Geij ngoenz gonq, miz aen hanghmoeg Seiqgyaiq Yinzhangz ok daigvanj guh ndeu heuhguh Hozciz Si Yizcouh Gih Hinghveij Ciennieb Hozcozse, youq ndaw neix laj aen bungz hung aeu ngeiq gonengznuengx ndaem raet gwn, gyoengq gunghyinz cingq nyaengqnyi’nyi nei mbaet bad raetnaeng daih’it bineix. Doenghgij raetnaeng miz vunz roengz dinghdan aeu neix yaek“hwnjdin”bae coh Gvangjdungh、 Liujcouh daengj dieg.

Yizcouh youq daengx guek dwg aen dieggiek ceiq hung ndaem gonengznuengx ciengx nonsei, aen hozcozse neix yungh ndei yungh doh gij swhyenz laiak neix, aeu ngeiq gonengznuengx daeuj ndaem raet gwn, baenzneix guh mboujdan yungh ndei gij huqfeiq huqvut ndaem gonengz- nuengx ciengx nonsei cix mizok haenx, vanzlij hawj cienzgoek bae noix、cienzcanh ndaej lai, guhdaengz hawj aen canjnieb ndaem gosangh ciengx nonsei baenqcienj hwngfat. Bi 2022, aen gih neix miz 39.25 fanh moux najdieg suen gonengznuengx, bi miz ngeiq gonengznuengx 40 fanh dun doxhwnj；yungh ndei 9.6 fanh dun ngeiq gonengznuengx, ciemq gij cungjsoq ngeiq gonengznuengx bae 24%；guhbaenz 8550 fanh daeh ngeiq gonengznuengx ndaem raet, ndaej 2.65 fanh dun raet ndip, canjciz miz 2.3 ik maenz.

（Liu Ginglingz Loz Dauh）