Vangz: Dwg ha!

Gyangh: Daj gizlawz vat congh ne?

Byoengq: (Fwngz vix baihnaj gwnzbya) Couh baihnaj goengq bya haenx ha!

Cinz: Yienghneix mbanj sou couh youq baihlaeng goengq bya neix?

Vangz: Couhdwg ha!

(Ciengq) Daj neix byaij daengz Veizdangz raeuz,

Heux bya gvaq gemh cibhaj leix;

Langhnaeuz ndaej hoenx byoengq congh dat,

Liz neix mbouj daengz song leix gyae.

Cinz: Gyawj cib lai leix loh bw! Yienghneix, sou vihmaz mbouj fan gvaq bya bae ne?

Vangz: Ae, ndaek dat neix yaek miz bak mij sang, lienz duzlingz cungj nanz benz hwnjbae; danghnaeuz vunz byaij ndaej, cojgoeng caeux couh mbouj gvax baenzlai gyae lo.

Gyangh: Danghnaeuz dub byoengq aen gamj neix, gujsuenq miz geijlai raez?

Byoengq: Ciuq suijligiz daeuj caeksuenq hix couh roekcib lai mij ba.

Gyangh: (Ngeix hwnjdaeuj) O——Gungh- cwngzlieng hix mbouj suenq hung ha!

Byoengq: Danghnaeuz doeng goengloh le, ndawmbanj miz rinnohmou ……

Cinz: Gijmaz, gijmaz heuh guh rinnohmou?

Byoengq: (Sikhaek haeuj baihndaw bae, gaem ndaek rin geizheih lumj nohsamcaengz nei) Yawj, couhdwg cungj rin neix!

Gyangh: A——Neix heuhguh fanghgejsiz, dwg cungj rinliuh ndaej gyagoeng baenz gunghyibinj haenx!

Vangz: (Ciengq) Henz Mbanjveizdangz geij goengq bya,

Cienzbouh dwg cungj rinnohmou;

Bingzseiz aeu riengh mou yiengz vaiz,

Seiqdaih doxbuenx lumj haexma.

Cinz: Eiya, caen dwg yak mbouj aeu doxgaiq, vunz bya mbouj rox bauj ha!

Byoengq: Mbouj dwg mbouj rox——

(Ciengq) Aenvih doeng loh dwg gvanhgen,

Loh doeng cij rox miz gihvei;

Ruzfiengz ciq naq caj rumzdoeng,

Muengh bauj danqheiq simgaenj ndwi!

Gyangh: Deng, doengloh dwg gij saeh gaenj- gip seizneix!

Vangz: Ei, miz ndaek gyaeujbyaraiz neix dangj roen, sim vunzlai cungj liengz liux.

Cinz: Mbouj ndaej, sou yaek caeuq de dox- hoenx, nyengh mbouj doeknaiq!

Vangz: Hai, duzmou caeuq duzguk doxhoenx, mbouj ndaej hingz.

Gyangh: Vei, de gyaeujbyaraiz cungj dwg aeu gijmaz soujduenh gag ciemq Veizdangz?

Vangz: De ha, unq geng giem guh, dwg caen rox gyaj!

Ndei, sou menh gangj, gou yaek ganj baema ra de banhsaeh, bae gonq lo. (Roengz)

Cinz: Dwg caen rox gyaj, baenzlawz gangj?

Byoengq: Daih’it,

(Ciengq) Ndaw swnghcanjdui geij bouxdaeuz,

Cungjdwg beixnuengx de daeuj dang;

(Bwz) Daihngeih,

(Ciep ciengq) Lij miz saeh goeng’ik ndaw- mbanj,

Cienzbouh baulamx byawz gamj gangj!

Cinz: Hai, guengz lai, yakrwix lai lo!

Byoengq: Bi’gvaq seizdoeng, cawz ceh youz- cai caqyouz le, dangseiz lij caeuq geij bak gaen vafeiz, de geij ndaek ganbu ndawdui hix cungj gag faen liux lo.

Gyangh: Baenzneix cungj mbouj geih saekdi, nanzdauh cwngfuj ndawyangh cungj mbouj rox saekdi?

Byoengq: Ei, dou gizneix bya sang vuengzdaeq gyae, aiq dwg ndawyangh guenj mbouj daengz baenzlai bw!

Cinz: Bei, yaeuh vunz hangz vunz, fouz fap fouz dien!

Byoengq: Haenx lij yungh gangj, geij bi gonq ha——

(Ciengq) Guekgya boujdiep coih gvihcaeng- raemx,

Bued hawj suijniz de caemh comz;

Moix hoh cij fat seiq haj bau,

Lw gij suijniz gag gwn liux!

Gyangh: Cungj gag gwn liux?

Byoengq: Miz maz banhfap, ranz de seizneix youq geij fungh suijnizlouz haenx, couhdwg bihaenx aeu suijniz lwyawz daeuj guh ha!

Gyangh: Baenzneix couh miz geij cib dun bw!

Byoengq: Aiq miz bw.

Cinz: Baenzneix gangj daeuj, de caen dwg ndaek baqvuengz ndawmbanj lo!

Byoengq: Ei——

(Ciengq) Gaem boux dam’aeu, fanj boux nduknaeuh,

Vihmaz mbanj raeuz muengh mbouj raen?

