Seizgan: Ciuhneix.

Dieg: Henzloh aen diemq souh mbouj miz vunz gai.

Vunz: Gyangh Yungj, sai, 38 bi, genjdanh heuhguh Gyangh.

Cinz Giuj, sai, 26 bi, genjdanh heuhguh Cinz.

Mehsam bakbyoengq, mbwk, 43 bi, genjdanh heuhguh Byoengq.

Vangz boh’au, sai, 66 bi, genjdanh heuhguh Vangz.

Gyaeujbyaraiz, sai, 44 bi, genjdanh heuhguh Raiz.

Ciengzgingj: Gofaex hung、ciubaiz bouqsouh、daiz、daengq raez.

Gyangh: (hwnj) Gou dwg singq Gyangh. Dwg Yangh Dangjveij suhgi ngamq hwnjnyaemh. Gih- cwngz ganbu ma——

(Ciengq) Ndaw bangungh Gyangh cijsi noix,

Dunhdenj diucaz gaenx roengz mbanj;

Lauxsaed banh saedsaeh,

Mbouj lumz simnduj nyaengq vih minz.

(beg) Ngoenzneix, caeuq Fuzbinzban cujyin Cinz Giuj roengz lajmbanj, yaek daengz Mbanj Veizdangz betcib aen lungh Cunhgunghsoj.

Cinz: (coh baihndaw swenj) Gyangh suhgi, caj gou gonq——(hwnj) gou singq Cinz, danmingz heuhguh Giuj. Mboujgvaq, cingj daihgya louzsim. Cih saw “giuj” neix, mbouj dwg cih “laeuj” sawj vunz fiz bae neix, dauq dwg cih “nanz” ciengzlwenx “nanz”. “Laeuj/nanz” doengzyaem, yaem doxdoengz eiqsei mbouj doengz bw!

Gyangh: Vei. Mwngz damz gijmaz?

Cinz: Gag bauq gyamonz ha!

Gyangh: Genjdanh di ma, raemh lai la!

Cinz: Gou lau daihgya dawz eiqsei gyauxlaux ha!

Gyangh: Vei——Deng bw, Cinz Giuj, “Cinz Laeuj”, dingq hwnjdaeuj mbouj couhdwg gij laeuj gaeuq ndawcang rom haujlai bi haenx ha? Ndei, mingzcoh ndei!

(Ciengq)Vunz mwngz oiq ndaej gyaeundei,

Heiqseiq lauxcwngz youh maezvunz;

Lumjbaenz dahsau miz mingz,

saek moq feih seuq rengz swnh.

Cinz: Suhgi ha——

(Ciengq) Mwngz aeu mingzdaeuz gou daeuj riu,

Gou danghnaeuz hoiz mwngz nanz han;

Lumj youz bak hozhawq gwn ciengq,

Mbouj rox baenzlawz guh cij singj.

Gyangh: Vei vei vei, gou dwg gangj, mwngz caeuq gou cungj dwg ngamq diuh daeuj daengz gizneix geij ngoenz. Baezneix roengz mbanj bae guh diucaz yenzgiu, gaej laeuh dwg byawz swnh seizneix mbouj miz vunz, gangjriu lo.

Cinz: (maen naj hwnjdaeuj) Bouxwnq doiq raeuz simndei, raeuz wngdang guh ok doxndei fanjying, mboujne couh mbouj hab laex lo, dingq ndei la——

Gyangh: Hw, caen dahraix ha. Ndei, fanjcingq hix ndaejhoengq, daeuj ba, gou riengz dwk!

Cinz: Haxbaenh mwngz naeuz gou dwg cinznenz laujgiuj?

Gyangh: Baenzlawz la, dingq hwnjdaeuj mbouj dwg ha?

Cinz: Yienghneix gou wnggai heuh mwngz gijmaz ha?

Gyangh: Gou singq Gyangh, beij mwngz hung geij bi, heuh gou Laujgyangh ha!

Cinz: Mbouj loek, dwg wnggai heuh mwngz Laujgyangh.

Mbouj gvaq ne, cih saw “Gyangh” mwngz neix ma, hix caeuq cih saw ndeu doengz yaem bw.

Gyangh: Gijmaz——, cih lawz?

Cinz: Couhdwg mwh dajcawj, aeu hinggeq daeuj dajcawj cih “hing” ha!

Gyangh: (Saeq ngeix, hix riu lo) Hw, luenh bamz!

Cinz: Ndei! Gou dwg luenh bamz, mbouj gvaq, hix suenq bingzgvaq la! Ha......deng, vah gangj cingqdaez.

(ciengq) Ngoenzneix roengz mbanj daengz Veizdangz, cujyau liujgaij gijmaz saehhangh?

Gyangh: (ciep ciengq) Dingqnyi Veizdangz mbouj miz goengloh, dangyienz doeng loh dwg diuz dongh daih’it.

Cinz: Deng, neix dwg bouh ceiq youqgaenj de!

(ciengq) Doeng le goengloh daeuj banggungz,

Doxdoeng ndei le heih baenz fouq.

Gyangh: (ciep ciengq) caencingq banggungz guh ndaej ndei, fanjfu cinghseuq gaej moengjdoengj!

Cinz: (yawj soujbiuj) Vei, suhgi, yaek daengz banringz lo, bak loh baihnaj miz aen diemq souh ndeu, haeuj bae gwn song vanj, yietbaeg gonq ba?

