Ndwen sam rumzcin ci, mbwn yaep hwngq yaep nit, nga faexraeu hix heuswdswd, youq dangqnaj bibuengq. Moix bi seizcin， goraeu gwnzbya couh did dwk hoenghhwdhwd——haenx ndaej aeu ma guh ywnyumx nyumx haeuxnaengj ndaem.

Mwh lij iq hoj lai，seizcin haeuxgaeuq gwn sat, haeuxmoq lij caengz baenz, gizlawz miz doxgaiq gwn? Gou ngoenzngoenz geq lwgfwngz, muengh sam nyied cosam daeuj daengz，yienghneix youh ndaej gwn fwx imq ndeu，hix ndaej nai onj aen dungx lo.

Youh dwg bi ndeu “sam nyied sam”. Dou caeuxcaeux couh mup daengz heiq hom lo, haenx dwg daxmeh yunghsim aeu mbawraeu、haeuxcid guh haeuxnaengj ndaem. Geij beixnuengx dou bouxboux caenh ngah dwk ngiengx gyaeuj deq gwn.

Daxmeh daj ndawgu cang vanj haeuxnaengj ndaem rimfwd ndeu, ndenq hawj gou caeuq dahnuengx, riu dwk gangj:“Ne, soengq bae hawj Goengcibngux caeuq Yahcibngux.” Dahnuengx bak baez cumh：“Meh, dou lij caengz gwn imq ne!” Daxmeh aeu fwngz insik dwk lumh aen gyaeuj dou:“Lwg gvai, ngoenzcog daxmeh caiq guh hawj dohmwngz.”

Ranzmbiengjhangj Goengcibngux caeuq Yahcibngux song bouxgeq mbouj miz lwg, mwh dujgaij cwngzfwn daemq, ndigah baen ndaej geij fungh ranz Cingciuz geizlaeng neix, caeuq raeuz dwg bonjgya, hoeng gaenq ok le cib fug lo. Seizneix songde laux lai lo, guh hong mbouj rengz lo, cijndaej baengh ranz lansai fuengz gyawj baihdoeng ndawmbanj bangcoh. Lansai lanbawx ciengzseiz gvaqdaeuj coengh gyoengqde rap raemx guh ngaiz, caenh hauqsim.

Bi ndeu Goengcibngux bae baihsaebaek Guengjsae guhhong, couh daiq le dahsau ndawbya ma, neix couh dwg Yahcibngux. Goengcibngux guh laeuj baenzgya, vunzlaux son ban iq heuh bawx moq guh “Yahcibngux”. Yahcibngux aeu vah bonjdieg gangjriu naeuz: Nanz lo nanz lo, gou nomjnomj couh bienq “bouxyah” lo. Gij vah ndeiriu neix hawj vunzlai riuhaha. Vunz ndawmbanj gwnhaeux gwncaz gvaqlaeng youh aeu saeh neix ma gangjriu.

Yahcibngux mwh nomj fwngz soem raeuh, guh gij haeuxnaengj hoengz hawj vunz myaiz rih bae. De haq daeuj gizneix hix caeuq gyoengq dahgux dahsau ndawmbanj hag guh haeuxnaengj ndaem. Hoeng, de guh ne doxgaiq yungh ndaej noix——didi haeuxcid he, cab haujlai haeuxciem, gu haeuxnaengj ndaem ndeu caenh dwk didi dangzhau, mizmwh hixnaengz dwk gyu ma dingj. Moix bi ngoenz sam nyied cosam, de couh soengq haeuxnaengj ndaem daeuj hawj dou. Mbwn ngamqngamq rongh, bakdoulaux ranz dou lij caengz hai, Yahcibngux couh dawz vanj haeuxnaengj ndaem ndeu cuengq youq giemxdou ranz gou lo, yienzhaeuh caiq “duz duz duz” roq geij mbat dou, doeklaeng sing byaijroen couh bae gyae lo. Gou lij ninz ndawbeix raeujrubrub.Daxmeh hwnq ndaej caeux, youh bang lwg goemq beix ndei, couh bae ranzdajcawj dwk feiz cawj ngaiz. Baez dingqnyi sing, daxmeh couh hai dou okbae lo, mbouj naih daxmeh dauqma, ndawfwngz dawz aen haijvanj hung ndeu, haeuxnaengj ndaem mauh dwk lumj aen bya iq nei, gaeuq geij lwg saejswg dou gwnz fwx ndeu lo.

