Ndwenngux mbwn’gvengq nditrongh, gou byaij haeuj aen mbanj guhyiengh gyoebhab laeng Nanzningz Si Yunghningz Gih Nazmungzboh. Bineix ndwenseiq, Nazmungzboh ngamqngamq aeu ndaej aen mingzdaeuz Gozgyah Minzveij buek daihsam aen mbanj miz daegsaek siujsoq minzcuz Cungguek. Ndaej gij mingzdaeuz neix dwg guekgya nyinhnaeuz Nazmungzboh guh minzcuz doxgiet guh ndaej ndei, caemhcaiq gujli Yunghningz Gih guh ndei hong minzcuz doxgiet baenaj.

Byaij haeuj ndawmbanj, nywjheu rim ndoi, hawj vunz sim’angq, rumz liengzsisi, duzroeg ciuzgyitgyit, heiq go’nywj gofaex homswdswd, lumjnaeuz lienz hoengheiq cungj miz heiq heu nei, youh lumj byaij haeuj aen seiqgyaiq singjsien ndeu. Nazmungzboh mbouj suenq hung, daengx mbanj gvangq song diemj hajbet bingzfueng cienmij. Daengx mbanj miz bet bak lingz haj vunz, ndawde vunz siujsoq minzcuz miz bet bak vunz, ciemq vunz daengx mbanj bak faenh cih goujcib gouj. Hoeng, aen mbanj mbouj dwg baengh hung guh ak, miz saekheu coh miz le lingz, Nazmungzboh aenvih miz saekheu couh miz lingzheiq, miz le gingjsaek. De dwg aen mbanj miz vwnzva Bouxcuengh、cihcingh caeuq eu gya cienzdoengj ndeu.

Henz roen mbanj, miz aen loengx faenloih coux nyapnyaj hungloet ndeu, baihgwnz cih- saw hung saeknding “gyaez cenghseuq、 gangj veiswngh、nyapnyaj faenloih” gig yienhda.

Byaij haeuj Nazmungzboh, gyoengq ranzyouq cienzdoengj lingjnanz caeuq daegsaek Bouxcuengh yungzhab haenx riengz ndoi daengjsoengz, aen laeuz、aen ranz、vunzmbanj daj henznaz byaij gvaq haenx……Cungj daiq miz gij yienghndei Mbanj- cuengh. Laeuz moq aen dem aen, gyaqciq dangqmaz, ciengz hau, vax lamzmong, enqranz van hwnjdaeuj, gig miz daegsaek minzcuz Mbanj- cuengh. Gij laeuz bezsu saeknding mwhneix engq yinx vunz cimyawj, caeuq diuzsaeu hau、yangzdaiz hau doxboiq, ndeiyawj youh daegbied, gyaeundei daihfueng, caiq miz gij vwnzva dajndaem. Doengh gij ranzgaeuq haenx, doufaex caeuq vaxheu gig gaeuqgeq, deihgiek ranz dwg aeu rin ngoekngauq caep baenz, ciengz cix dwg cienheu ciuhgonq, nanz le, cien gaenq lauxgaeuq, hoeng ranzgaeuq vanzlij gaenjmaenh. Geij go faexmoed mwncupcup ndaw gyanghongh sanq ok baenzraq baenzraq heiqhom, ranzgaeuq yawj daeuj hoenghhwdhwd. De dak miz gij lizsij bienqvaq naekna, ginglig le geijlai nanz, rumz ci fwn rwed, caeuq seiqhenz yungzbaenz aen cingjdaej ndeu, gig swhyenz gyaeundei.

Yawj hwnj gwnzndoi bae, aenaen ranz vangraeh doxcab, caengzgwnz caengzlaj baizlele. Yawj roengz gizdaemq, Cihcinghhuz caeuq Nazluzhuz song aen huz hung humx guh rangh raemx song fanh bingzfanghmij hung ndeu, hop mbanj lae bae. Henz huz, miz aen dingz yienghgyaeu ndeu, lingxcingx gyaeundei. Va nywj doxheux, nge faexliux duengqnengneng, go’ndoek heuswdswd、mwncupcup, gogo sangnengneng, iet hwnj gwnzmbwn, gij ngaeuz ndawdah caemh heu- sausau. Huzraemx sawndikndik、lwenqmyanz- myanz, gij ngaeuz hau ranz caeuq bya ndaw- raemx, hawj Nazmungzboh bienq ndaej engq gyaeu.

