Mehyah dwg boux guh seng’eiq, hai aen bouq gwn haeux hung ndeu, gij saeh aen bouq de gienhgienh haeujsim, ndigah de nyaengq raixcaix, baenzngoenz deng saeh iq saeh hung geujheux, goq mbouj ndaej ranz, saeh ranz vut hawj goenggvan.

Goenggvan dwg bouxdaeuz danhvei, hix nyaengq, song sam ngoenz roengz mbanj, haj loek ngoenz okcai, bang mbouj ndaej mehyah saek yiengh. Nanzgvaiq mehyah naeuz:“Gou beij duzgaeq hwnq caeux, beij duzvaiz naiq, beij duzmax ninz noix.”

Ceiqgaenh, mehhya raed byoem- raez dinj bae, gvaqlaeng youh ienqhoij yaek dai. Byoemraez de ndeiyawj bw, fouxfwd ngaeuzndong, lumj raemx- doekdat nei duengq youq laengboih, raez daengz gyaeujhwet, gyoengq mehmbwk byawz raen byawz haenh, de hix vih neix daekeiq vauvau. Hoeng, de naeuz mbouj miz seizgan dajleix, couh raed dinj lo, goenggvan hix vihneix doeknaiq.

Haetneix dwg couhmoz, goeng- gvan siengj ninz gvaiz di, hoeng caeuxcaeux deng mehyah heuh hwnq, naeuz aeu soengq de bae banhsaeh.

Goenggvan hai ci, mehyah naengh youq henz. Mbouj rox baenz- lawz, gencueg goenggvan deng mehyah gveq sieng, seizhaenx cingq haici, goenggvan mbouj dawz haeujsim.

Daengz Roensinhhingh, daengj ci caj bouxvunz ndeu, goenggvan sijsaeq bae yawj cij rox, ribfwngz mehyah raez lai, gizsieng couhdwg deng ribfwngz fwngzswix de gveq. Goenggvan naeuz:“Ce ribfwngz baenzlai raez, gveq gou lo.” Mehyah dawz fwngz daeuj yawj, swenj:“A! Gou mbouj rox ribfwngz gou baenzlai raez ni! Gij ribfwngz neix maj ndaej baenzlaiz vaiq!” Cingqngamj gyaeuj ci miz gaiq gebribfwngz ndeu, goenggvan couh nengh fwngz mehyah gvaqdaeuj bang de raed ribfwngz.

Gvanbaz gaenq haujlai nanz mbouj yienghneix depgaenh lo, yienz- naeuz seizneix songde mbaq bungq mbaq, fwngz gaem fwngz, baenzneix caenmaed, hoeng goenggvan mbouj roxnyinh miz maz.

Mehyah cix mbouj doxdoengz lo, de gig yiengjsouh gij caenmaed seizneix, mbouj rox mbouj nyinh, aen gyaeuj de ngengq roengz gwnzmbaq goenggvan bae, sing daemq naeuz:“Yienghneix caen ndei!”

“Dwg ha, yienghneix caen ndei!” Goenggvan riengz de naeuz.

“Du du” soujgih yiengj, baez dingq couh rox dwg soujgih mehyah yiengj. Seizneix dwg seizdaih moq, vunzlai cungj maij cang gag cungj gag yiengh caijlingz soujgih, cij miz mehyah lij aeu sing hongz denvagih guh caijlingz soujgih, naeuz cungj sing neix couhdwg sing denva.

Mehyah lij maez youq ndaw caenmaed, laihnaeuz aen denva neix daeuj ndaej mbouj habseiz, de gik- gyatgyat dawz soujgih okdaeuj, numq- natnat naenx naed menjdiz.

“Mehlauxbanj, vaiq, vaiqdi gvaqdaeuj, gizneix miz saehhung saehgaenj!”

“Maz saeh ha? Mwngz dwg byawz?”

“Mwngz gaej guenj gou dwg byawz. Gou raen gienh saeh gaenjaeu ndeu——gvan mwngz youq gwnz ci cingq got mehmbwk ndeu.”

“Maz? Youq gizlawz?

“Youq Roensinhhingh.”

“Seizlawz?”

“Seizneix. Mwngz sikhaek gvaq- daeuj, haengjdingh ndaej raen.”

“Miz cungj saeh neix? Mazfanz mwngz yawj cingcuj di, songde guh- maz?”

“Yawj mbouj cingcuj, cij raen mehmbwk haenx ing mbaq gvan mwngz, gvan mwngz gaem fwngz mehmbwk haenx.”

“Caen dwg gvan gou? Mwngz mbouj yawj loek ba?”

“Mbouj loek. Aen ci de gou sug.”

“O! Yienghneix a.” Mehyah doiq goenggvan riuriu, gij riu de miz di gujgvaiq, “mwngz caiq yawjyawj, mehmbwk haenx dwg byawz?”

“Fajnaj raen mbouj cingcuj geijlai, cij raen de byoem dinj, cangndang haemq seizhwng.”

Mehyah youh riunyum naeuz:“Seizhwng? Gyo’mbaiq mwngz! Mwng dauqdaej dwg byawz?”

“Sing gangj lauxdoengzhag mwngz dingq mbouj ok?”

“Caen dingq mbouj ok, mwngz naeuz ba.”

“Gou dwg Lauxcangh, mwngz aeu gyo’mbaiq gou bw.”

