Daengngoenz daj laengndoi daemqdwd baihdoeng ndonj okdaeuj, nditndongq ronghsagsag. Dou gyaeuj- yah senq gwn ngaizromh gvaq, cang geij bau bwnhvafeiz hwnj soujfuz yaek daeh bae haeuj oij. Haeuj bwnh oij deng guh caeux, caj gvaiz ndit haenq le cix dwgrengz lai. Dajndaem couh yienghneix, deq mbwn anbaiz, gyo ngoenzbonz doek raq fwn ndeu cij ndaej haeuj bwnh, danghnaeuz mbouj cagaenj, diegreih sauj le couh haeuj mbouj ndaej lo.

“Biujgorenh, gou siengj gai faex lo, bang heuh lauxbanj daeuj yawj vei!” Sawqmwh nyi miz sing heuh, gou nyeuxnaj baez yawj, dwg naihlaux Ciengzdeih’iq youq baih honghgai haenx byaij daeuj heuh gou. Gou daj Mbanjgorenh daeuj gwnzhaw cawx dieg hwnjranz, gyoengqvunz gyaengh honghgai neix cungj haengj heuh gou guh “Biujgorenh”.

“Mwngz miz faex ndaej gai la?” Gou fwtfwh sim angqfwngfwng, “Miz lai lwi? Saeniengz!”

Naihlaux dwg lwgsau baih gangj Hek, haq daeuj Ciengzdeih’iq guh bawx. Gvan de doenghbaez youq ndawmbanj guh lauxsae laemzseiz gvaq, gangj Hek heuh mehsae guh “saeniengz”, ndigah gyoengqvunz ei gangj Hek heuh de “saeniengz”. Heuh gvenq doekbak lo, cimhlaeng gvan de mbouj guh lauxsae le gyoengqvunz hix mbouj gaijbak. Gou daeuj gwnzhaw youq caengz nanz, caeuq Saeniengz mbouj sug geijlai, dan rox ranz de gaxgonq youq Ciengzdeih’iq ndoq lumj feiz coemh raemx riengx, dwg ranz doiqsiengq cwngfuj roengzmbanj banggungz, bouxgvan miz bingh mbouj ndaej guh hongnaek, song daeg lwg youq rog doegsaw, dangag de boux ndeu guh hong nazreih. Ndaej duetgungz le cij daeuj gwnzhaw hwnj ranz, song boux lwg seizneix youq Namzningz guhhong.

Saeniengz naeuz：“Gou ndaem geij dangq faex, gyonj hwnjdaeuj miz bak lingz moux. Dangq yaek gai neix miz sam cib geij moux yienghneix, diegnamh biz, maj ndaej yoeng.”

Raen ceij ca ceij, gaej ce doekndwi, gou sikhaek gaijbienq cawjeiq, caengz gaenj bae haeuj bwnh oij, mbon soujgih dwk dienhvah duenq Vuengz lauxbanj daeuj yawj faex gonq. Miz di vunz mbouj rox cix riu dou mbouj guh cingqnieb, “vit lwg umj lan”, mbouj ciqcingz ganq oij, oij dou bibi yaez gvaq bouxwnq. Gizsaed dou gvai ndawdungx, “gaeb duzbya ce duznyiuz”. Vuengz lauxbanj vunz Duenhbongz, cienmonz bau ndoi raemj faex, geij bi neix dou bang de ra ndoifaex, de baez aeu ndaej baenz cungj hawj di ngaenzsinhoj hawj dou, noix cix saek geij bak, lai couh baenz geij cien. Dou caen ngeix mbouj daengz naihlaux loegcib lai bi neix gingqyienz ndaem ndaej nyaenx lai faex.

Mbouj daengz aen roetgaeq nanz, aen cidaepniengq Vuengz lauxbanj couh daeuj daengz lo, dou gyaeujyah caeuq Saeniengz hwnjci yinx de haici bae ndoi yawj faex. Doengh bi neix, bouxmizngaenz hwng guh bau ndoeng raemj faex, “ma lai haex noix”, mbangjboux nanznanz ra mbouj ndaej faex daeuj raemj, couh ok ngaenz ciengx goujbet bang ra. Dou gyaeujyah baengh guh goujbet bang lauxbanj ra faex caemh ndaej di ngaenz. Mbouj rox Vuengz lauxbanj raemj faex ndaej mbouj ndaej canh ngaenz, fanjcingq dou canh lo, ndaej daeuj gwnzhaw cawx dieg hwnjranz.

