Ngamq haeujninz, Buzgouj rox- nyinh aen ndang mbouj soeng geijlai, lumj miz fag mid raeh he coi haeuj ndaw noh ndaw nyinz bae nei dotgvabgvab.

Buzgouj naemj: Gyanghaemh mbwn laepfubfub, mbouj ndei bae yihyen, roxnaeuz dingj gvaq hwnz neix couh ndei lo.

Buzgouj ndawsim yienznaeuz baenzneix naemj, liuh mbouj daengz seizneix aen ndang lumj deng fagmid coi yied daeuj yied haenq lo, dot daengz ndawuk ndawgviz bae, Buzgouj nyaenx mbouj ndaej “aeya aeya” sing hung swenj hwnjdaeuj.

Goenggouj ninz aen rug doiqnaj Buzgouj, dingqnyi gij sing swenj Buzgouj, de yaengyaeng hwnj congz, yaengyaeng byaij gvaqdaeuj cam naeuz:“Naihgeq, mwngz baenzlawz la?”

Seizneix saeknaj Buzgouj cungj bienq heu lo, aen ndang gienj baenz ndaek ndeu, gangj vah cungj yaek mbouj ok, de sing iq naeuz Goenggouj yienghneix yienghneix.

“Diuz mingh vunz youqgaenj, mwngz baenzlawz mbouj caeuxdi lwnh gou nyi ne? Gou seizneix sikhaek dwk dienhvah hawj Cangzciz lwnh de nyi, heuh de soengq mwngz bae yihyen cij ndaej.”

Cangzciz dwg daeglan dog Goenggouj Buzgouj, de daengx ranz vunz youq lingh aen ranz, liz aen ranz Goenggouj Buzgouj youq neix mbouj gyae, byaij saek bak mij baedauq couh daengz.

Mbouj yaep ndeu, Cangzciz daiq geij boux beixnuengx ndawmbanj haici daeuj daengz lo, gyoengqvunz nyaengqnyaennyaen dawz Buzgouj fuz hwnj gwnzci bae.

Goenggouj byaij gvaqdaeuj, fwngz he gaemdawz faj fwngz Buzgouj ndaetndaet bae, lingh cik fwngz lumhlumh gij byoemgyaeuj hausek Buzgouj, naeuz:“Naihgeq, mwngz bae yihyen ndeindei yw bingh, lij miz gou ne.”

Aen ci lumj naq liz gung nei buet bongh baenaj, menhmenh saet haeuj ndaw laep lo.

Bihaenx, Goenggouj caeuq Buz- gouj doxaeu mbouj geij nanz, Goeng- gouj couh gaen budui bae camgya Gang Meij Yenz Cauz, daeglwg de seizhaenx lij youq ndaw ndang Buz- gouj, caengz seng okdaeuj ne.

Yaek bae Cauzsenj seiz, Goeng- gouj gaem vanj laeuj he, bek aek doiq mbwn mieng naeuz:“Mbouj gaj caez gyaep deuz caeggeq Meijgoz, ciuhneix nyengh mbouj dauq mbanjranz!” Gangj sat, baez ngiengx hoz couh ndoet vanj laeuj sat, yaengx fwngz couh boemz aen vanj roengz gwnz- namh bae soiq caez lo.

Raen Goenggouj vah gangj miz- rengz maenhgywd, gyoengqvunz hix cungj gaenlaeng yienghneix mieng.

Buzgouj yienznaeuz hix gig haemz caeggeq Meijgoz, hoeng ndaw- sim gig sij mbouj ndaej Goenggouj biek de bae hoenxciengq, baenq gyaeuj gvaq mbiengj he bae aeu genbuh laeglemx uet raemxda.

Goenggouj raen le, riu naeuz Buzgouj:“Daej maz ne, seizneix guekgya miz nanh, dou dwg bouxsai, aeu bae hoenxciengq henhoh guekgya, mwngz vih dou ndaengndiengq cij baenz.”

