（ciep geiz gonq）

Gizsaed Gyasuh mbouj dwg mbouj naemj okbae youz, couhdwg baeyouz hix aeu yungh ngaenz, de baenzlawz miz gij ngaenzhoengq neix ha? De maqmuengh ngoenzngoenz miz hong guh, miz hong guh cijmiz souhaeuj. Caiqgangj boh’au yied bi yied geq lo, geij bi neix daeuj gingciengz haeuj yihyen dajcim, de aeu cagaenj ra ngaenz ne! .

Gyasuh gaen Linz lauxbanj bi lai, gij cingzgvang ndawcangj de cungj sug liux lo, gijmaz doxgaiq vaih le de cungj rox coih. Linz lauxbanj mboujdan gya ngaenzhong hawj de, lij cuengqsim hawj de guenjleix gij hong ndawcangj dem.

Linz lauxbanj yawj youq ndawda, rox Gyasuh dwg bouxcoz ndei ndeu, nanz mbouj nanz heuh de bae doengzcaez gwn caeuz, ndoet laeuj gangjgoj, baedauq geij baez, Gyasuh caeuq Dahrang couh sugnaj lo, Dahrang miz saeh ra de seiz cungj heuh de Gosuh.

Linz lauxbanj gingciengz youq dangnaj Linz Yangh gangj, Gyasuh cungj vunz neix mwhneix nanz miz lo, couhdwg baenzneix geq lo caengz aeu ndaej yah, miz di hojsik, doeklaeng lijnaeuz baezlaeng itdingh aeu gaisau dah lwgsau he hawj de.

Miz Gyasuh bangfwngz, Linz lauxbanj couh miz seizgan okbae caeuq vunz damz seng’eiq , aen cangj neix seng’eiq yied daeuj yied hoenghhwd, bi souhaeuj geij fanh maenz daezsang daengz geij cib fanh.

Mbwn miz ndit miz fwn, vunz miz fuk miz nanh, miz baez he Linz lauxbanj okbae caeuq vunz damz seng’eiq, de cingq haici dauq ndaw- cangj, ginggvaq diuzroen youh gaeb youh goz seiz, miz gyaq cihuq he vaiqfwtfwt hai gvaqdaeuj, daemj haeuj aen ci Linz lauxbanj bae, aen ci Linz lauxbanj sanq youq gwnzroen. Linz lauxbanj hix ninz youq gyangroen, lwed yied lae yied haenq, doeklaeng caengz soengq daengz yihyen, Linz lauxbanj couh ce mingh gwnzroen lo.

Dahrang soundaej siusik daxboh gvaqseiq seiz, dangciengz ngunh laemx lo.

Dahrang singj gvaqdaeuj le “u u” daej dwk mboujdingz, daej daengz seiz haenq youh caiq ngunh gvaqbae, singj gvaqdaeuj caiq daej.

Linz lauxbanj dwg vunz baihrog daeuj daengz neix banhcangj, youq gizneix mboujmiz saek boux beix- nuengx caencik, gij saehlaeng de gig hoj banh, gyahwnj Linz Yangh youh dwg mehmbwk, gij saeh neix de coengzlaiz mbouj raen gvaq, mboujrox baenzlawz guh.

Gyasuh raen Dahrang hojlienz, caj de daej dingz le couh caeuq de guhdoih bae yihyen aeu diuz goet Linz lauxbanj dauq ndawcangj, ciuq dangdieg fungsug, hawj de swiqndang, rieg buh, haeujfwenx, yienzhaeuh caiq cingj goengsae daeuj guhdauh cij dawz goet de bae coemh.

Aen gyaranz baenzneix ndei, gangjnaeuz mboujmiz couh mboujmiz, caen dwg hawj vunz sim’in dangqmaz.

Vihliux fuengbienh ciuqgoq Dahrang, mboengq seizgan haenx Gyasuh couh dawz mbaw mbinj he daengz ndawcangj bae ninz.

Fwn geij ngoenz geij hwnz doek mboujdingz, mizseiz banhwnz fwn doek gap byajmaenj “bibi baba”, Dahrang youh lau youh saenz, song sam hwnz cungj ninz mbouj ndaek, de couh heuh Gyasuh haeuj rug bae ninz .

Bouxsai caeuq mehmbwk youq caemhcaez, boux he caengz aeu, boux he caengz haq, fwnz sauj feiz haenq, mbouj geij nanz, aendungx Dahrang couh hung lo.

Mizndang sam ndwen le, gyoengqde couh gietvaen lo, gietvaen ngoenzhaenx, gyoengqde dawz diuz- mingz cangjbaiz gaij gvaqdaeuj, heuh guh “Ranzranz Rang Haeuxsan Gyahgunghcangj”, aenvih diuz mingz- coh Gyasuh miz cih “gya” ndeu, diuz mingzcoh Dahrang miz cih “rang” ndeu, eiqsei dwg naeuz, gij haeux ndawcangj gyoengqde rang bae daengz cien gya fanh hoh. Miz vunz guhfwen naeuz:

Gaej riu lwggyax hoj,

Roxguh couh miz ngaenz,

Ngoenzneix guh ndaejdaengz,

Duzgoep bienq baenz lungz.

（sat）