Bouxgeq naeuz, faex aeu naeng,vunz aeu naj. Dwg ha, bouxvunz ma lajmbwn, cungj siengj ndwenngoenz gvaq ndaej miznaj lai di. Lienz lwgnyez hix rox guh vunz miznaj cij ndei. Ciuq gou ngonz guh boux vunz simsienh hauqgingj bouxlaux, vih guek vih minz haenqguh daengj, yienghneix ceiq miznaj.

Miz baez ndeu, gou cam daeglan gou:“Ngoenzneix mwngz daenj geu buh neix bae hagdangz, roxnyinh lawzyiengh?”

De angqvauvau diuqyoekyoek dwk naeuz:“Gyoengq doengzhag gou haenh naeuz hab ndang ndeiyawj engq mbauq, gou dingq le, ndaw sim angqyaepyaep, roxnyinh miznaj dangqmaz!” Dingz le yaepyet youh naeuz:“Daxbuz, bohmeh gou okbae ra ndaej ngaenz lai, hwnj ndaej aen ranzlaeuz moq youh sang youh rongh youh gvangq, dajcang ndaej youh gyaeundei, vanzlij cawx gij gyasei、dengi gauhdangj haenx ma, doengh gij doih gou cungj iet fwngzmeh haenh gou ndaej gwn ndei youq ndei, lumj baenz duz roeglaej doek roengz aen loz haeuxsan bae he, gou dingq le,miznaj raixcaix.”

Gou doq lumh aen gyaeuj daeg- lan doq naeuz:“Danghnaeuz mwngz dingq gij vah lauxsae, gaujsi ndaej ciengj ma lai youh roxsoq roxleix, yienghneix couh engq miznaj lo.”

Daeglan gou fajnaj sikhaek naeuqnet hwnjdaeuj, dauqfanj ienq gou naeuz:“Cungj gvaiq mwngz! Bingzseiz mwngz cungj mbouj hawj gou guh hongranz. Lauxsae heuh dou ngoenznaengz youq ranz lai bang bohmeh guh gij hongranz swhgeij guh ndaej haenx, caemhcaiq lij aeu haghag cawj ngaiz cawj byaek, vanzlij gag sousib ndaw rug bonjfaenh, gij saeh swhgeij gag guh, gaej heuh bouxlaux bangcoengh. Hoeng gou baenzneix hung cawz rox baet ranz, gizyawz cungj mbouj rox guh saek yiengh. Mwngz gangj gij doengzhag gou cam daengz, gou miznaj lwi? Gou siengj swiq vanj, mwngz lau deng vanj vaih, lij lau gvej deng fwngz gou ok lwed dem; gou siengj gag cien gyaeqgaeq, mwngz youh lau deng cien remj; gou naeuz lienh cawj haeuxngaiz, mwngz hix doeng lau sae lau, mwngz gangj yienghneix, gou youq baihnaj gij doih gou saet mbouj saet naj ne?”Gangj sat, fajnaj de saepsetset ngaemgyaeuj dwk.

Gou dingq le, najmong raixcaix,vaiqvaiq nai de naeuz:“Neix dwg aenvih gyaez mwngz, siengj hawj mwngz lai miz di seizgan yawj saw, lai hag ndaej di cihsiz, daengzseiz gauj ndaej hwnj hagdangz ndei, ra ndaej hong ndei guh, gvaq gij saedceij vuenyungz, bohmeh mwngz laux le, hix ndaej yiengj mwngz gij fukheiq.”

“Daxbuz ha, lauxsae lwnh dou naeuz, seiziq mbouj guh hongranz, yienghyiengh cungj dwg bouxlaux bang, daengz hung caeuq bouxlaux doxbiek le, couh raen fangz gaemx- daengx.”

Yienghneix, gou cijndaej dap- wngq de.