Gij haeuxnaengj ndaem Yahcibngux——mbouj van、mbouj niu, caenh gij heiq mbawraeu lij suenq baenz. Daxmeh naeuz, ndawranz Goengcibngux gvaq ndaej mbouj ndei, sij mbouj ndaej cuengq haeuxcid, baihndaw cab haeux- ciem lai, ndigah mbouj niu. Hoeng gij neix hix dwg faenh sim’eiq ndeu, Yahcibngux mizsim lo, daengx mbanj byawz mbouj ndaej gwn gvaq haeuxnaengj ndaem de?

Yahcibngux dwg Bouxcuengh, yah baklai caeuq lwgnyez mbouj roxsoq haenx youq baihlaeng heuh de guh “yahvaizdon Bouxcuengh”. Yah- cibngux bonjlaiz dwg vunz simvuen, hoeng gij yawjmbieng neix hawj beizheiq de bienq ndaej miz di gujgvaiq, bingzseiz mbouj daiq haeujdoih. Gyoengq beixnuengx naengh itheij gangjgoj, de caenh ngeiz daihgya dwg mbouj dwg youq baihlaeng gangj vahrwix de. Bingzseiz bungqraen ranznden hix nyeux gyaeuj gvaq henz bae, cang guh yawj mbouj raen. De gag roxnyinh vei lai, caiq naeuz Goengcibngux nyi, Goengcibngux naihsim nai de. Goengcibngux aeunaj, nanz le, hix nyinhnaeuz daihgya caenx gyoengqde, daihgya couh caen doiq songde miz ngaekngeu lo. Caiq aenvih songde itcig mbouj miz lwg, youq mwh haenx mbouj miz lwglan ne, vunzlai couh yawj mbouj hwnj, aenvih miz gij swhsiengj “mbouj hauq miz sam, mbouj miz lwglan ceiq laux” conzdungj neix, yienghneix daihgya hix couh lizgyae gyoengqde lo. Hoeng Yahcibngux boux vunz neix fwngz soem rox guh, rox ndaem naz, rox ciengq go aeubawx haqsau caeuq go daejsang, lij rox guh haeuxnaengj hoengz caeuq haeuxnaengj ndaem. Doenghbaez ranz byawz miz hoengzsaeh couh cingj de son lwgmbwk okhaq roxnaeuz lwgbawx moq ciengq geij souj go aeubawx haqsau, bouxgeq ranz lawz gvaq le hix heuh de daeuj ciengq daej geij sing. Hoeng seizdaih hwngfat, seizneix saeh moq aeu banhfap moq banh, fungsug gaeuq hix ciemhciemh deng dingjlawh, Yah- cibngux roxnyinh swhgeij mbouj miz yungh lo, yied con gaeuvaiz, mbouj daiq caeuq vunz ndawmbanj baedauq. Hoeng moix bi “sam nyied sam”, Yahcibngux lij guh haeuxnaengj ndaem hawj daihgya, de guh gij haeuxnaengj ndaem ne, youh unq youh vandiemz, baihgwnz beuq caengz mba duhnamh hom rang ndeu, liuh gig lai——yawj ndaej ok bouxgeq beij doenghbaez gvaq ndaej ndei lai lo. Ngoenz “sam nyied sam” caeuxcaeux mbwn lij caengz rongh, de couh cug ranz cug hoh cuengq vanj ndeu youq gwnz giemxdou. Gij yamqdin、sing roq dou、feihdauh haeuxnaengj dou cungj sugrox, daihgya gwn gij haeuxnaengj ndaem Yahcibngux, ndawsim cungj ngeix daengz gij ndei de, gij mbouj muenx hix gaenq mbouj miz lo.

