165. Cam:

Haet neix mwngz okdaeuj,

Duz maz dai daihloh?

Haet neix mwngz okdaeuj,

Duz maz baij seiqfueng?

Hoiz:

Haet neix gou okdaeuj,

Duzndwen dai daihloh,

Haet neix gou okdaeuj,

Duzma doh dawz bae.

166. Cam:

Haet neix mwngz okdaeuj,

Duz maz ndwn song baih?

Haet neix mwngz okdaeuj,

Duz maz baij seiqfueng?

Hoiz:

Haet neix gou okdaeuj,

Saeceij ndwn song baih,

Haet neix gou okdaeuj,

Go’ndoek baij seiqfueng.

167. Cam:

Gou cam mwngz beix ha,

Gaiq maz gaeu vaiz geq?

Gou cam mwngz beix ha,

Gaiq maz rin req fouz?

Hoiz:

Lwggyep youq gwnz congz,

Gaiq de gaeu vaiz geq,

Vunz cien haj nyeqngeq,

Gaiq de rin req fouz.

168. Cam:

Gou cam mwngz beix ha,

Gaiq maz sang hamj mbanj?

Gou cam mwngz beix ha,

Gaiq maz amj gwn vunz?

Hoiz:

Gou naeuz mwngz nuengx ha,

Hoenz feiz sang hamj mbanj,

Gou naeuz mwngz nuengx ha,

Bakdou amj gwn vunz.

169. Cam:

Gou cam mwngz beix ha,

Gaiq maz daep duzmbaj?

Gou cam mwngz beix ha,

Gaiq maz haj duzlungz?

Hoiz:

Fwn doek mwnqfefe,

Gaiq de daep duzmbaj,

Biuz fouz youq gyang dah,

Gaiq de haj duzlungz.

170. Cam:

Gou cam mwngz beix ha,

Gaiq maz daep duzngieg?

Gou cam mwngz beix ha,

Gaiq maz rwed duzlungz?

Hoiz:

Fwn doek mwnqfefe,

Gaiq de daep duzngieg,

Raemx dah lienzfwdfwd,

Gaiq de rwed duzlungz.

（24）