Vah dwg baenzneix gangj, aen sim Goenggouj cix lumj raq raemx- langh he bongh hwnj bongh roengz, youq giz dieg hoenxciengq, lwgyienz mbouj miz lwgda hix fouzcingz, lae lwed vutmingh dwg saeh bingzciengz. Baezneix biek bae, ndaej mbouj ndaej dauq cungj mbouj rox, engq mbouj gamj naemj daengzcog baenzlawz yiengh lo, gangj gij vah haenx, dwg vih nai aen sim mehyah, hawj de youq onj swhgeij cij ndaej ansim bae hoenx- ciengq.

Goenggouj caeuq budui daengz Cauzsenj le, aenvih caengz ndaej hag nyingz cungq gvaq, mbouj ndaej cigsoh bae dieghoenxciengq doxhoenx. Goenggouj dingq bouxdaeuz anbaiz, ngoenznaengz hawj gyoengq bouxbing dajcawj、 ciengx max.

Ngoenznaengz mbouj dwg daj- cawj couhdwg gyaep gyoengq max bae langh, Goenggouj roxnyinh gig mbwq, de geijlai maqmuengh ndaej gaem cungq bae hoenx vunzdig ha.

Bouxdaeuz raen Goenggouj sim- fanz, couh naeuz de:“Bouxcoz, gaej simgip, sou gij bing moq ngamq daeuj mbouj rox guh maz, guh gij hongcab neix gonq, caiq naeuz dajcawj ciengx max hix dwg vih guekgya ok faenh rengz ha. Hag gaem cungq nyingz cungq hix dwg aeu faen buek bae hag bae lienh cij ndaej, buek laeng couh lwnz daengz mwngz lo.”

Mbouj nanz, Goenggouj caen ndaej caeuq gyoengq bing moq bae hag gaem cungq nyingz cungq lo, doeklaeng hix ndaej bae hoenx vunz- dig lo.

Youq gwnz dieghoenxciengq, Goenggouj hoenx vunzdig gig ak, laeb gvaq sam daengj goeng, bouxdaeuz bouxbing cungj haenh de.

Mizseiz Goenggouj boux ndeu gag muengh coh aen fuengyiengq mbanjranz, de hix gig niemh Buzgouj, hoeng caeggeq Meijgoz caengz gyaep deuz, gvanbaz mbouj rox seizlawz cij ndaej raennaj. Gvanbaz cingzngeih lumj diuz mae, yied naemj yied raez, yied naemj sim yied luenh. Goenggouj laepda hwnjdaeuj, baez haeb heuj, dawz gij saeh neix vutvak gvaq mbiengj ndeu bae gonq.

Song bi lai gvaqbae, caeggeq Meijgoz deng hoenxbaih lo, Goenggouj hix ndaej dauq mbanjranz lo. Goenggouj sim’angq, hoeng hix gig siengsim, aenvih gij ciyenginh gax- gonq guhdoih caez daeuj Cauzsenj, mizmbangj gaenq vutmingh youq gizneix, ciengxlwenx ninz youq benq dieg neix, caiq hix mbouj ndaej dauqma guekcoj; mizmbangj yienz- naeuz lij lw diuz mingh dauq, hoeng mbouj dwg gen goenq couhdwg ga raek, hawj vunz raen le sim’in dangqmaz.

Raen Goenggouj song da rongh seiqguengq caezcienz dauqma, Buz- gouj coemj haeuj ndaw rungj Goeng- gouj bae gotdawz de ndaetndaet bae, cuengq sing daej hwnjdaeuj, ndawsim gij soemj van haemz manh cungj youq seizneix cuengq okdaeuj.

Seizneix daeglwg Goenggouj gaenq ndaej song bi lo, gangj vah caengz seuq geijlai, rox byaij- ndiekndiek lo. Daeglwg neix youh iq youh daemq, caeuq duz gaeqboux ca mbouj geijlai sang.

Dingq Buzgouj naeuz, daeglwg ngamq doekfag seiz ngamq miz song gaen lai naek, lumj diuz genbongz bouxlaux nei hung, youh iq youh nyieg, yungzheih baenzbingh, caiqlix ngoenz beij ngoenz reuq, da yawj yaek mbouj baenz lwg lo. Mbouj miz ngaenz bae ra canghyw, Buzgouj cij ndei gag hwnj bya bae ra ywdoj yw. Buzgouj sinsin hojhoj, cungjsuenq gouq lix diuz mingh daeglwg.