“O! Lauxcangh ya! Mwngz youq gizlawz?”

“Youq giz mbouj gyae haenx.”

“Hauhneix mwngz gvaqbae yawjyawj, mehmbwk de dauqdaej dwg byawz, ndei lwi?”

“Mbouj ndei! Yienghneix gou couh ngaiz laeuh lo.”

“O! Ndei ba, gyo’mbaiq mwngz lo.”

“Mwngz dauqdaej daeuj mbouj daeuj?”

“Gou mbouj bae lo, goenggvan gou, gou rox de, gou saenq de haengjdingh mbouj guh gij saeh doiq mbouj gvaq gou haenx.”

“W! Gou naeuz gyoengq meh- mbwk sou ha, siliengz ha! Cij goq ngaemgyaeuj doz cienz, mbouj rox sou doz baenzlai cienz daeuj guhmaz? Laeng ranz dawz feiz hix mbouj goq, goet cienh lu!”

“Deng, mwngz naeuz ndaej deng. Mazfanz mwngz vunzndei guh saeh- ndei daengz daej, gvaqbae yawjyawj, bang gou yawj cingcuj, mehmbwk haenx dauqdaej dwg byawz.”

“Gou naeuz gvaq lo, gou cij ndaej dwk denva hawj mwngz, mbouj ndaej caiq gyawj lo, caiq gyawj couh laeuh lo. Ngoenzlaeng gou lij aeu caeuq gvan mwngz raen naj ne, de dauqdaej dwg bouxdaeuz gyoengqdou.”

“Bouxsai vunz, mboenmboen saexsaex, heuh mwngz bae yawj mwngz couh bae, lau maz baenzlai!”

Lauxcangh mbouj ndaej mbouj gvaqbae.

“Lauxcangh, dwg mehmbwk neix ha?”

“A! Laxlawx dwg mehlauxbanj ya, mbouj……mbouj ndei eiqsei!”

“Gou caensim gyo’mbaiq mwngz. Gyo’mbaiq mwngz baenzneix haeuj- sim gij saeh gou, gou caen aeu ndeindei gyo’mbaiq mwngz.”

Lauxcangh naj mongmoed byaij deuz lo.

Goenggvan singjgaeh cam:“Sou dwg maz gvanhaeh?”

“Doengzhag.” Mehyah naeuz.

“Doengzhag? Doengzhag baenz- neix haeujsim mwngz? Ndaek doengz- hag neix lauheiq gwnzbiengz mbouj luenh bw?”

“Mwngz lij naeuz dem, dangh- naeuz ngoenzneix mbouj dwg gou, mwngz saet roengz Dahvangzhoz bae hix swiq mbouj seuq bw.”

Mehyah lumjnaeuz fwt siengj daengz maz nei, faek cam:“Naeuz, mwngz bingzseiz dwg mbouj dwg ciengz daiq mehmbwk deng bouxwnq raen? ” Mehyah doq cam doq nengh rwz goenggvan.

“Mwngz cej bae gyae lo.”

“Mbouj dwg, vihmaz vunzlai yienghneix riuz mwngz?”

“Ndaek doengzhag mwngz gwn haeux mbouj siu! Gyaez gamyawj vunz.”

“Saeh neix mbouj genjdanh, gvaqlaeng menh caeuq mwngz suenq.”

Boux vunz songde caj haenx byaij daeuj coh ci.

Gyanghaemh haeujninz, gvanbaz caemh ninz aenmbonq, cix gak boux gag ngeix simsaeh, ndawrug caem- rikrik.

“Mehyah caeuq boux haenx dwg maz gvanhaeh, vihmaz de baenzneix yiedsim? Mehyah dajleix aen bouq gwnhaeux neix, haengjdingh roxnaj haujlai vunz, danghnaeuz bouxboux lumj ndaek vunz ngoenzneix, seiq- gyaiq daihhoenx bw……” Goenggvan ngeix.

“Goengvan song sam ngoenz roengz mbanj, haj loek ngoenz okcai, danghnaeuz de youq rog miz saek boux mehmbwk, gou caen mbouj rox bw. Hoeng, vah youh gangj doxdauq, boux vunz neix lij suenq goq ranz, hongranz de guh caez, lienz buhvaq gou hix dwg de bang saeg. Gou haeuj ranz gongz naiq seiz, mbouj heuh de lij gag daeuj bang gou anq mbaq anq laenghoz. Boux vunz yienghneix, mbouj guh gij saeh doiq mbouj gvaq gou ba? Mboujgvaq nanz gangj nw, duzmeuz lawz raen bya mbouj gwn ni?” Mehyah ngeix.

Songde gwq ngeix gwq ngeix, mbouj rox mbouj nyinh ninzndaek lo.

Mbwn rongh lo, goenggvan ndiu gonq, raen mehyah youq ndaw rungj swhgeij gyaenfifi, de song fwngz got mehyah, seizneix de roxnyinh gen maz, hoeng de mbouj gamj doengh, lau cauz mehyah ndiu……

Yaepyiet, songde caemh okdou, yawj coh aen daengngoenz ronghsag ngamq hwnj haenx, ndawsim gag naeuz: Boux vunz sim rongh yawj maz cungj rongh!

Ngoenz moq ndeu youh hainduj lo, songde gak boux gag bae nyaengq saeh swhgeij……