Cidaepniengq ndij diuz roen suijniz vaehvaeh hai hwnj Lingq- ciengzdeih, song henz roen caenh faexnganqciq, gogo daengjcup sohsup, ranghrangh roedroed bae gizgyae, yawj mbouj ndaej byot. Hwnj lingq gvaq geuq bae baihndaw miz aen hung aen iq song aen mbanj, mbanj hung heuhguh Ciengzdeihhung, mbanj iq heuhguh Ciengzdeih’iq. Aen mbanj Ciengzdeihhung gou miz boux laux- doengzhag ndeu, doenghbaez youq gwnzhaw doegsaw ndaej riengz de daeuj neix guhcaemz gvaq. Mwh haenx hwnj Lingqciengzdeih caengz miz roen gvangq roen suijniz, dan miz diuz roen iq ngutngut ngeujngeuj gumzgumz gamxgamx ndeu. Vunz- mbanj daeuj haw, mbangjboux miz danci naengh cungj dwg yaep he gwih yaep he gwed, gij mehmbwk ging- ciengz haengj ndang daenj buhvaq gaeuq raek daeh buh moq bae riengz, itloh gyuek faenx okdaeuj, caj daengz henzhaw ra giz rieg buh cij haeuj haw.

“Dingzci!” Saeniengz sawqmwh hemq naeuz.

Vuengz lauxbanj sat ci dingz roengzdaeuj, “Daengz la?”

“Caengz, fag haenx bae.” Saeniengz doq gangj doq fwngz yeix gvaq fag ndoeng doiqnaj bae, “Ci mbouj ndaej hai gvaqbae, raeuz deng byaij aeu lo.”

Dou geij boux riengz laeng Saeniengz, lumj byaij roennou nei, roengz lueg hwnj ndoi, yamq sang yamq daemq, song henz rumhaz nya- nyum. Daih’iek byaij saek buenq goengleix cij daengz benq faex Saeniengz. Daengngoenz gaenq hwnj baenz geij saux sang, nditndat ciuq daengz gwnz ndang vunz manh- saengsaeng, lumj yaek remj nei. Dou geij boux roxnyinh miz di baegnaiq, diemheiq fofo, hoeng naih Saeniengz cix lij din mbaeu byaijlili. Dou youq ndawhoz mbouj ndaej mbouj baiqfug de, gaej yawj de vunz geq ndang byom, aiq dwg ngoenznaengz banh ndoi gvenq, lienh ndaej ndang genq, benz ndoi hwnjlingq dangq byaij diegbingz, daj neix yawj ndaej ok, bouxgeq lajmbanj ngoenzngoenz guhhong lij ak gvaq doengh boux ndaw hawsingz gwn imq mbouj miz saeh guh haethaemh roengzrengz duenhlienh guh diuqfoux、buetrenh roxnaeuz moebgienz haenx bae.

Gij dieg faex Saeniengz ciemqbae baenz mbiengj bo’ndoi, miz giz bingz dangq daizhongh, miz giz lingq yaek ndwn mbouj maenh, faexnganqciq gogo noengqnup yinxyup, sang yaek daemx mbwn, laj goek leix ndaej seuqsaengj, mbouj saek go rum.

Vuengz lauxbanj riengz Sae- niengz youq ndaw ndoengfaex byaij hop ndeu le, cam naeuz：“Daxsimj, gij lwg mwngz mbouj youq, gai faex mwngz guh ndaej cawj lwi?”

“Faex dwg faex duh gou, gou mbouj guh ndaej cawj byawz guh ndaej cawj?” Saeniengz ndiengq naj hwnj gwnz byaifaex bae.

“Gij faex neix cungj dwg mwngz bouxdog gag ndaem gag guenj?” Vuengz lauxbanj miz di ngeizvaeg.

“Dwg bw, song daeg lwg cungj youq baihrog guhhong, bouxgvan ndang bingh ndeu, mbouj dwg gou gag guh miz byawz bang gou?” Saeniengz lumj geq haemz hawj dou nyi, youh lumj angj ak hawj dou yawj.