Buzgouj bonjlaiz ndangdaej couh mbouj suenq ndei, daj seng roengz daeglwg le, de swhgeij hix baenzbingh ndawndwen, daengz seizneix bingh hix mbouj ndaej duenh rag, ciengzciengz mbouj dwg gyaeuj ngunh da raiz, couhdwg gizneix dot gizde in.

Seizneix vah youh gangj doxdauq, Buzgouj bae yihyen yw bingh geij ngoenz couh ndaej dauqranz lo. Goenggouj muengz cam Cangzciz deng geijlai ngaenz?

Cangzciz riu naeuz:“Seizneix guekgya saedhengz sinhnungzhoz lo, yw bingh ndaej siu bae dingzlai ne, baezneix daxbuz bae yw bingh ngamq deng sam cien maenz ngaenz ndwi.”

Roxnaeuz vunz bungz saeh angq simcingz sangj, daj rox gij ngaenz yw bingh ndaej siu bae dingzlai, Buzgouj couh cuengqsim haeuj yihyen yw bingh. Menhmenh gij binghgoek Buzgouj caen yw ndei lo, vunz bienq ndaej cingsaenz gvaekgvaek, byaij loh yamq din mbaeumbiengmbieng lumj bouxcoz nei, Goenggouj hix vih de sim’angq raixcaix.

Vah naeuz faex geq rag nduk, vunz geq ndang bingh, ndwenngoenz menhmenh baenaj, vunz hix bi geq gvaq bi, Goenggouj roxnyinh aen dungx de ciengzciengz getndumj, de laihnaeuz swhgeij heuj vauq nyaij ngaiz byaek mbouj soiq, gyanx roengz conghhoz bae sieng aen dungx lo, ndigah hix mbouj dawz gijneix cuengq haeuj ndawsim bae.

Ngoenz he banringz gwn ngaiz- ringz seiz, Goenggouj roxnyinh aen dungx youh in hwnjdaeuj lo, lumj miz maz doxgaiq camx nei, youh lumj miz maz doxgaiq youq ndawde gienjlulu, loengh ndaej Goenggouj hanhheu rim ndang, ndang saenzfoegfoeg.

Seizhaenx Cangzciz daeuj yawj daxgoeng daxbuz, raen daxgoeng yienghneix, couh heuh vunz daeuj caez soengq Goenggouj bae yihyen lo.

Daengz yihyen genjcaz cij rox, Goenggouj dwg saejgungz fazyenz, aeu sikhaek guh soujsuz cij ndaej.

Goenggouj naeuz:“Gou bineix ndaej goujcib geij bi lo, ciuhneix caengz baenzbingh haeuj yihyen gvaq, mbatneix dwg mbat daih’it, mbouj rox baenzlawz yiengh ne.”

Soujsuz gig swnhleih, gvaq aen singgeiz he le, Goenggouj ndaej okyen maranz lo.

Ngoenz daihngeih haetromh, cunhcangj caeuq geij boux vunz riuj haujlai doxgaiq daeuj daengz ranz Goenggouj. Cangzciz seizneix daeuj damqyawj song bouxgeq gvaq le, cingq yaek okbae, raen cunhcangj gyoengqde daeuj daengz, miz di doeksaet, mbouj rox maz saeh, baenq ndang couh daiq gyoengqde haeuj ranz.

Cunhcangj gyoengqde byaij daengz ndawranz, raen Goenggouj naengh youq ndawding yawj densi, couh gvaqbae caeuq de gaem fwngz, riuhoho naeuz:“Mwngz bouxlaux ciuhneix mbouj yungzheih, ndawranz laux nyaeq cungj baenzbingh, hix gwn gvaq haujlai haemzhoj, mwngz doiq guekgya miz gung’yen, miz goenglauz caemh miz hojlauz, guekgya mbouj lumz mwngz, cwngfuj mbouj lumz mwngz, bineix banggungz daengz ranz sou, baezneix mwngz bouxlaux haeuj yihyen yw bingh mbouj deng ngaenz law, cienzbouh ndaej siu caez.”

Goenggouj dingq le, song da gvaengz raemx, naeuz:“Guekgya raeuz yied daeuj yied ak lo, bienq ndaej engq hungmbwk fouqgiengz lo, raeuz gwndaenj youq aen seiq neix geijlai vuenyungz ha!”