1934 nienz fawhnit, Cungguek Gunghnungz Hungzginh cungbyoengq diuz fungfaengz Sienghgyangh. Bungz Dwzvaiz daiqlingx Aen Ginhdonz Hoengzsam daeuj daengz ndoi Yezcwngz, youq Hingh’anh Yen Ginhsiz Yangh Vwnzgyazdung Cunh capyouq sam ngoenz, louz le haujlai goj cienz daengz seizneix.

Vwnzgyazdung Cunh, seizneix miz betcib it ranz, gungh seiqbak lingz bet vunz, dwg aen mbanj Bouxcuengh、Bouxmyauz、Bouxyauzcuz、Bouxgun daengj lai minzcuz caemhyouq ndeu.

Cau Ginhvan, goeng Bouxyauzcuz neix (hwnjranz le riengz mehyah singq, gaij coh baenz Banz Gveiyungz, ndawmbanj hix miz vunz heuh de Cau Gveiyungz), mehyah de heuhguh Banz Cunghyi. De caeuq mehyah daengx ranz youq byongh bya Gyaiqndoengndoek Dahlunzgyangh youqdingh.

1934 nienz 12 nyied ndawco, aen budui daiqdaeuz hungzginh daeuj daengz Gyaiqndoengndoek, Liuz lenzcangj daiq aen doih diemjsoij bae laeng Cau Ginhvan. Seizde, mbwn gaenq laep lo, gyoengq hungzginh dungx youh iek, buhvaq youh deng fwnmoenq codoeng duh dumx liux. Gyoengqde hix iek hix nit, ngeixnaeuz ndaej haeuj ranz, hoeng cix raen doumonz Cau Ginhvan haep dwk gig ndaet. Gaenlaeng Liuz lenzcangj bongx dou hemqnaeuz:“Beixnuengx, raeuz dwg gunghnungz hungzginh……”

Cau Ginhvan song gvanbaz youq ndawranz ndaejnyi “hungzginh” song cih saw neix, lau dwk simdaeuz cungj yaek diuq okdaeuj, gyawz lij gamj oksing dem. Gaxgonq gizneix laep cungj mbouj haep dou, duenh gonq gyoengq dujhauz yanghsinh rwix hangz vunz, vunzlai couh lau miz hungzginh daeuj couh haep dou liux.

Hungzginh youq rog raen mbouj miz vunz hai dou, couh ndwn youq lajroq youq.

Gyanghwnz lo, Cau Ginhvan song gvanbaz raen baihrog mbouj miz doengh- danh, couh menhmenh byaij daengz henz dou dingq gij sing baihrog. Ndawlaep caemrwgrwg, caenh ndaejnyi raemxfwn ndik roengzma. Goengcau nyinhnaeuz hungzginh gaenq deuz le, de hai dou yawj ok rog bae, cix raen hungzginh bouxboux cungj lij ndwn youq lajroq bonjfaenh.

Yawjraen Goengcau okdaeuj, gyoengq bing caezsing dongx de: “Goenglaux ndei!”

Goengcau roxnyinh geizheih, yienghneix gyawz dwg “gungfeij” boux- hak gangj haenx, neix mingzmingz dwg aen duivuj vunz gungzhoj bonjfaenh raeuz ma!

Yienghneix, Goengcau cingj hungz- ginh haeuj ndaw rogdangq bae, heuh yah de cawj raemxhing hawj hungzginh gwn, caux feiz hawj gyoengqde byoq feiz. Hoeng gijgwn ndawranz cungj gaenq deng caeggeq daeuj dwk liux lo.Gaenlaeng le, Cau Ginhvan couh gag hwnj bya bae aemq gij haeuxyangz caeu youq ndawgoengq ma, cawj gu haeux- cukyangz ndeu hawj hungzginh dingj iek.

Haemhde, gyoengq hungzginh humx bak feiz doxing baihlaeng ninz ndaek lo, hoeng Goengcau cix lij dingq Liuz lenzcangj gangj gij dauhleix gwzming dwk daengz ranzrongh.

Ranzrongh le, aen doih diemjsoij doq yaek deuz lo. Hwnjdin gaxgonq, Liuz lenzcangj daj ndawbuh mbon ok song ndaek gongqngaenz yaek hawj Goengcau, Goengcau gyawz nyienh aeu ha.

