawx ne, seizneix ndawranz lij dwg ranzvax! Seizneix baenz ranzgungzhoj, mingz cienz okbae, gyawz miz dahsau lij nyienh haq daeuj ne!

Veiz bohlungz gietdingh bae ra cunhcangj lwnhleix, gij mingzdaeuz ranzgungzhoj haih ranz swhgeij lo! Veiz bohlungz byaijhaeuj cunhveijvei, cunh- cangj lij nyaengq gyoepsuenq soq ne. Veiz bohlungz baez raennaj couh buekcam:“Ranz gou bienqbaenz ranz- gungzhoj, baenzlawz mbouj lwnh gou nyi gonq ne? Seizneix cungj diep okbae lo, vunz cungj rox ranz gou gungz lo! Gou miz yigen, gou mbouj hwnjbuengj lo, doiq okdaeuj ndaej lwi? ”

Cunhcangj naeuz:“Mwngz ndaej hwnjbuengj, lij mbouj angq? Geijlai vunz siengj hwnj cungj mbouj ndaej ha! Mwngz huk ha! Gij faensoq ranz- gungzhoj dwg ginggvaq gaujhwzcuj daeuj bingz, faensoq daemq, couh ndaej hwnj lo. Mbouj yungh mwngz doengzeiq ha, ranz mwngz bonjlaiz couh suenq gungz, wngdang ndaej yiengjsouh gij dakdaih doengh ranzgungzhoj haenx! Mwngz vihmaz mbouj angq la?”

Veiz bohlungz baez dingqnyi “ranzgungzhoj” sam cih saw neix couh hozndat, swhgeij vunz gungz ceiqheiq mbouj gungz, swhgeij hix itcig roengz- rengz guhhong, coh diuz loh baenzfouq roengzrengz haenqguh ha? Mbouj gvaq lij caengz guh ndaej ndei, sam daeg lwg swhgeij hix mbouj cengheiq, bae dajgoeng geij bi lij cam aeu cienzci! Aen ranz bonjfaenh couh ceizceiz caengz ndaej hwnq, mbouj miz ranz couh aeu mbouj ndaej lwgbawx, mbouj miz saek boux bawx，sam daeg lwg de couhdwg bouxdog! Bonjlaiz gaenq mbouj swnh, seizneix lij daenj aen mauh gungzhoj, siengj vut cungj vut mbouj bae ha!

“Sou lij bangrex gou? Lij miz gij saehcingz baenzndei ha? Ranz gou sam gan ranzvax, sou ndaej bang gou cek bae dauq hwnq?” Veiz bohlungz dingqnyi cunhcangj naeuz bangrex, couh swnhbak cam baez ndeu, “Danghnaeuz sou caen daeuj bangrex gou, yienghneix gou couh laebdaeb guh ranzgungzhoj! Seizneix aeunaj hix mbouj miz maz yungh lo, ceiq youqgaenj dwg aen ranzvax swhgeij ndaej lawh baenz ranzlaeuz, neix cij dwg seizneix ceiq youqgaenj haenx! Veiz bohlungz siengj dwk. “Cunhcangj, gou hix mbouj roxnaj saek boux lingjdauj, sou caen bangrex gou ha! ”

“Veiz bohlungz, mwngz cuengqsim, gij ranzgungzhoj laebdangj hwnjgaj dou baezneix guh haenx, guekgya cungj hawj ngaenz bangfuz, daj ranzyouq daengz gwndaenj, cungj miz baujcang, cungj ndaej doeksaed liux! Cungj ciuq gij cingsaenz vwnzgen baihgwnz guh- saeh! Mbouj yungh roxnaj vunz! Mwngz couh cuengqsim ba!” Cunhcangj riuhwhw naeuz, “Mwngz mbouj siengj guh ranzgungzhoj, aen siengjfap neix ndei ha! Vunz gungz ceiqheiq mbouj gungz! Mwngz caeuxlaeng ndaej duet- gungz baenzfouq, aen ranzvax mwngz hix miz ngoenz ndeu ndaej lid bae caiq hwnq!”

“Seizneix banhsaeh mbouj yungh roxnaj vunz ha? Lij miz gij saeh baenzneix ndei ha!” Veiz bohlungz saedcaih mbouj gamj saenq, ganjnaeuz bonjfaenh dingq loek lo!

Cunhcangj naeuz:“Neix bietdingh aeu guh lo! Mwngz mbouj duetgungz, gou ndaek cunhcangj neix lij aeu dawzrap ne!” “Guh mbouj ndei, gou hix deng cawqleix!”

“Mbouj ndaej law, neix mbouj gven mwngz gijmaz saeh ha! Dwg gou swhgeij guh mbouj ndaej, caeuq mwngz mbouj miz maz gvanhaeh!” Veiz bohlungz nai cunhcangj naeuz.

Ndei dahraix, gij saehcingz neix coengzlaiz mbouj bungzdaengz gvaq ha! Veiz bohlungz yaep ndeu couh miz saenqsim gvaq ndei daengzcog lo!