Sai: Gwnz bo baknya heu,

Biendah vareux hoengz,

Sam nyied sam daeuj daengz,

Naemj ra ngaenz doiqfwen.

Mbwk: Sam nyied sam daeuj daengz,

Mbanjcuengh saengz(maij) fwendoiq,

Dou dungxcaiz daiq noix,

Doiq mbouj deng gaej riu.

Sai: Mbouj heuh dou hix daengz,

Mbouj daengq dou hix daeuj,

Cin daengz mbwn bienq raeuj,

Raeuz doiqfwen doxlienh.

Mbwk: Dwk fwendeiq doxdaeuq,

Fwen mbouj gyaeu hix hoiz,

Dou luenh fwen luenh doiq,

Hoiz mbouj deng gaej lwnh.

Sai: Hai fwengeiq doxdaeuq,

Vunz gvaqdaeuj hix haenh,

Sou fwen baenzlai haenq,

Maenh gvaq raeuz geij boix.

Mbwk: Dou fwen cix mbouj rox,

Gyoj cix gyoj mbouj deng,

Boekbienq lumj doxceng,

Dwgrengz lo youxnoix.

Sai: Sou fwen baenzlai rox,

Gyoj coenzcoenz cungj deng,

Dwk daeuj lumj lwglengz,

Ceng dou mboujrox doiq.

Mbwk: Dou fwen le mbouj baenz,

Dwg haemz lo youxdoq,

Ningznyienh daeuj gangjgoj,

Dauq ndaej gyoj saek sauh.

Sai: Guhfwen coenzcoenz baenz,

Dwgcaengz maz le doq,

Sou heuh dou gangjgoj,

Vah bouxhoj nanz miz.

Mbwk: Coenz fwen geij bak naek,

Dou yied caek yied ngunh,

Sing sou baenzlai unq,

Dwk dou ngunhlinlin.

Sai: Coenz fwen geij bak naek,

Sou baez gyaeg couh ok,

Caeuq sou doengz baksok,

Sou doq okrwgrwg.

Mbwk: Coenz fwen geij bak gaen,

Dou cungj naemj mbouj ok,

Mboujdwg lumj daemjrok,

Dok geij baenz couh baenz.

Sai: Coenz fwen geij bak gaen,

Sou baez naemj cix ok,

Mbin daeuj lumj laep mok,

Lok daeuj lumj raemxrongz.

Mbwk: Coenz fwen geij bak naek,

Sou rox gyaeg rox baenq,

Coenz fwen geij bak gaen,

Dou raen laengxlele.

Sai: Coenz fwen sou caen naek,

Dou gyaeg hix mbouj baenz,

Dou dwg ukgyaeuj laen,

Baenz coenz mbouj yungzheih.

Mbwk: Sou rox ut rox euj,

Gveuj lumj geu cag vaiz,

Ciuq gyoengqsou dungxcaiz,

Dwk dou dailengngeng.

Sai: Mbouj rox ut rox euj ,

Gveuj gvaq vang gvaq raeh.

Saek coenz fwen mbouj bae,

Lauxsae vaiq daeuj coih.

Mbwk: Fwen sou baenzlai naek,

Caek he hix mbouj binh,

Fwen sou gokngingnging

Dwk dou in youh manh.

Sai: Mwngz naeuz fwen dou naek,

Caek he hix mbouj bienq,

Daeuj caeuq sou doiqfwen,

Dungx dou cienqlele.

Mbwk: Raeuz aeu caengh daeuj daep,

Fwen sou naek lumj rin,

Raeuz aeu vunz daeuj bingz,

Suenq sing sou leihhaih.

Sai: Caiq aeu caengh daeuj daep,

Mbouj naek lumj coenz gim,

Caiq aeu vunz daeuj bingz,

Sing mbouj beij song youx.

Mbwk: Sing sou gokngingnging,

Dwk lumj rin yaek mbanq,

Sing sou daeujcancan,

Dwk lumj namh yaek sinz.

Sai: Sing dou mbouj baenz sing,

Vunz dingq hix raen fanz,

Daeuj lumj raemx gienghdan,

Sanq gvaq vang gvaq raeh.

Mbwk: Sing sou baenzlai gyuk,

Seuq lumj duk lumj gaeu,

Sing sou baenzlai gyaeu,

Dingq daeuj bouxboux haenh.

Sai: Rox dwg sou rox lai,

Dai dwg dou dai gonq,

Caeuq sou fwen doxgyonj,

Deng sou byonj dauqngangz.