Dujhauz yanghsinh rwix ciengzseiz daemhcaij de, raen yienghneix, de raemxda yaek lae, naeuz: “Hekheiq lai la! Cijmiz cungj ginhdui sou yienghneix yawj gyoengq Bouxyauzcuz dou guh vunz. Raeuz dwg ranz vunz ndeu, gou mbouj ndaej aeu gij ngaenz neix!” Liuz lenzcangj naeuz: “Dou dwg gij duivuj gunghnungz bonjfaenh raeuz, mbouj ndaej aeu saek fag cim saek diuz mae vunzlai, neix dwg gijliz diet!” Vah ngamq gangj sat, de couh dawz ngaenz nyoizhaeuj ndawdaeh Goengcau bae.

Hungzginh yaek bae lo, gyoengqde yaek bae gizlawz, Goengcau bonjlaiz mbouj wnggai cam, dauqdaej dwg gij hengzdoengh ginhsw. Hoeng sauhgonq Gveiginh fanjdungbai daeuj vunz le, heuh Bouxyauzcuz cujciz vunz daengz bakgemh Gyaiqcaizhij daengj hoenx hungzginh. Gizhaenx gig yiemj, heih souj hoj gung. Gveiginh gangj vahgyaeu naeuz yienghneix ndaej baujhoh gij leih’ik Bouxyauzcuz, lij ndaej dajciengj gyoengqvunz. Mbouj gvaq geij boux Gveiginh rox hungzginh daeuj le, lau dwk mbei dek liux, caengz deuz dwk mbouj raen ngaeuz lo. Seizneix bakgemh cijmiz samcib lai boux vunz deng Gveiginh yaeuh haenx daengj youq, ndawde dingzlai dwg beixnuengx Bouxyauzcuz. Danghnaeuz saekngoenz hungzginh daj gizhaenx byaijgvaq, couh yaek ok siengdai mbouj bizyau haenx. Ngeix daengz neix, Goengcau couh ndangsaenz liux, sikhaek de hai bak gangj ok gij vah ndawsim hawj Liuz lenzcangj.

Yiemj ok daihsaeh! Diuz lohsienq hungzginh couh yaek daj Gyaiqcaizhij gvaq.

Goengcau naengh mbouj onj lo, gag daez ok yaek caeuq hungzginh yinx roen. Gaenlaeng de daiq duz masae ndeu, caeuq hungzginh caemhdoih hwnjroen lo.

Miz Goengcau daiq roen, Liuz lenzcangj simnet haujlai.

Dep Gyaiqcaizhij, gij vunz gwnz- ndoeng yiengq gwnzmbwn dwkcungq gingjgau. Bande, Goengcau ndwn okdaeuj, de yienznaeuz mbouj miz vwnzva, cix aeu Vahyauz lumj aen mbok raix duhhenj nei gangj gij dauhleix gwzming haemhlwenz Liuz lenzcangj gangj haenx: “Hungzginh baujhoh gij leih’ik vunzhoj, raeuz wnggai doxgap hwnjdaeuj hoenx dujhauz, gaej gag dub vunz swhgeij.” Lij aeu bonjfaenh guh laeh naeuz:“Hungzginh ndidanh mbouj ciengj, gou ngamq cawj di haeux- cukyangz hawj gyoengqde gwn, lij ndaej song ndaek gongqngaenz dem! Sou gaej souj gyaiq lo, vaiq bae ranz yawjyawj ba!”

Youq mwhde, boux donzcangj Liuz Ginhvaz aen minzdonz soujgyaiq neix ngamq miz saeh roengz bya bae lo, ndawgemh Gyaiqcaizhij camhseiz mbouj miz bouxdaeuz. Goengcau rox daeglan bonjfaenh Cau Yinghvaz youq gwnzde, cix hemq de vaiqdi roengz bya ma: “Gaej yungh lau hungzginh le, hungzginh dwg vih vunzhoj guh saeh lo, hungzginh ndei raeuzh!”Cau Yinghvaz ndaejnyi le, couh gangj gij vah Goengcau hawj doengh gij beixnuengx Bouxyauzcuz soujgyaiq nyi. Yienghneix, gyoengqde cungj doengzeiq mbouj hoenx hungzginh lo.

Gyoengq Bouxyauzcuz soujgyaiq foenfoen cuengq fagcungq ndawfwngz roengzdaeuj, buet roengz gyaiq daeuj, lij cawz bae le gij ciem miz doeg yienzlaiz haem youq henz roen haenx. Goengcau couh daz hungzginh, mbouj hoj doxhoenx, couh gvaq le Gyaiqcaizhij, byaij coh aen fueng- yiengq ndaej hingz.