Raiz: Menhmenh daeuj ma!

(Ciengq) Bak byoengq nanz gwn daeuhfouh ndat,

Gienz cing lij aeu baengh seizgan;

Vangz: (Ciep ciengq) Ranz laeuz mwngz daj gwnzdieg hwnj, ranz gou lij dwg rongz boengznaez!

Raiz: Vangz boh’au ha, gwn oij hix aeu cug ciet haeb.

(Ciengq) Couh lumj ciujden dingh daizlaeuj,

Gou gonq mwngz laeng menh haeuj daiz!

Vangz: Mwngz、mwngz、mwngz——

(Ciep ciengq) Okhaex roengz daemz ma gip dai,

Hangz gou Vangzmoux dwg vunzhuk!

Raiz: (Vah gangj mbouj dawzbanj, sikhaek fan naj) Vei, gangj vah ndei ha! Lwnh mwngz nyi, bouxlawz yaek daigvanj mbouj cam gou, gaej siengj!

Vangz: (Doeksaet dwk) Haenx、haenx……

Byoengq: (Ngauz gyaeuj)Vangz boh’au, gawq- yienz de yienghneix gangj, mwngz couh aeu cam de ba!

Vangz: (Mbouj miz banhfap, guhnyah dwk) Ndei, seizneix cam mwngz, mwngz yawj baenzlawz banh ba!

Raiz: (Riu lo) Neix couh deng loma! Baema ba, gou ciq hawj mwngz ndaej lo!

Vangz: (Byaengq da) Gijmaz ——?

(Ciengq) Mwngz ciq cienz gou caengz boiz,

Baenzlawz dauq naeuz ciq hawj gou?

Raiz: Mwngz dingq cingcuj la——

(Ciep ciengq) Cek baihdoeng daeuj bouj baih- sae, gou gangj dwg vih gijmaz lo!

Gyangh: (Vix Raiz) Mwngz, mwngz dwg……

Byoengq: De heuh guh gyaeujbyaraiz, dwg Betcib Lungh Cunhgunghsoj ganbu, hix dwg duicangj Mbanjveizdangz.

Raiz: (Hix dauq hoenzsaenz gvaqdaeuj) Meh- sam bakbyoengq, gyoengqde dwg……

Gyangh: Raeuz dwg canghgajmou diegrog, daeuj sou gizneix cawx mounoh.

Vangz: Gyaeujbyaraiz——

(Ciengq) Gaej guenj bouxwnq hanzsaeh,

Caez gangj gij cienz gou gonq!

Raiz: Ndei ha——

(Ciep ciengq) Cam mwngz dajsuenq aeu geijlai,

Geijlai cijndaej hab’eiq mwngz?

Vangz: (Ciengq) Yienhcienz mbouj gangj aeu yienhhuq,

Cijaeu caiq dem song duz vaiz.

Raiz: (Bongx aek) Baenz——

(Ciep ciengq) Lumjbaenz laeng suen mbaet byaekheu, hix lumj ndoetsouh yungh maz rengz?

Vangz: Gangj vah suenqsoq——

(Ciengq) Guh vunz guh saeh gangj lauxsaed,

Gaejaeu gvaqlaeng guh laihdai!

Raiz: (Ciep ciengq) Gyoengq raeuz cungj dwg vunz bonj mbanj, cunhgan dahraix byawz gangjndwi!

Byoengq: Bei! ——

(Ciengq) Mwngz laux gangjvah lumj okroet,

Ciengzseiz fouzsaeh luenh hangz vunz!

Raiz: Luenh guh! ——

(Ciep ciengq) Gangjvah gaej aeu daiq gvaq- bouh,

Vah louz sam faen cij coengmingz;

(Bwz) Mehsam bakbyoengq, mwngz, mwngz siengj ra raeu hwnj gyaeuj luenh nyauj ha?

Byoengq: Hai! ——

(Ciengq) Cingj mwngz ciengeiz gaej hwk gou,

Mehsam gamj gangj hix gamj dang.

Raiz: (Raen mehsam nyinhcaen, sim youh unq lo)

(Ciep ciengq) Song raeuz vunzsug lai dox- nyiengh,

Mienxndaej daengz seiz nanz souciengz.

(Bwz) Ndei, ndei, mwngz gangj, mwngz caenhliengh gangj!

Byoengq: Gou cam mwngz, bi’gvaq seiz- doeng——

(Ciengq) Ndawyangh bued hawj ceh byaek- youzcaiq,

Bonjlaiz dwg ndaem hawj naz biz;

Mwngz dauq caeg dawz bae caqyouz,

Geij boux gag faen mbouj aeu naj!

Raiz: (Sim haw liux) Haenx, seizhaenx lingx ma mbouj miz vunz daeuj aeu, youh gvaq geiqciet lo, mbouj caqyouz couh sai bae ha.

Vangz: Seizhaenx mwngz yaemmuenz mbouj guhsing, bouxlawz rox ha!

Raiz: (Miz di najnyaenq lo) Mbouj loek, dwg aenvih gou gunghcoz guh loek lo. Hoeng sou caen dwg mageq geiq ndaej haex cien bi bw!

Byoengq: (Gikdoengh lo) Gangj ndaej ndei!

(Ciengq) Raeuz dwg mageq geiq ndaej gij haex cien bi,

Sou dwg duz moedbyuk cienmonz henx saeu- liengz bw!

Cuh Bazgai damengz nyingz naq,

Vi goeng biz sei yaeuh vunzlai.

