Dahsau ndaw danhvei Lij Siujvah gezvwnh lo! Vunzlai miz di doeksaet! Lij Siujvah gingqyienz haq hawj boux vunz ranzgungzhoj youz de bangcoengh haenx, couhdwg Cangh Yinghyungz, daeglwg Cangh Wbauj ndaw Mbanjlingz!

Cangh Wbauj dwg boux vunz lauxsaed mbouj maij gangjvah ndeu, uk mbouj lingz geijlai, caiq gya boihseiz yinhheiq ca, ciengx gaeq deng raq, ciengx mou baenzbingh dai lo. Cangh Wbauj ciq haujlai cienz dauq soengq daeglwg doeg dayoz bizyez lo, daeglwg de hag gisongih gunghcwngz conhyez, dauqma daengz dieg iq neix mbouj miz maz yungh. Cangh Wbauj ciengzseiz ienq naeuz, mwngz ha, danghnaeuz codaeuz hag aen conhyez ciengx mou roxnaeuz ciengx gaeq ndeu, raeuz couh fatcaiz lo, hag gijmaz gisongih conhyez, ranz raeuz lienz aen dennauj ndeu cungj mbouj miz, lij miz ndaek roet yungh dem! Gyoengq caencik baengzyoux ciq cienz hawj Cangh Wbauj haenx cungj naeuz, daeglwg mwngz ha, yungh cienz bae doegsaw ndwi lo! Caen ienqhoij ciq cienz hawj sou ha!

Cangh Wbauj dwg boux vunz aeunaj ndeu, doiq gyoengq caencik naeuz, sou cuengqsim, gou caeuq daeglwg gou couhsuenq daeh cien, hix ra ndaej cienz dauqma boiz hawj sou! Couh yienghneix, Cangh Wbauj caeuq daeglwg de daeuj daengz aen cangjcien liz ranz miz ngeihcib leix gyae haenx daeh cien. Daj ndaw yiuzcien daeh cien cang ci, moix ci ndaej hajcib maenz ngaenz, boux ndeu cang ndaej sam seiq ci. Hoeng gij seng’eiq aen cangjcien mbouj suenq ndei, mboujdwg mbouj miz cien couhdwg mbouj miz vunz daeuj cawx cien, moix ngoenz hix canh mbouj ndaej geijlai cienz.

Baez neix cingcinj banggungz, Cangh Wbauj ndaej bingzguh ranzgungzhoj lo. Cangh Wbauj baenzngoenz naj saepsat nei, bungz vunz couh naeuz, baezneix najmong lai lo, daenj aen mauh gungzhoj le baezlaeng baenzlawz ra bawx ha! Aiyo! Bonjlaiz soengq lwg doeg dayoz maqmuengh ndaej hawj cojcoeng najrongh, doeklaeng mbouj ndaej hawj cojcoeng najrongh dauqfanj daenj aen mauh gungzhoj ndeu.Mingzcoh ngoenzngoenz nem youq gwnzciengz bakmbanj, henzgyawj bouxboux cungj rox swhgeij dwg ranzgungzhoj camhseiz lo.

Lij Siujvah bi’gvaq dayoz bizyez couh gauj haeuj ndaw danhvei, vunz lumj mingzcoh, yiengh gyaeu baenz va, doengh bouxsai ndangdog haenx cungj maij nemgyawj de dangqmaz bae. Lij Siujvah gag miz siengjfap, mbwn cij rox dwg gijmaz siengjfap. Cungj mbouj ra boux guhyoux. Ciuq baihgwnz anbaiz fuzbinz yinvu, Lij Siujvah bangfuz Cangh Wbauj.

Lij Siujvah daeuj daengz ranz Cangh Wbauj dienz biuj seiz, cij rox ranz de ngamq miz song boux vunz, de caeuq daeglwg de. Youq mwh dienz daengz gij vwnzva cingzdoh daeglwg seiz, Cangh Wbauj naeuz, dayoz bwnjgoh gisongih conhyez! Lij Siujvah gig geizheih, couh cam, dayoz bizyez lij dwg ranzgungzhoj? Cangh Wbauj ciuqsaed gangj, gij cienz doeg dayoz haenx cungj dwg ciq aeu, seizneix mbouj miz ngaenz boiz, hix ra mbouj ndaej gunghcoz, bizyez daengz seizneix itcig daeh cien aeu cienz boiz caiq!

Lij Siujvah naeuz, seizneix ndawyangh cingq ciuaeu boux loeghaeuj saenqsik fuzbinz, gou yawj daeglwg mwngz hab aen gangjvei neix. Mwngz heuh de okdaeuj, gou caeuq de gangj baez he ba!

Yinghyungz ha, Yinghyungz! Ma yaep ndeu, ganbu ndawyangh miz vah caeuq mwngz gangj! Cangh Yinghyungz gipgip muengzmuengz daj ndawreih ganj dauqma. Mwngz couhdwg daeglwg Cangh boh’au? Lij Siujvah yawj daeg- mbauq dangqnaj baenzmbauq neix. Dwg lo, gangj daeuj najmong lai lo, cungj daenj aen mauh gungzhoj lo. Cangh Yinghyungz sing iq naeuz.

Lij Siujvah lwnh de rox le gij cingzgvang ndawyangh ciuaeu boux loeghaeuj saenqsik fuzbinz. Youh naeuz, mwngz nyienh daeuj lwi? Ndaej demgya faenh souhaeuj ndeu, doengzseiz hix suenq dwg bang ndawyangh guh faenh hong ndeu! Cangh Yinghyungz naeuz, cijaeu sou aeu gou, gou haengjdingh bae lo. Lij Siujvah naeuz, ngoenzlawz gyau caizliu, mwngz daiq gij sinhfwncwng caeuq bizyezcwng mwngz bae ndawyangh bangunghsiz, itdingh ndaej ha!

Doeklaeng, Cangh Yinghyungz ndaej guh boux loeg- haeuj saenqsik fuzbinz ndawyangh. Aenvih conhyez gisuz netsaed, hong guh ndaej swnh sim swnh fwngz. Miz ngoenz ndeu doengxhaemh, Lij Siujvah daj denva hawj Cangh Yinghyungz. Lij Siujvah naeuz, haemh neix mwngz ndaejhoengq lwi? Ndaejhoengq raeuz bae gwn caeuzhwnz ba! Cangh Yinghyungz naeuz, gou mbouj miz cienz ha, cienzhong lij mbouj caengz fat ne! Lij Siujvah naeuz, mwngz vunz daeuj couh ndaej lo, gou ok cienz ha!

Lij Siujvah hix ciengzseiz bae ranz Cangh Wbauj bang gungz, lij bang Cangh Wbauj saeg buhvaq, baet ranz sauq rug, cingjleix gwnzcongz. Cangh Wbauj lienzmuengz naeuz, Lij ganbu, mwngz daeuj couh ndaej lo, lij guh gij hong neix, vunz rox le couh riu ranz dou!

Lij Siujvah dingq le, riu naeuz, baezlaeng mwngz bouxlaux gaej heuh gou ganbu lo, Yinghyungz seizneix dwg baengzyoux gou lo, daj seizneix doxbae mwngz couhdwg boh gou lo!

Cangh Wbauj dingq sat gij vah neix, laeglemx doeksaet yat, naeuz, neix baenzlawz ndaej ne, seizneix cwngcwz baenzneix ndei, bang gungz lij bau hawj bawx?

Lij Siujvah dingq le angq dwk riu lo, naeuz, dwg ha!

Lij Siujvah haq hawj Cangh Yinghyungz, miz maz mbouj baenz?