Gyangh: Hai, mwngz cingq gaeu deng giz humz dwk, haeuj bae ba!

Cinz: (baengh daiz naengh roengzdaeuj) Vei——Miz vunz lwi!

Byoengq: (han) Miz ha——(hwnj) Beixnuengx, miz maz saeh?

Cinz: Dou siengj gwn vanj souh ndeu, baenzlawz gai ne?

Byoengq: Yi, sou mbouj yawj ciubaiz?

Cinz: Gijmaz, vihmaz ciubaiz?

Byoengq: (riu lo) Hai, ngiengx gyaeuj couh rox lo.

Cinz: (doeg) Aen diemq souh mbouj yungh vunz gai.

Byoengq: (ciengq) Vanj souh haj gak ngaenz,

Beg soengq byaek gag gya;

Gag gwn aeu ciuqsouj,

Mbouj sai geiq ndawsim.

Cinz: Bienzngeiz、goengdauh, mbouj gvaq ne——

(ciengq) Danghnaeuz ra biuq lingz,

Bouxlawz doiqyienh gou.

Byoengq: (Ciep ciengq) Gwnz daiz baij miz cienz sieng,

Geq cingcuj menh dawz cienz.

Gyangh: Ndei, minzfungh ndei!

Byoengq: Godaih, vunz ndawbya daj ciuhgeq daengz yienghneix, sibgvenq la!

Gyangh: Lauxbanj, seng’eiq lij ndei ba?

Byoengq: Hai, daengz seizneix rek daihsam yaek gwn sat, gou cingq cawj rek daihseiq ne.

Cinz: (ciengq) Cienqdaeuz cingq dwg ngoenz ndit ndat,

Diuz roen cibcih hai bouq souh.

Byoengq: (ciep ciengq) Cawj souh fuengbienh gyoengq vunzlai, ngoenz ndeu ndaej canh geij cib maenz.

Cinz: Dienseiz deihleih ndaej ndei gai,

Gaeuq gwn gaeuq yungh mbouj yungh you.

Byoengq: Mbouj ndaej ha——

(ciep ciengq) Lwgmbwk doegsaw aeu guh ranz,

Cungnienz yungh cienz dangq raemxgok.

Gyangh: Vei, seizneix guekgya dajcauh gij hanghmoeg banggungz fouqminz, sou youq gizneix guh ndaej baenzlawz yiengh la?

Byoengq: Cungj hengzdoengh hwnjdaeuj lo, cingq gag ra hanghmoeg ne.

Vangz: (hwnj, ciengq) Din caij rinbanj lumj rek cienq,

Noix rumz noix gangj bak ok hoenz;

Sam yamq gyoebbaenz song yamq byaij,

Mehsam diemqsouh youq baihnaj.

(bwz) Gou singq Vangz, vunzlai cungj heuhguh Vangz boh’au, dwg boux gungzhoj daih’it Mbanj Veizdangz, anbaiz ciengx vaiz baenzfouq. Gij cienz banggungz ndaej cuengq haenx ngamq gaeuq cawx duz vaizlwg ndeu. Yienghneix guh, daengz seizlawz cijndaej duetgungz ha? Ai!

Byoengq: Yo, Vangz boh’au. Mwngz yaek bae gizlawz ha!

Vangz: Daeuj gizneix gwn souh ha!

Byoengq: (riu hwnjdaeuj) Ho——

(ciengq) Bin bya benz gemh buet langlang,

Nanzdauh cij vih gwn vanj souh?

Vangz: Hai! ——

(Ciep ciengq) Vih Byoengq duetgungz bae lajmbanj, Fuzbinzban ra bouxbangfwngz.

Byoengq: O, rox lo, dwg bae Fuzbinzban ndawyangh siengj caiq ciq di ngaenz he!

Vangz: Couhdwg ha!

Gyangh: Vei, boh’au, mwngz dwg aen mbanj lawz?

Byoengq: Raeuz cungj dwg Mbanj Veizdangz, baez neix ndawdoih banggungz, anbaiz sam hoh ciengx vaiz, de dwg ndawde hoh ndeu.

Cinz: Dwg ha, sam hoh? Mbouj dwg……

Gyangh: (laengz Cinz dwk) Anbaiz de ciengx vaiz, vihmaz?

Vangz: Gou nienz geq ndang nyieg, hix mbouj miz maz monzloh, ndigah……

Raiz: (heuh) Mehsam bak Byoengq——

Byoengq: Yi, bouxlawz heuh gou?

Raiz: (hwnj) Gou ha!

Byoengq: Ho, ndaek gyaeujbyaraiz, ra gou ha?

Raiz: Siengj cam mwngz raen……

(Raen Vangz mwnh naengh youq gwnz daengq- raez, soeng gaemz heiq raez he) Eiya, Vangz boh’au, cungjsuenq gyaep hwnj mwngz lo.

Vangz: (daidu mbouj ndei dwk) Gyaep gou guh gijmaz?

Raiz: (ciengq) Dingqgangj mwngz daeuj ndawyangh ra cienzciq, mbouj rox aeu ngaenz guh gijmaz?

Vangz: (ciep ciengq) Banggungz ciengx duz cwzvaiz iq,

Baenzfouq seizlawz lwnz daengz gou?

（1 caengz sat）