182. Cam:

Gou cam mwngz beix ha,

Gaiq maz rungh gofaiz?

Gou cam mwngz beix ha,

Gaiq maz gai vuengzdaeq?

Hoiz:

Boux san sat san dungh,

Caengz raen rungh gofaiz,

Boux daenj mad langh haiz,

Caengz raen gai vuengzdaeq.

183. Cam:

Gou cam mwngz beix ha,

Dienyah daengz lawz gungz?

Gou cam mwngz beix ha,

Din mbwn daengz lawz dingz?

Hoiz:

Aen rek gyangq gwnz cauq,

Dienyah daengz de gungz,

Aen faeq goeb gvaq gwnz,

Din mbwn daengz de dingz.

184. Cam:

Bak vaiz youq ndaw rungh,

Itgungh geijlai gaeu,

Dawz daiq ngviq lienz gaeu,

Mwngz naeuz geijlai soq?

Hoiz:

Bak vaiz youq ndaw rungh,

Itgungh song bak gaeu,

Dawz daiq ngviq lienz gaeu,

Gou naeuz cienbet soq.

185. Cam:

Gou cam mwngz beix ha,

Gaiq maz vaiz daenj mad?

Gou cam mwngz beix ha,

Gaiq maz rangz hai mbaw?

Hoiz:

Go’ndoek bwn sahsaiz,

Gaiq de vaiz daenj mad,

Vunz diemj yieng diemj lab,

Gaiq de rangz hai mbaw.

186. Cam:

Duz maz caen leihhaih,

Bae ndaw haij ndaem coeng?

Duz maz goj leihhaih,

Bae ndaw boengz hoenxciengq?

Hoiz:

Duzgoep caen leihhaih,

Bae ndaw haij ndaem coeng,

Duzbing goj leihhaih,

Bae ndaw boengz hoenxciengq.

（27）