Gou baenzgvenq daengz diengz- haw bae, caeuq bouxlaux ndeu gangj- goj, aenvih de dwg gou buenq boux doengzyieng, de dwg vunz Denzyangz, gou dwg vunz Bingzgoj, gyoengqvunz cungj haengj dawz gij vunz youq dieg rog daeuj heuhguh “doengzyieng”.

Bouxlaux daeuj Sihlinz gaenq miz geijcib bi lo, cungj dwg baengh ndaem byaek caeuq buenq byaek gvaq saedceij. De gyaez gai mak- yungz, dwg aenvih makyungz mbouj yungzheih naeuh, louz ndaej nanz. De raen gou daeuj daengz seiz, couh riuhwhw naeuz gou:“Daeglan, aeu makyungz bae gwn.” Yienzhaeuh couh daj laj daizbyaek dawz geij gaen makyungz okdaeuj hawj gou, doeklaeng, couh gangj gij goj mak- yungz ciuhgeq hawj gou dingq.

De naeuz:“Haujlai nanz gaxgonq, Hanvujdi miz ngoenz ndeu foemhfwd baenz bingh ninz mbouj ndaej hwnq, gyoengq canghyw yungh gak cungj banhfap cungj ra mbouj ok de baenz maz bingh, ndigah mbouj gamj seizbienh yungh yw. Gyoengq boux yahnoix vuengzdaeq caeuq daihcaenz gig simgip, hoeng sojmiz vunz mbouj miz maz banhfap daeuj yw gij bingh coegfwngz neix.

Dahswng dwg bouxfugsaeh yah- vuengz ndeu. Miz ngoenz ndeu, de youq ndaw suenva baetsauq seiz, sawqmwh raen ndaw nyaengq miz duzdoq hau ndeu, cingq gag angq. Yienghneix, Dahswng raen gvaqyinx lo, de couh yaek gaeb duzdoq neix, hoeng duzdoq neix gig singj, raen miz vunz dep de, couh ganjgaenj buet coh aen fueng’yiengq doxfanj bae lo.

Yienghneix, Dahswng hix mbouj caiq baet suenva, de riengz duzdoq gyaep bae, itcig gyaep daengz ndaw suenva giz laeg. Seizneix, dangqnaj de sawqmwh miz go doenghgo ndeu, maj ndaej gig daemq, gwnz go maj miz aen mak ndeu, saeknding lumj feiz, ronghnding ronghnding. Dahswng mbouj raen gvaq cungj mak neix, couh doq mbaet roengzdaeuj hawj yahvuengz yawj. Yahvuengz hix mbouj roxnaj, couh cam gyoengq canghyw, hoeng gyoengqde hix mbouj miz vunz rox gijneix dwg maz doxgaiq.

Cingq youq mwh daihgya guj gijneix dwg maz doxgaiq seiz, aen mak hoengz neix cix bienq baenz geu hoenzheu ndeu, biu daengz aen rug Hanvujdi bae. Gij geizheih dwg, gij bingh vuengzdaeq gingqyienz gvaq geij ngoenz couh ndei lo. Gij engq geizheih dwg, ndaw suenva gingqyienz giet rim cungj mak saekhoengz neix, aenvih dwg Dahswng boux daih’it fatyienh, Hanvujdi couh heuh aen mak neix guh “Makswngnij.”

Dingq gij goj de, gou doiq makyungz swngnij miz yinxdaeuz gig daih, siengj miz ngoenz ndeu, ndaej caenndang bae ndaw naz mbaet makyungz neix couh ndei lo! Boux- laux naeuz gou: “Moix bi 11 nyied daengz 12 nyied, ranzmbanj Denz- yangz daengx doenghnaz cungj dwg makyungz hoengzhwdhwd, mwngz ndaej bae yawjyawj.”

Gihvei dauqdaej daeuj lo. Bigvaq ngamq haeuj seizdoeng, miz ngoenz ndeu, gou caeuq Sihlinz Yen Yinzminz Fazyen bae Bwzswz itheij beizsinj aen anqgienh ndeu, aenvih gyanghaet gak cungj yenzyinh mbouj ndaej gib haidingz, gvaqringz cij ndaej saemjleix anqgienh, ndigah gyanghaet gou miz seizgan bae cet. Yienghneix gou dwk denva hawj Vwnzyouj Yanghcauj, gou naeuz:“Yanghcauj, mwngz youq giz- lawz ne?”

Yangcauj naeuz:“Gou youq Denzyangz ranz meh gou, mwngz youq gizlawz?” Gou naeuz:“Gou youq Bwzswz ne.” De dingqnyi naeuz gou youq Bwzswz, couh simgaenj naeuz:“Siengj cimz gij makyungz swngnij, vaiqdi roengz Denzyengz daeuj, mak- yungz swngnij yaek satbyai lo.”

Yanghcauj aen mingzcoh caen de dwg heuhguh Lingz Siuyangh.

