“Mbanjranz gingjsaek moq, daengx doengh seizcin daengz”, bae sauq moh dauq daengz buenq loh, sawqmwh miz benq “nywj” heu- swdswd sugnaj ndeu ingj haeuj ndaw da gou——Laxlawz dwg gij go’ngaih heuoiq baenzcaz baenzcaz daengj youq dinbya henz naz. Gou nyaenx mbouj ndaej gungj hwet roengzdaeuj mbaet nye mbaw ngaih oiq ndeu nu geij mbat, couh nu lumj naed cawnyawh heu ndeu luenzlulu, gij raemx mbaw de couh iemq haeuj lwgfwngz daeuj, gij heiq ngaih hom couh lumj cinglingz nei ndonj haeuj ndaw ndaeng daeuj, fwt siu liux haujlai naetnaiq benz ndoi.

“Meh, raeuz swnhloh mbaet di mbawngaih oiq baema guh ceizngaih gwn, ndei lwi? Nanz mbouj ndaej gwn, gou cungj ngah dangqmaz lo!” Gou angqvauvau damq daxmeh naeuz.

“Yo, ngamq gwn haeuxnaengj haj saek sam nyied sam neix, youh ngah gij ceizngaih la? Mboujgvaq, duenh riengz geij ciengz fwn seizcin, caen nyinh benq ngaih neix ndaej youh sang youh oiq bw!” Daxmeh gig unqswnh ruihoho naeuz.

Bohmeh gaenq ndaej roekcib lai bi, youq gij saedceij seizcoz gyoengqde noix gwn noix daenj, ginglig gvaq haujlai haemzhoj. Geiq ndaej gou lij iq seiz, gyoengqde cungj haengj gwn gij ceiz haeuj noh haeuj byaek. Gaenh cib lai bi neix daeuj, aenvih baengh cwngcwz ndei, vunz lajmbanj gwn daenj cungj lai miz, gij saedceij yied gvaq yied ndei, daxmeh hix ciemhciemh caeuq gou doxdoengz ngah gwn ceizngaih lo.

Gou caeuq daxmeh dingz roengz- daeuj miz gangj miz riu mbaet mbawngaih. Gyoengq lwgnyez raen yienghneix, hix humx gvaqdaeuj dox- ciengj bang mbaet, cadi coemj roengz benq ngaih oiq neix bae. Gou gaenjgip son gyoengqde aeu lumj rag muengx nei, daj henz baez di baez di mbaet haeujbae, ciengeiz gaej caij vaih gij ngaih oiq neix. Raen gyoengq lwgnyez lauxsaed roengzdaeuj le, gou cij cuengqsim laebdaeb mbaet.

“Gij ngaih neix mboujdan gwn ndaej, vanzlij ndaej guh yw dem. Sou geij beixnuengx seiz iq ndaej aeu go’ngaih cawj raemx swiq ndang lai, ndigah noix miz bitfiengj ndang humz.” Daxmeh doq mbaet ngaih oiq, doq lwnh gij ndeicawq de hawj gyoengqdou nyi.

Baez yaepda, dou couh mwngz gaem gou gaem mbaet ndaej haujlai lo. Daxmeh dawz gij doxgaiq youq doiq loz iq cingjleix ndei, comz cuengq roengz aen ndeu bae, aeu aen ndeu daeuj cang mbawngaih, cang ndaej rimradrad bae.

Doiq loz neix dwg daxboh gag aeu duk san baenz, daxmeh haengj aeu daeuj dajrap, de lij aeu ndoengj iq goemq youq gwnz bak loz dem, seiq diuz cag loz ngamq daj seiq henz cug maenh, habngamj dangqmaz.

Mwh gou dawz hanz rap hwnj seiz, rox ga mbaeu ga naek, mbouj bingzyaenx, song loz bibuengq mbouj dingh. Daxmeh doq buet gvaqdaeuj doq riu gou, naeuz gou dwg “vaizlaux mbouj rox nyengq gok”. De son gou dawz hanz vuenh mbaq le, gou cij rap ndaej swnh. Gou riu haenh daxmeh:“Lauzdung miz gaiqrox!”

Mbawngaih ciengz aeu daeuj roengz yw, de singq raeuj、haemz di、mbouj miz doeg、doeng cibngeih ging, ciengz aeu daeuj cimgiuj. Ndigah youh heuh de guh “nywjyw”, cawzliux gwn ndaej, engq ndaej aeu daeuj guh yw. Youq Mbanjcuengh, vihliux yw bingh cawz sez, cungj miz gij fungsug sam nyied sam gwn ceizngaih, ngux nyied co’ngux bakdou venj mbawngaih、swiq raemx mbawngaih. Miz vunz lij rox aeu mbawngaih guhbaenz gij byaek gij gwn mbouj doxdoengz, sam nyied sam couh baenz aen ciet ngaih “yaemyiengh” ndeu lo.

