原文（Hoh sei daj 《Mbaj Gyaez Va·Gingj Seizcin》 aeu）：

花褪残红青杏小。燕子飞时，绿水人家绕。枝上柳绵吹又少。天涯何处无芳草！ 墙里秋千墙外道。墙外行人，墙里佳人笑。笑渐不闻声渐悄。多情却被无情恼。

译文：

1

Seizcin bakva rang,

Byawz mbouj angq ciet neix;

Va mak hai rim deih,

Angj ndaej mbwn oqfwd.

Makgingq va reuq doek,

Goekva hot ok lwg;

Daengzcog mak henjrwg,

Dwg vunzraeuz yiengjsouh.

Roegenq heux mbanj mbin,

Racimh dieg caux ranz;

Gamznaez daeuj lajyiemh,

Caeqnem guh ranz moq.

Geudah heux gvaq mbanj,

Ranzranz angqvauvau;

Ndawraemx bya gungq nyauh,

Youz baedauq caen faengz.

Leix miz gyoengq goliux,

Ndit ciuq rumz raeuj ci;

Gij faiqliux hau sih,

Deng ci bae yaek liux.

Vacin loenq bae liux,

Faex rum ciuq heuyau;

Nazreih gij haeuxmiuz,

Youh mwncup rim biengz.

Vunz byaij gvaq rogciengz,

Nyi ndawciengz sau gangj;

Bi lwgvid riu angq,

Buengq bae youh vangh dauq.

Vunz mienh yamq mienh dingq,

Sing angqriu gag law;

Aenvih liz mbouj gyawj,

Sing angq byawz ndaejnyi.

Yienznaeuz ndi raen sau,

Ndawhoz dauq gag ngeix;

Sim de miz gou lwi,

Cingqcaen seih bouxngongz.

（都安瑶族自治县 Lanz Gozvuj/蓝国武）

2

Va gomakgingq loenq caengz liux, gyaeuj ngafaex couh dawz mak heu iq. Duz roegenq mbin gvaq gwnzmbwn, raemxdah sawdikdik, hopgvaengz baenz aen mbanj. Gij faiq gwnznye goliux gaenq ngaiz rumz ci dwk yied daeuj yied noix. Hoeng mwngz gaej yousim, lajmbwn gizlawz mbouj miz va hai mwncupcup, rangrwtrwt.

Baihndaw veizciengz, miz dahsau gyaeu- gyetgyet he cingq bi yungxyaz. Boux byaij gvaq baihrog ciengz cungj dingq ndaejnyi gij singriu dahsau, goksadsad, ndeidingq raixcaix. Ciemh- ciemh, gij singriu baihndaw veizciengz cix menhmenh yaemzrwg. Lumjnaeuz bonjfaenh cingz lai ngaiz dahsau ciedcingz sienghaih le.

（武鸣区 Banh Banghhan/潘邦汉）

3

Dujva loenq le, gwnzfaex gogingq couh maj ok aenaen lwggingq, iqetet. Roegenq youq gwnzmbwn mbin bae mbin dauq, diuz dah sawdikdik lae heux aen mbanjranz. Rumzcin dawz cehfaiq goliux ci ndaej yied daeuj yied noix, hoeng, mbouj yungh doeknaiq, lajbiengz gizgiz cungj raen nywjmwn heufwdfwd.

Baihndaw veizciengz, dahsau angq bi nyauz- nyeg, singriu diemzswdswd. Gwnzroen baihrog veizciengz, bouxbyaijroen dingz din maij dingq, hoeng gij singriu baihndaw veizciengz ciemhciemh siusaet, cingzngeih bonjfaenh mbouj ndaej cienz daengz, bouxbyaijroen doeknaiq hozndaenq, simliengz dangqmaz.

（上林县 Lanz Vujgenh/蓝武坚）

4

Vahoengz gomakgingq bienq vahau yaek sih lo, nge’gingq ngamq dawz aen. Roegenq youq gwnzmbwn mbin bae mbin dauq, ndawdah raemx heungitngit lae gvaq henz ranzmbanj. Gij faensei gwnz goliux yied mbin bae yied noix, hoeng gwnzbiengz gizlawz mbouj miz go’nyaj iq ni.

Baihndaw ciengzhumx dahsau cingqcaih caemz bibuengq, vunz byaij gvaq rog ciengzhumx dingq ndaejnyi dahsau riuhehe, caen dwgmaij. Vunz yied byaij yied gyae, gij singriu menhmenh dingq mbouj ndaejnyi, lumj gou doiq dahsau miz cingzngeih, de dauq hawj gou simnden.

（平果市 Liengz Ginhhaij/梁金海）

5

Vahoengz doq loenq doq giet lwggingq heu iq. Saekseiz miz roegenq mbin gvaq, raemx sawdik gvaengxgvax aenmbanj.

Faiqliux gwnznye yied mbin yied noix. Lajmbwn gizlawz mbouj miz rum ndei.

Ndawciengz miz dahsau bi nungxnengh rogciengz miz roen gvaq. Bouxbyaijroen rogciengz caeg dingq, saulengj ndawciengz riugetget.

Singriu ciemhciemh caem roengzdaeuj, cingz lai cix vih fouzcingz nyap.

（武鸣区 Vangz Cinjyen/黄锦艳）

6

Vagingq lij loenq caengz liux, nyefaex couh ok mak lo, youh heu youh iq.

Roegenq mbin gwnzmbwn, raemx saw lae henzranz.

Rumz boq nye faexliux, faiqmienz yied boq yied noix lo.

Hoeng, daihdeih gizlawz mbouj dwg va nywj mwncupcup ne.

Ndawciengz miz aen nungxnengh, rogciengz miz roen.

Rogciengz miz vunz byaij, ndawciengz lwgsau riu.

Singriu ciemhciemh dingq mbouj nyi, lumjbaenz mizcingz cix deng fouzcingz sieng.

（青秀区 Lij Yanghlenz/李香莲）

7

Seizcin yaek gvaq, va loenq yaek liux, gwnz gomakgingq gaenq giet baenz aen baenz aen makgingq iq lo. Roegenq youq gwnz mbin bae mbin dauq, raemxdah sawdikdik hopheux aenmbanj. Gij mienzliux gwnz goliux gaenq deng rumz ci ndaej yied daeuj yied noix. Mbouj gvaq gaej heiq, dauqcawq cungj dwg nywj rang mwnnoengq.

Ndaw veizciengz miz dahsau ndeu cingq buengq coucien, vunz byaij gvaq rog veizciengz, cungj dingq ndaejnyi gij singriu ndeidingq de. Menhmenh, gij singriu ndaw veizciengz couh dingq mbouj nyi lo, bouxbyaijroen rog veizciengz gag raen siengsim, lumjnaeuz swhgeij mizcingz cix deng dahsau fouzcingz sienghaih lo.

（青秀区 Ouhyangz Veiyez/欧阳惠月）