Bi 2010 ngoenz ndeu, aen QQ gou sawqmwh roemx haeuj boux vangjyouj heuhguh “Yanghcauj,” gou doengzeiq de le, geij baez doxgangj, cij rox de hix dwg boux gyaez vwnzyoz ndeu, ciengzseiz youq《Yougyangh Yizbau》 caeuq 《Bwzswz Caujbau》fatbiuj faenzcieng. Lauheiq gou caeuq de gyaezmaij doxdoengz, songdou gig vaiq bienqbaenz boux baengzyoux ndei, maz vah cungj gangj, dou gangj vwnzyoz, gangj baenzlawz sij faenz- cieng, gangj ndwenngoenz, gij cingz- eiq dou gig ndei.

Hawj gou doeksaet dangqmaz, dwg Yanghcauj gingqyienz doiq Sawcuengh mizyinx, seizneix gwnz- biengz miz haujlai vunz mbouj rox miz cungj Sawcuengh neix, rox le hix mbouj miz vunz yinx、mbouj dawz haeujsim, engq gaej gangj hag Sawcuengh lo. De rox gou caeux oiq hag gvaq Sawcuengh le, damz naeuz aeu baiq gou guh lauxsae. Gou dwg hag gvaq Sawcuengh, hoeng doeklaeng vut fwz lo, seizneix miz vunz yaek baiq gou guh lauxsae, hawj gou naj hoengz rwz dit lai lo.

Doeklaeng Yanghcauj gag hag Sawcuengh, de hag rox gig vaiq, mbouj geij nanz couh miz faenzcieng youq 《Gvangjsih Minzcuz Bau》 caeuq 《Sam Nyied Sam》cazci ndaej fatbiuj.

Deng de yingjyangj, gou gip Sawcuengh hwnjdaeuj, hainduj aeu Sawcuengh sij faenzcieng. Daj seizde hwnj, songdou youh lai le aen vahdaez doengzcaez ndeu lo. 2018 nienz Yanghcauj baenz boux canghraiz ciendingh Gvangjsih Minzcuz Bause, gou caensim vih de sim’angq, caemhcaiq hix gig hozhaenz, ndigah, ndawsim amqamq laemxsim: Roengz- rengz caiq roengzrengz, Ceng’aeu gyahaeuj aen duivuj neix bae.

Goengfou doiq ndaej hwnj boux haeujsim, bi 2022 gou miznaj hix baenz boux canghraiz ciemdingh Gvangjsih Minzcuz Bause lo. Youq mwh ciemdingh, mbouj dan gou gikdoengh, Yanghcauj hix gikdoengh, song fwngz dou hix gaem youq giz ndeu, mbouj rox gangj maz ndei, daengz doeklaeng caez sing gangj: Ing mbaq hoenxciengq!

Dox baedauq cib lai bi, gungganq ok gij cingzngeih naekna. Ndigah, moix baez daeuj Bwzswz, gou cungj yaek dwk aen denva ndeu cam de, mizseiz hix iu de okdaeuj raennaj.

Ngoenzneix, Yanghcauj baenz- neix baez gangj, hawj gou gig naemj bae mbaet baez makyungz, baenzneix couh dapwngq de lo.

Caeuq gou itheij bae dwg seiq boux seyenz ndaw Nazlauz Vwnzyozse. Daj Bwzswz hwnjdin, ci hai hwnj Bwzswz Daihloh, neix dwg diuz roen hawsingz youqgaenj duh “You- gyangh —Denzyangz Yizdijva” ndeu, dwg diuz roen hung song aen fueng- yiengq bet diuz roen caemzbaiz、gvangqlangh、bingzbwd ndeu, doengrat mbouj deng saek. Riengz roenloh miz Luzdangz Gunghyezgih, gunghcangj hung iq daengj youq diuz roen song henz iet bae gizgyae; Vujdangz、Swdangz dwg giz dieg moq Bwz- dunghgih moq. Ranzlaeuz moq, hag- dangz moq, yihyen moq daengj youq gizneix doxciep guhbaenz; Bwzswz Gvang’vugiz youq Sanhdangz laeb miz gunghswh moq, gizneix miz laeuz- banhgoeng、ranzcang、dieg cangliuh、diegbangq daengjdaengj. Ngeihdangz miz Sinhsanh Lijyez, dwg aen fwnhgunghswh Bwzswz Yinzhaij Lij- yez; diuz roen song henz Douzdangz dwg doengh naz gvangqmyangmyang, seizneix ndaw naz cungj dwg mak- yungz swngnij hoengzswgswg. Gij gyaudoeng、gunghyez、nungzyez henz roen, yienh’ok gizdieg Yougyangh Bingzyenz hwngfwdfwd, hawj dou gyoengq boux daj yienhsingz diegbya iq daeuj haenhdanq mbouj daengx.

Ranz daxmeh Yanghcauj couh youq henz haw Douzdangz Cin. Ciuq daujhangz byaij, dou daeuj daengz bakroen Mbanjnazndoi, Yanghcauj gaenq youq gizde caj dou lo. De daenj aen mauh dangj ndit ndeu, laengndang daenj vengq dox guhhong ndeu, gij cangndang dwg yaek bae mbaet makyungz, de raen dou le naj riu hwnjdaeuj.

Aen mbanj neix, ranzlaeuz aen sang gvaq aen , dingzlai gaenq cang gvaq, gyaeundei dangqmaz, bakdou ranz dingz miz ciiq, dauqcawq ndaej raen.

（1）