Mbwk: Sou fwen baenzlai gyuk,

Rox hup(haep) caiq rox hai,

Fwen sou baenzneix lai,

Dwk dou dai roengz namh.

Sai: Fwen dou cix mbouj gyuk,

Mbouj rox ut geijlai,

Aenmingz naeuz bouxsai,

Gvai mboujgvaq mehmbwk.

Mbwk: Sing sou baenzlai swnh,

Dwk dou mwnh liuxnauq,

Bungz yienghneix lwglauq,

Sau gizlawz mbouj baih.

Sai: Sing fwen dou mbouj baenz,

Raen saetlaex liuxnauq,

Fwen dou sohngaungau,

Cauznauh sou song boux.

Mbwk: Fwen sou baenzlai unq,

Dwk dou mwnhlinlin,

Coenzcoenz dwk haeuj sim,

Dauq bae ninz mbouj ndaek.

Sai: Sing fwen ndangjndingnding,

Vunz dingq hix dwglau,

Vwi(hemq) daengz lwgda hau,

Lwgsau bouxlawz haenh.

Mbwk: Ciuq gij sou dungxsaej,

Dou daejgeq bae ranz,

Ciuq gij vah sou gangj,

Dou daimangq ngoenzcog.

Sai: Ciuq gij dou dungxsaej,

Bin mbouj ndaej hwnj sang,

Lumj gyoengqsou rox cang,

Luenh gangj yienghneix vah.

Mbwk: Cibngeih diuz gaeu heu,

Mbouj beij diuz gaeugat,

Geij cib boux daihhag,

Suenq fajbak sou baenz.

Sai: Cibngeih diuz gaeu heu,

Mbouj beij diuz gaeuvengj,

Aen guek geij cib sengj,

Genj ndaej sou leihhaih.

Mbwk: Sou gangj yienghneix vah,

Dwk byadah hix caem,

Ciuq aen bak sou baenz,

Dwk byadaemz dai ngunh.

Sai: Dou gangj yienghneix vah,

Dwk byadah mbouj caem,

Lumj cungq nyingz roengz daemz,

Bya haeuj haenz mbouj youq.

Mbwk: Ciuq aen bak sou mbaeu,

Raeuz baenz byaek dwk lauz,

Fwen okdaeuj caucau,

Sau Namzningz nanz hoiz.

Sai: Ciuq gij vah dou gangj,

Mbangj deng mbangj mbouj deng,

Sou dingq raen dwgrengz,

Dou sim genxlele.

Mbwk: Ciuq aen bak sou mbaeu,

Dwk dou yaek ce mingh,

Ngoenzneix ndaej gyausing,

Ce mingh hawj mwngz dawz.

Sai: Ciuq gij vah dou gangj,

Mbouj ndaej hamj bae conq,

Vah dou gangj lonzdonz,

Sou onjsim daeuj dingq.

Mbwk: Ciuq gij vah sou gangj,

Dwk maeuzranz dauqdingq,

Ciuq gij vah sou gim,

Dwk rin rox byaij loh.

Sai: Ciuq gij vah dou gangj,

Mbouj mbanq hix mbouj sinz,

Ciuq gij vah dou gim,

Maningq hix mbouj lienh.

Mbwk: Ciuhgeq caen rox cauh,

Ciuhlaux caen rox cawq,

Guhfwen gawq ciep gawq,

Seizlawz cij doxbyag.

Sai: Raeuz fwen baenzlai ndei,

Lumj vameiz doxngaeuh,

Sing fwen unqngaeungaeu,

Naeuz doxbyag guh maz.

Mbwk: Mbouj byaij roen hix gyae,

Mbouj bae ngoenz hix haemh,

Guhfwen miz ngoenzlaeng,

Guhcaemz miz ngoenzcog.

Sai: Nanz ndaej daeuj doxraen,

Caen mbouj siengj doxbyag,

Sim raeuz heux baenz cag,

Byag bae nanz cuengq sim.

Mbwk: Byag mwngz baen liux youx,

It gou gouz it ing,

Byag mwngz bae liux gim,

It gonj rin it naengh.

Sai: Byag mwngz bae liux raz,

Doenghnaz duenh vunz byaij,

Byag mwngz bae liux gvai,

Doeknaiq yaek ce mingh.

Mbwk: Byag mwngz bae liux youx,

Dungx gou cieglinlin,

Langh song raeuz miz sin,

Cin daengz caiq doxhanh.