177. Cam:

Gou cam mwngz beix ha,

Gaiq maz rungh haeux han?

Gou cam mwngz beix ha,

Gaiq maz ranz yah maiq?

Hoiz:

Haz ndaij hwnj fwdfwd,

Gaiq de rungh haeux han,

Ranzmiuh youq haenz giemx,

Gaiq de ranz yah maiq.

178. Cam:

Gou cam mwngz beix ha,

Gaiq maz rungh lwggam?

Gou cam mwngz beix ha,

Gaiq maz ranz mbauq venj?

Hoiz:

Dak lwg ndo baenz dungh,

Gaiq de rungh lwggam,

Bouxdauh dawz baed bang,

Gaiq de ranz mbauq venj.

179. Cam:

Gou cam mwngz beix ha,

Gaiq maz guk da ndeu?

Gou cam mwngz beix ha,

Gaiq maz meuz da dog?

Hoiz:

Dak lwg ndo baenz dungh,

Gaiq de guk da ndeu,

Bouxdauh dawz baed bang,

Gaiq de meuz da dog.

180. Cam:

Gou cam mwngz beix ha,

Gaiq maz guk da ndeu?

Gou cam mwngz beix ha,

Gaiq maz meuz ganj reih?

Hoiz:

Aen daeng youq ndaw rug,

Gaiq de guk da ndeu,

Vunz daeq gyaeuj ngeungeu,

Gaiq de meuz ganj reih.

181. Cam:

Gou cam mwngz beix ha,

Gaiq maz mwnz baenz gyaeq?

Gou cam mwngz beix ha,

Gaiq maz saeq gvaq byoem?

Hoiz:

Gou hoiz mwngz nuengx ha,

Ronghndwen mwnz baenz gyaeq,

Gou hoiz mwngz nuengx ha,

Seigyau saeq gvaq byoem.

（26）