Bi ndeu seizcin, Goengcibngux baenz bingh naek youq yihyen ywbingh, saeh neix youq ndawmbanj laeglemx cienz liux lo, vunzlai cungj gig hojyouq. Gyoengqde lumj diepniemh caeuq gvaqsim vunzcaen nei, ranzlawz miz seizgan couh buet bae yihyen cam nit cam raeuj, soengq di doxgaiq ndei hawj Goengcibngux bouj yingzyangj, ciengj dwk bang Yahcibngux guh hongnaz hongreih. Yawjraen vunzmbanj simndei lai, bi haenx “sam nyied sam” fwn doek, da Yahcibngux caemh doek “fwn” lo, de soh aeu Vahcuengh naeuz “docih docih” vunzlai!

Bi ndeu ndwenngeih, Yahcibngux baeg lai baenz bingh, mbouj ndaej hwnq lo. “Sam nyied sam” daihcaeux mbouj miz sing roq dou caeuq sing byaijroen sug lo, gyoengqvunz yienznaeuz fouqmiz, hix mbouj caiq noix gij haeuxnaengj ndaem homfwdfwd haenx, hoeng noix le gij feihdauh haeuxnaengj ndaem mbouj van mbouj niu Yahcibngux, ndawsim byouq dangqmaz, “sam nyied sam” hix mbouj yinxdaeuz lo.

Geij bi gaxlaeng neix, gij bingh Yahcibngux seiz ndei seiz mbouj ndei. Doeklaeng, de aenvih laux lai mbouj miz rengz guhhong, ndang hix naiqnyieg lai. Meh gou caeuq Yahcibngux doxndei, hoeng geij bi gonq meh gou hix gvaq lo, geij beixnuengx dou hix gak youq gak goeg, vih aen ranz iq swhgeij buekguh. Baengzyoux caeuq ranznden cungj gag gvansim bangcoengh songde——mehsimj guh ndei haeuxnaengj ndaem gonq, caiq coq mba duhdoem、lwgraz cauj hom haenx, gyaux di nohsamcaengz gug ndei de. Mehliuz caeuq nuengxbawx doengzdangz song diemj couh hwnqdaeuj daem mbawraeu、daih nyaq、maq haeuxcid、naengj haeux……Guh haeuxnaengj ndaem ndaej le couh laeglemx hai doulaux, dawz vanj haeuxnaengj ndaem ndeu cuengq youq gwnz giemxdou Yahcibngux, yaengyaeng gvaek geij mbat, youh laeglemx dauqma.

Ngoenz ndeu, mehsimj bae ranz Yahcibngux guhcaemz. Yahcibngux yaek ndaej goujcib bi lo, heujnaj hix mbouj miz, de geizheih youh docih dwk cam mehsimj: “Ceiqgaenh caenh miz vunz cuengq vanj haeuxnaengj ndaem ndeu youq bakdou gou, gij saek、feihdauh caeuq yunghliuh cungj mbouj doxdoengz, mbouj dwg boux dog soengq law. Cungj sou ndaej geij vanj lo, ai, nanzvei daihgya lij siengj daengz song bouxlaux dou……”

Bineix “sam nyied sam”, geij beixnuengx dou guhdoih ma ranzcoj yawj Goengcibngux song bouxlaux. Daj lij gyae couh dingqnyi aen bandaujdij souhyinhgih Goengcibngux ciengq diuz go 《Gyaez Cunghvaz Gou》: Hajcib roek aen minzcuz hajcib roek duj va, hajcib roek aen minzcuz dwg ranz ndeu……

Seizde, daengngoenz ciuq gvaq fwj gwnz- mbwn, yawj daeuj raeujrubrub.