Seizcin sam nyied go’ngaih youh oiq youh mboeng, dwg seiz gwn ceiq ndei. Ceizngaih dwg gij huq ndeigwn ndawbiengz, hwng youq Guengjsae、Guengjdoeng、Gveicouh、Huznamz daengj dieg neix. Miz baez ndeu, gou okcai mbiengj Gyanghnanz, dingjlingz raen gyoengqde hix miz ceiz “cingh- donz” lumj ceizngaih nei, mboujgvaq saek damh di. Mwh gou sim’angq haeb gaemz ndeu, maqmuengh daj ndawde ra daengz gij feihdauh ceizngaih seiz, gou geizheih lo——Gij feihdauh de caeuq ceizngaih mbouj doxdoengz! Gou cazcam gyoengqvunz bonjdeih cij rox, ceiz neix dwg aeu cinghhauh daeuj guh, gij saek、gij rang、gij feih caeuq ceizngaih raeuz cungj doxdoengz, gvaiq mbouj ndaej gou ra mbouj daengz gij feih ceizngaih raeuz.

Gizsaed, go’ngaih caeuq go- hauh cungj dwg doenghgo ndaw ndoeng, aeu songde daeuj guh ceiz, yienznaeuz gig doxlumj, hoeng goeng- yauq mbouj doxdoengz. Daj yienghceij songde yawj, miz di doxlumj, neix couhdwg vihmaz miz vunz faen mbouj cingcuj song cungj doenghgo neix lo.

Gij hom gohauh lumj gij nywj bingzciengz, lij miz cungj feihdauh mbouj doxdoengz dem. Gij heiq go- ngaih dwg cungj homfwt daegbied ndeu, de beij gij mbaw ngaihhawq caeuq ngaihgiujdiep engq hom, hawj vunz simsoeng vaiqvued.

Danghnaeuz haeujsim yawj, couh ndaej fatyienh, songde gij mbaw mbouj doxdoengz, gohauh mbaw iq, go’ngaih mbaw hung di; gohauh haengj baenzbenq baenzbenq maj youq henz dah, baenzgo baenzgo maj ndaej daemq; go’ngaih sang di, haengj soengz youq lajbo roxnaeuz lajndoi gizraemh, moix go’ngaih youh maj miz haujlai nye iq, miz lai go seiz, yawj bae couh baenzcaz baenzcaz.

Mwh dou lij iq, daxmeh cungj haengj youq ndaw liggaeuq sam nyied cosam、seiq nyied cobet、caet nyied cibseiq、bet nyied cibngux、ndwen- cieng……gij ciet neix guh ceiz duk faengx. Daxmeh vih hawj dou geij beixnuengx gwn ndaej ndei, cungj youq ndaw ceiz ndaw faengx suek haujlai nohmou. Cawzliux gij huq haeuxcid ndeigwn neix, daxmeh mizseiz lij guh ceizdangz ndaw gya duhdoem, ceizngaih ndaw haeuj lwgraz dem. Moix baez gvaq gij ciet neix, dou cungj angqvauvau, seiz iq cungj haengjheiq dangqmaz.

Gou daj iq gyaez gij gwn soemjdiemz lai di, hoeng, dan haengj gwn ceizngaih cungj huqdiemz neix. Ceizngaih duk youq ndaw mbawgyoij, naengj cug le, lumjbaenz gaiqnyawh saek heundaem ndeu, luenzlulu, ronghliklik, youh unqnemnem. De dawz gij hom haeuxcid caeuq go- ngaih doxhab doxbouj. Baez haeb gaemz roengzbae, youh unq youh niu, nyaij nyangq van bak, homfwt gvaqyinx dangqmaz. Cungj feih neix dwg feih ranzmbanj, hix dwg feih gij gyaez daxmeh, ciengz hawj gou venj dungx venj saej, haujlai nanz cungj mbouj lumz.

Gaxgonq okrog bae doegsaw, youh camgya gunghcoz baenz nanz, doenghbaez sam nyied sam lij caengz ndaej lumj seizneix cuengqgyaj. Aen hagdangz gou dwg Gvangjsih Saw- cuengh Yozyau, aen hagdangz neix moix bi sam nyied sam, cungj hawj gyoengqdou hagseng gya byaek gya noh, fat haeuxnaengj haj saek, hagdangz vanzlij banh gij hozdung lai cungj lai yiengh lumj eu fwen、minzcuz vwnzyi biujyienj、doxdax minzcuz vwnzdij daengj daeuj angq- hoh sam nyied sam, hoeng gij hozdung guh ndaej ceiq nauhyied, dauq dwg mwh gou ceiq niemh ndawranz.

Baez daengz seiz hwnz, gou cungj nyaenx mbouj ndaej dwk denva bae hawj bohmeh gangjgoj. Moix baez dingq daxmeh naeuz ndawranz youh guh gij ceizngaih, ndaw uk gou cungj dwg gij ceizngaih heundaem luenz- lulu、unqnemnem、ronghliklik、hawj vunz simmaez haenx. Gou cij ndaej baenzbaez baenzbaez youq ndawhoz ndawsim dauqngeix gij feihdauh daegbied homfwtfwt de.

Daj “sam nyied sam Boux- cuengh” baenz ngoenzgyaj Gvangjsih Bouxcuengh Swcigih fapdingh conz- dungj vunzlai hwnj, gou cij miz seizgan cukgaeuq bae yiengjsouh aen gyajgeiz seizcin neix, caemh ndaej ndeindei cimz gij ceizngaih hom- fwtfwt!