“Laeuzcihcingh” daengz la! Aen sing hung ndeu dumdeng cienz gvaqdaeuj, gou fwt ndiusingj, song gan “laeuzcihcingh” saekhau couh daengj youq dangqnaj gou. Hajcib bi gvaqbae lo, “laeuzcihcingh” laeng Nazmungzboh gingqyienz ce ndaej baenzneix ndei, gou youh simnai youh gamjdoengh. Gou mbouj youz ngeix daengz hajcib bi gaxgonq……

Seizhaenx, dou lij nienzoiq, couh yiengjwngq gij iuheuh Mauz cujsiz, daeuj daengz Yunghningz Yen Nazcinz Gunghse Sihningz Dadui Dunghgvai Cunh capdui an’gya. Ngoenzngoenz gungqhwet dajndaem, gig dwgrengz, doiq gyoengq lwgnyez ndawsingz raeuz ma gangj, caen dwg cungj haemzhoj muzlienh ndeu. Hoeng haemzhoj hix muzlienh le gij eiqceiq gou, hawj gou bienq ndaej gengrengz. Youq seiqvunz gou, neix dwg bit cingsaenz caizfouq nanzndaej ndeu, gvaqbae baenzlai nanz, gou lij geiq youq ndawsim, ngeix daeuj lij lumj ngoenzlwenz ngamq raen nei……

Gou daj “vwnzva cihcingh” ce ndaej caez haenx yawj daengz doenghbaez gij “cingsaenz cihcingh” Nazmungzboh, hix daj yienghsiengq “laeuzcihcingh”, yawj daengz vunz Nazmungz genhciz gyaepgouz、buekguh. Seizneix, Naz- mungzboh hwngfat ok cingzcik, couh cwngmingz le gij ceiqheiq hungsang daih vunz cihcingh haenx gaenq saedyienh, cwngmingz le vunz Nazmungzboh roengzrengz gyaepgouz “saedyienh aen loqsiengj fukhwng Cunghvaz Minzcuz”!

Youq Aen Hoih Camgangj Cibgouj Daih Cingz Lienz Lajmbanj, meh cincangj singqcingz hailangh、daihfueng ngamq samcib bi doxbae haenx, youq gwnzdaiz cingqheiq fwdfwd gangj gij hwngfat bienqvaq lajmbanj. Yienghceij unqswnh hailangh, gangjvah naj riunyumj, loh ok gij ceiqheiq mbouj bingzciengz, yawj daeuj dwg bouxvunz simvuen youh coengmingz、cingzsug youh naengzganq, hawj gou boiqfug dangqmaz. Boux Luz cincangj nienzoiq maenhndei neix, geij bi dinjdetdet couh daiqlingx vunzlai Sinhgyangh Cin Nazmungzboh gaijgwz cauhmoq, roengzrengz buekguh, guh ok cingzcik hungloet. Nazmungzboh caemh bienqbaenz aen mbanj guhyiengh gyaeu- ndei daengx si.

Bi 2014, swcigih gak gaep lingjdauj ndiepgyaez gvansim Nazmungzboh, dieg neix gaeuj dieg dajndaem gomak, youq ndawmbanj ndaem gofaex gova, fazcanj nungzfuyez canjbinj, mboujdan ndawmbanj bienq gyaeundei, vunzmbanj lij ndaem le gooij、makloengzfeiz、makgam daengj lai cungj doenghgo canh cienz. Vunzlai bi ndeu souhaeuj beij gaxgonq demlai geij boix, daengx mbanj cungj gvaq ndaej an’onj, mbouj you gwndaenj lo.

Dou lij caengz byaij gaenh nungzgyahloz, daj gizgyae couh dingqnyi gij singfwen wenqraeuh ndeidingq de.

Beix ya nuengx ai……Bouxhek daeuj daengz bak dou ranz le, gingq hek sam cenj laeuj coux hek li.

Beix ya nuengx ai……Bouxhek yied lai sim yied van le, ndei gvaq rumzcin ci ya ci gvaq ndoi ya……

Gou gig geizheih camnaeuz: Neix dwg gij gya sou lwi? Diuh de ndeidingq lai lo! Geij beixsauj angqvauvau han naeuz: Gij gya dou mboujdan ndeidingq, lij ndaej eu ok “cingz” ne! Moix daengz aen ciet cienzdoengj “sam nyied sam Boux- cuengh”, daegmbauq dahsau ndawmbanj cungj daenj buhvaq ngoenzciet, aeu fwen gyau youx、cienz cingz, mbouj rox bang le geijlai doiq guh baenz gvanbaz, gij gya neix lij eu ok vunz Mbanjcuengh dou mbouj lumz simnduj gietsim riengz aendangj byaij ne!