“Gangj lauxsaed, ndoi faex neix mwngz gai geijlai ngaenz?” Vuengz lauxbanj cigciep cienj haeuj cingq- daez.

“Samcib haj fanh.” Saeniengz danh ok coenz ndeu, lumj boux guh damzbuenq coh doiqfueng baijok laebciengz.

“Samcib fanh ndaej lwi?”

Seizneix mbouj saek di rumz, mbawfaex dinghyig, mbwn gig oem- am, dou geij boux hanh conh- mwdmwd.

“Ceiq noix hix aeu samcib sam fanh, mbouj ndaej gou mbouj gai.” Saeniengz naeuz.

Vuengz lauxbanj baenqndang youh gag cunzbyaij benq diegndoi faex daengjcup baeksak haenx hop ndeu……

“Faex mwngz ndei seih ndei, hoeng oiq di. Yienghneix ba, gou gietdingh aeu, hawj song sam fanh ngaenzdingh hawj mwngz gonq, dajsuenq bimoq cij raemj, daengz seizde hai cienz seuq cij hai raemj, baenz lwi?” Vuengz lauxbanj gangj diuzgienh lo.

“Mbouj baenz bw!” Saeniengz mbouj haengj, “Gou gaenj aeu ngaenz hawj daeg lwgdaeuz gou, de youq Namzningz cawx ranz bengz lai, cungj yaek gung mbouj hwnj lo.”

Dou geij boux cungj dadaengx lo. Naihlaux neix lij laeuq ndaej ngaenz daeuj bang lwg de “gung ranz”, ak ho! Doenghbaez banlaux cungj naeuz ciuhvunz guh mbouj guh ndaej gwn, couh yawj mwhcoz rengzcangq heiq- vuengh de, baez mauh gvaq seiqcib “daengngoenz doxroengz”, dangh- naeuz caengz guh ndaej hwnjfaenj, couh mbouj miz maqmuengh lo. Lij riuzcienz miz hot fwen yiengh- neix：

Mwhcoz mbouj cienjbienq,

Daengz geq ienq cix gvaiz,

Seiqcib mbouj fatcaiz,

Daengz dai guh fangzhoj.

Saehsaed gaenq dwklaemx le cungj gangjfap neix, gou gag youq ndawhoz ngon hot fwen moq ndeu：

Youq aen seizdaih moq,

Naihgeq goj fatcaiz,

Roekcib cungj mbouj gvaiz,

Ukgvai couh guh ndaej.

Vuengz lauxbanj yaep aen soujgih de suenq bae suenq dauq, naeuz：“Yienghneix ba, gou baema doxyaeng ndei le, gvaq song ngoenz menh dapfuk mwngz.”

“Aw, yienghneix baenz, mwngz baema siengliengz ndei le caiq dwk dienhvah lwnh gou.” Saeniengz cengqgengz baez riu, cix yawj ndaej ok ndawsim de miz di doeknaiq.

Daengngoenz yaek cingq lo, seiqlengq duzbid rengx swenj haeuj gyaeuj haeuj rwz, raegraeg raehraeh. Aenvih okhanh lai, gou deng iemq haeuj lwgda bae roxnyinh miz di sep. Dou byaij dauqma daengz gizdieg dingzci, nditndat cik ndaej aen cidaepniengq yaek hwnj hoenzfeiz, baez hai dou hwnjci lumj haeuj ndawyiuz, Vuengz lauxbanj hwnjfeiz hai gunghdiuz yaep he le, cij lai liengz di.

Byonghngoenz seizgan couh yienghneix gvaq bae. Cidaepniengq ndij diuz roen suijniz Lingqciengzdeih vaehvaeh hai doxdauq. Vahsug naeuz, “Hanh sep da, naz mued dwngj.” Caen maqmuengh ngoenzcograwz ndaej miz fwn doek, hawj gou ndaej bae haeuj bwnh oij. Engq maqmuengh ndoi faex neix Vuengz lauxbanj aeu ndaej baenz, yienghneix gou ngoenz- neix daeuj banh ndoi couh mbouj dwgrengz ndwi lo.