Cinz: (Ciep ciengq) Ndawbiengz ndei yak vunz sim dingh,

Bauqwngq daengz seiz coih nanz deuz!

(Bwz) Lauxbanj, boux dungxyak rimroenx haenx, deuz mbouj ndaej law!

Byoengq: Vah dwg baenzneix gangj, mbouj rox seizlawz cij daeuj daengz ha! Ndei, gou haeujbae yawjyawj, gij souh rek daihseiq hix wnggai cug lo. (Roengz)

Gyangh: Deng, raeuz hix aeu ganj loh lo.

(Song vunz haidin、lizhai)

Cinz: Suhgi ha——

(Ciengq) Mbouj daeuj saedcaih mbouj rox- daengz,

Byawz rox Veizdangz baenzneix rwix.

Gyangh: Dwg ha, nanz siengj ndaej daengz ha!

(Ciep ciengq) Langh ra cwzyin caz goekgaen,

Cien sei fanh geu youq lingjdauj.

Cinz: O, lij miz——

(Ciengq) Haemhneix gwnninz youq Veizdangz,

Song raeuz ndangfaenh baenzlawz bauq?

Gyangh: Eiya, mbouj dwg gangj ndei la!

(Ciep ciengq) Lauj Gyangh、Cinz Giuj vunz diegrog,

Dwg boux dajcawx canghgajmou.

Cinz: Yienghhaenx raeuz baenzlawz cij mbouj heiqgyaj caen guh ne?

Gyangh: Lij mbouj yungzheih——youq cauz- mou lwnh gyaq seiz, couh……

Cinz: (Gaenq rox eiqsei) Rox lo——

(Ciengq) Couh gangj hangzcingz ok vunzhung,

Itseiz gig nanz gangj baenz gyaq;

Gyangh: Couhdwg ma——

(Ciep ciengq) Haeujdaengz gak hoh cunz minzcingz,

Daengjrwz lai dingq siuj capvah.

Cinz: Deng, mingzmingz Veizdangz——

(Ciengq) Bauqdaeuj ciengx vaiz dwg haj hoh,

Baenzlawz youh bienqbaenz sam ranz?

Gyangh: Lijmiz ne——

(Ciep ciengq) Cienzngaenz it fanh bienq caet cien,

Vihmaz yenzyinh nyinhcaen caz!

Cinz: Ae, gizneix, caen dwg duz nengznyaen heuloeg ndeu ha. Suhgi, baezlaeng mwngz baenzlawz siengj ha?

Gyangh: Raeuz aeu ra ok aen banhfap ndeu, gaijgez fat cienz banggungz oknyienh gij conghroh haenx bae!

Cinz: Neix ndei banh!

Gyangh: Gangj!

Cinz: Baezlaeng ha——

(Ciengq) Dang’an banggungz aeu dawzcinj,

Fat cienz hanghmoeg aeu gvidingh;

It aeu cawjranz sinhfwncwng,

Ngeih aeu bonjfaenh daeuj nyinhlingx.

Gyangh: Cungj banhfap neix ndei! Baezlaeng ha——

(Ciengq) Buedroengz leih minz gak hanghmoeg,

Cienvunz fucwz gaen daengz daej.

Cinz: Dwg ha, ——

(Ciep ciengq) Mingzsaeq cangmuz sij cingcuj,

Gyaep cwz cidu aeu genhciz!

Gyangh: Cinz Giuj ha, mwngz naeuz baez- laeng gij hong banggungz Mbanjveizdangz, baenz- lawz bae guh?

Cinz: Hai! Neix dwg gij saeh yangh dangjveij mwngz lo.

Gidij gunghcoz ma, gou haengjdingh dingq mwngz Lauj Gyangh lo!

Gyangh: Mbouj, dangjveij lij caengz miz gezyi, neix dwg siengj sien dingq gij yigen mwngz ma.

Cinz: Ndei ha——

(Ciengq) Daih’it goengloh aeu hai doeng,

Yienzhaeuh fatdoengh ra hanghmoeg;

Maeuzveh haifat fanghgejsiz,

Seng’eiq swhginh yienj hungzduz.

Gyangh: Mbouj loek. Gangj ndaej ndei!

Cinz: Lij miz gienh saeh dem!

Gyangh: Laebdaeb gangj!

Cinz: Haedsaed caizliuh aeu cingcuj, gou cinzciuj. Mwngz hing geq——

Gyangh: Vei, mwngz, mwngz gangj gijmaz?

Cinz: Hw, mwngz lumz la, mwngz mbouj dwg hing geq caujbyaek seiz aeu daeuj guh boiqliuh haenx ma?

Gyangh: Ei, gaej luenh bamz, gangjriu mwngz laihnaeuz caen dahraix! A, a, a……(Loq rox di lo) Deng, mwngz couhdwg gij cinzciuj ndaej cawz haeu sing bya haenx lo!

Cinz: Mbouj loek ha, de gyaeujbyaraiz danghnaeuz caen miz saedsaeh dahraix……

Gyangh: Gou “Hing geq!”

Cinz: Dou “Cinzciuj”!

Hab: Couh dawz duz byaraiz neix, cab baenz song faj, faen song mbiengj hojgoh, daihgya gwn liux bae!（sat）