Yaepyet, de youh doiq gou gangj: “Daxbuz, mwngz caeuq bohmeh gou gangj, gvaqlaeng gaej bae gij banmizyinx bauqmingz hawj gou hag neix hag haenx, hag diuqfoux yiengh ndeu couh ndaej lo. Hag lai goq mbouj gvaqdaeuj, dwg bekbek va ngaenz, caen dwg ngaenz vut roengz raemx——mbouj miz sing.

Doengxhaemh, gou ninz youq gwnz mbonq boekfan, baenzlawz hix ninz mbouj ndaek. Dwg ha, byawz hix siengj miznaj, hoeng lawzyiengh cij miznaj?

Miz boux naeuz, doenghboux gangj baizciengz, yienjok gyoengqde miz ngaenz lai, baengzyoux hix miz lai, coenz vah ndeu, couh dwg miz bonjsaeh. Hoeng, mwngz naemjnaemj, neix mbouj dwg saj baizciengz sai ngaenz? Yienghneix, gyoengqvunz vihliux miznaj, boux gaen boux, miz di daj laihdai caubanh, hix miz di lawzyiengh cungj guh mbouj ndaej daengz, gyoengq nyiegseiq nanz vih cingz lo. Seizneix guek raeuz cienz- bouh duetgungz, byaijhaeuj le siuj- gangh sevei, boux fouqmiz gaej daih cau daih banh, mienxndaej miz di vunz youh dauq gungz, doengzseiz, gwnzbiengz lij miz binghraq, raeuz aeu fuengzre cijndaej; gaej vihliux miznaj couh siengj doenggvaq lwgnyez “okmingz” daeuj yienh’ok, raeuz aeu gaengaenj“gemjmbaeu”, hawj gyoengq lwgnyez aen mbwndeih vaiqvued! Raeuz wnggai vih guekcoj raeuz fukhwng cij baenz, guekcoj fouqgiengz, raeuz engq miznaj.

Caenh vih swhgeij miznaj lawz ndaej doxndei caez youq, sevei youh lawz huzndei? Gou geiqndaej: Miz boux suekhuq vaiq soengq ndeu hai ci re mbouj daengz, bungz deng aen cihung ndeu, boux suekhuq vaiq soengq haenx gvih youq gwnz deih boizlaex, boux cawj ci yawj le yawj, couh heuh de bae cawx bingz raemx ndeu daeuj, hoeng, cawx raemx dauqfanj seiz, mbouj caiq raen boux cawj ci haenx lo, seizhaenx, mboujdan boux suekhuq vaiq soengq gamj- doengh, lienz gij vunz humx yawj haenx hix iet fwngzmeh haenh mbouj dingz, cungj naeuz boux cawj ci haenx rox guh vunz. Dwg ha, aen naj louz hawj vunz, hix dwg hawj swhgeij louz. Danghnaeuz vih swhgeij miznaj,yienghyiengh cungj ceng aeu hingz, couh deng vunz biqmyaiz, cungj deng vunz naeuq, caemhcaiq youh sieng daengz aen ndang bonjfaenh, aen hux neix dwg luenh fat beizheiq cauh baenz hane. Mwngz ngeixngeix yawj, yiengh neix baenzlawz lij miznaj ne? Baengzyoux, vihliux bonjfaenh, vihliux guek raeuz fukhwng, raeuz aeu geiq:

Vunz cungj siengj miznaj,

Gaej yungh saj funghlouz,

Bouxboux daiq ndei daeuz,

Louz naj hawj vunz ndei.

Raeuz dwg vunz Cungguek, engq aeu geiq:

Guek raeuz ndaej fukhwng,

Fangzhwnz hix miznaj,

Saedyienh yendaiva,

Faex gwnz bya hix anq.

Baengzyoux, guek raeuz saed- yienh aen muzbyauh bak bi daih’it, raeuz miznaj, daengz saedyienh aen muzbyauh loqsiengj Cungguek fuk- hwng hungmbwk Cunghvaz Minzcuz, raeuz couh engq miznaj.

Baengzyoux, vih aen naj guek raeuz roengzrengz haenqguh ba!