Raiz: (Hozndat lo) Ai! Mwngz yied gangj naj yied gvangq, caiq gangj roengzbae gaej gvaiq gou mbouj nyiengh mwngz lo!

Byoengq: Ho, ndaek gyaeujbya mwngz seizlawz nyiengh vunz gvaq la?

Raiz: (Cwk dwk) Mwngz, mwngz, mwngz……

Cinz: Gaej cauz lo, gangj daengz ciengx vaiz baenzfouq, ranz gou hix dwg bw. Vangz boh’au, sou gizneix moix hoh cwngfuj cihciz swhginh dwg geijlai?

Vangz: Ndaej caet cien maenz ngaenz.

Cinz: Mbouj deng ba, raeuz gizhaenx dwg it fanh maenz bw.

Raiz: Hai, gak dieg cingzgvang mbouj doxdoengz, baenzlawz ndaej doxdoengz!

Gyangh: Vangz boh’au, caet cien maenz hix ndaej cawx song duz vaiz ha, mwngz baenzlawz ngamq cawx duz ndeu?

Byoengq: W, bonjlaiz dwg ndaej cawx song duz vaiz, hoeng Gyaeujbyaraiz bang Vangz boh’au lingx cienz dauqma seiz, youh nyengh dawz seiq cien maenz deuz lo.

Cinz: Gvaiq mbouj ndaej Vangz boh’au daeuj naeuz de ndaej cienz noix lo.

Raiz: Vei, gangj ndeidingq di nw!

(Ciengq) Ngoenzhaenx ranz gou cingq caep ranz,

Cienz noix swnhfwngz sien ciq yungh.

Vangz: (Mbouj miz banhfap) Ciq? ——

Byoengq: (Ciep ciengq) “Ciq yungh” gaenq gvaq buenq bi, daengz seizneix lij caengz boiz!

Cinz: Neix couhdwg mwngz mbouj deng la——

(Ciengq) Gaeu cienzbanggungz bouxwnq famh- fap,

Gangj daengz yenzcwz saehcingz hung!

Raiz: (Vangmanz dwk ciep ciengq) Vunzrog gaej luenh bamz luenh gangj, dou beixnuengx doxbang mwngz gaej daeuj saunyaux!

Gyangh: Cinz Giuj, mwngz baklai lo!

Byoengq: Mbouj dwg! ——

(Ciengq) Daegnuengx gangj ndaej saedcaih ndei,

Hawj de daenj aen hauhleb ndeu;

Buqvaih saeh banggungz cingcinj,

Niuj soengq gungh’anh mbouj ndaej nyiuz!

Raiz: Mehsam bakbyoengq, gaej duzguk gwn mou, mwngz duznyaen hix daeuj caeuqfaenh ha?

Byoengq: Aen mauh neix cingq hab mwngz daenj bw.

Raiz: (Naih de mbouj ndaej, cijndaej lingh gangj vahdaez) Mwngz, mwngz mbouj lumz ba, hai aen diemq neix gou bang mwngz ok haujlai rengz bw?

Byoengq: Hai, mbouj ndaej lumz law, daj gyaeuj daengz rieng mwngz beg aeu geijlai duz bit gaeq duh gou, mwngz geq ndaej okdaeuj lwi?

Raiz: (Engq najmong) Ndei, ndei, ndei, gangj mbouj gvaq mwngz Mehsam bakbyoengq, ngoenz- neix miz saeh, deuz gonq lo.

(Hwnjndang, naj mongmet deuz lo. Henz bwz) Hw, song duz fangz neix daeuj cek daiz gou, gvaqlaeng miz seiz hawj sou ndeiyawj! (roengz)

Cinz: (Geizheih raixcaix) Lauxbanj, aen mbanj ndaek duicangj neix, baenzlawz an ndaek mingzcoh geizheih neix?

Byoengq: Ei——

(Ciengq) Boux cojgoeng neix dwg singq Va,

Guhvunz yaemdoeg ceiq ganvad;

Dauyi cingqngeih cungj mbouj gangj,

Rwix lumj byaraiz dwg vunzvaih!

Cinz: Byaraiz! Byaraiz dwg gijmaz doxgaiq?

Byoengq: Couhdwg gij bya ndaw saw sij haenx, cienmonz gwn bya iq nyauh iq ha!

Cinz: O……

Vangz: De ha——

(Ciengq) Biujmienh bak diemz vah youh unq,

Baihlaeng saeh rwix guh ndaej cied;

Mingz ciengj ngengh dued cungj mbouj lau,

Ndaej conq haeuj cik sim mbouj iep!

Gyangh: Yienghhaenx ndawmbanj senj gij duicangj seiz, vih gijmaz nyengh youh senj de ne?

Byoengq: (Ciengq) De dwg lwgvaihdaeuz bonjdieg,

Laeuj noh、cienzngaenz daeuj gwn’oet.

Vangz: (Ciep ciengq) Danghnaeuz mwngz bae gungqgauq de,

Gij hux seizseiz cauh henzndang!

Cinz: Yo, yienghneix hengzmanz, dwglau lai lo.

Vangz: Ei, geij bi gonq, vunzlai ndawmbanj comzcienz vat conghgamj doeng goengloh, couhdwg aenvih de deng dingz hong bw!

Cinz: Vihmaz?

Byoengq: De ciengzseiz luenh gangj luenh guh, lij maij guhgaz; doengzseiz, lij ra gak cungj leixyouz, gyan gwn cienz goenggya.

Gyangh: Yi, mbanj sou vih doeng goengloh, lij comzcienz vat conghgamj gvaq ha?（2）