Youq ngeihcib sigij bet goujcib nienzdaih, aen gyaranz doiq goeng- yah mboujguenj saimbwk cijndaej seng boux lwg ndeu, hoeng youq lajmbanj, gyoengqvunz mboujdwg baenzneix naemj.

Lajmbanj reihnaz lai, cungj miz gij hong guh mbouj liux, vunz noix le couh guh mbouj gvaqdaeuj, ndigah Gyasuh ngamq maj daengz song bi hung, aendungx daxmeh de youh hung lo.

Ciuq giva senglwg cwngcwz, seng boux daihngeih mboujdan aeu fad ngaenz, lij deng dawz bae gezcaz dem.

Vihliux ndoj giva senglwg, daxmeh Gyasuh couh saet haeuj ndawrungh bae youq, ranzrongh guh hongreih, ranzlaep ninz ndawgamj, gwndaenj couh hawj daxboh Gyasuh youq ranz cawj ndei le cij soengq bae.

Rongh ok laep haeuj, gwn ninz cungj dwg youq ndawgamj. Hoengheiq caeuq vanzging haengjdingh mbouj ndei, mbouj gvaq geijnanz, daxmeh Gyasuh couh byom dwk naj henj noh reuq lo.

Senglwg geij ngoenz haenx, nanznanz cungj seng mbouj okdaeuj. Gvaq song sam ngoenz seizgan le cij heuh vunz ram bae yihyen. Ngamq daengz byonghroen, daxmeh Gyasuh couh meh rangh lwg dai bae lo. Cungj neix gyoengqvunz dangdieg heuhguh dai raemxdumh.

Gvaqlaeng daxboh Gyasuh baenz binghyak, gai daengz vaiz caeuq max bae yw cungj yw mbouj ndei, doek- laeng hix laepda gvaqseiq.

Bohmeh dai bae liux, boh’au Gyasuh couh umj de bae ciengx.

Boh’au dwg goengngoemx, ciuh- vunz mbouj miz yah, cijmiz song gan ranzngvax iq, gan he duenh ndeu guh dajcawj, duenh ndeu gwnnaengh; gan he duenh ndeu ciengx mou ciengx vaiz, duenh ndeu couhdwg diegninz lo.

Gyasuh mwh hwnj hagdangz, aenvih mbouj miz vunz guh hong reih, de ngamq ndaej doeg song bi saw couh doiqhag youq ranz bang boh’au langhcwz.

Gyasuh coengmingz, youq ranz cungj bae ciq gij sawgaeuq vunz daeuj yawj. Doeklaeng mboujguenj bauqceij roxnaeuz sawcuenh, de cungj doeg ndaej raeuzlili.

Gyasuh gaenxguh, gij hong reih hong ranz soqlaiz mbouj hawj boh’au de naeuz swhgeij couh doenghfwngz bae guh, vunzmbanj cungj haenh naeuz boh’au de ndaej lwgciengx neix, mizfuk lai lo.

Cin bae cou ma, Gyasuh maj daengz ngeihcib geij bi, daengz seiz aeubaz lo, hoeng gyaranz saedcaih hoj, couhdwg miz lwgsau nyienh haq daeuj hawj de, hix mboujmiz diegyouq, da raen yaek ndaej samcib lo, caengz baenz gyaranz.

Geij bi gonq, cwngfuj miz cwng- cwz roengzdaeuj guh dawzcinj bang- fuz, mboujdan faen hawj Gyasuh dauq ranz he youq ndawsingz, lij anbaiz de haeuj cangj bae guhhong dem.

Aen cangj neix dwg nienj haeux- gok, lauxbanj dwg vunz baihrog daeuj banhcangj, singq Linz, gyoengqvunz cungj heuh de Linz lauxbanj.

Dah lwg Linz lauxbanj heuhguh Dahrang, ngeihcib seiq bi, doeg daihhag bizyez okdaeuj bi lai lo caengz miz hong guh, bingzseiz couh youq ranz bang Linz lauxbanj geiqgeiq soq, roxnaeuz guh di dajcawj.

Gyasuh haeuj aen cangj neix daeuj bi lai lo, soqlaiz mbouj raen mehyah lauxbanj gvaq, dingqgangj mehyah lauxbanj gwndoeg, geij bi gonq deng dawz bae naenghlauz cibroek bi, de ngamq haeujbae song bi lai, souh mbouj ndaej gij haemzhoj ndawlauz couh ndaem gyaeuj haeuj ciengz bae dai.

Gyasuh ngamq haeuj cangj daeuj seiz, roxnyinh miz faenh hong guh aeu ngaenz mbouj yungzheih, de cibfaen insik faenh hong neix, guh gijmaz cungj roengzsim.

Mizseiz doxgaiq vaih le, gyoengq vunzlai couh okhaw baeyouz, Gyasuh mboujmiz giz bae, de couh youq ndawcangj caeuq Linz lauxbanj coih doxgaiq.（caengz sat）