Lwgminz aeu gijgwn guh gwnz- mbwn. Nohmou dwg gijgwn gwnz daiz beksingq ciengz raen he, ca mbouj lai ngoenznaengz cungj raen bw. Raen daengz gijde, hawj gou dauqngeix gij saehgaeuq gou youq lajmbanj ciengx mou.

Youq sigij gonq betcib nienzdaih co, lajmbanj ngamq faen reihnaz daengz ranz, mbanj gou moix ranz faen ndaej reihnaz haemq noix, bouxvunz ndaej naz sam faen, ndaej reih caet bet faen baedauq. Binaengz mizseiz gij haeuxgwn hix mbouj gaeuq gwn geijlai. Seizhaenx lajmbanj gij monz- loh ra cienz haemq noix, bouxguhnaz binaengz cij ndaej ndaem di haeux、 haeuxyangz、 duhdoem caeuq duhhenj, ciengx mou couhdwg faenh fuzye gyaranz ceiqndei lo. Seizhaenx laj- mbanj gak ranz dingzlai cungj ciengx miz duz baj song duz mou, ciengx hung le gai, vuenh ndaej geij bak roxnaeuz cien lai maenz ngaenz, couhdwg aen ranz gij souhaeuj ceiq lai lo. Ndawranz ngoenznaengz cawx gij gyu gij youz, cawx buh moq、 danci、hongdawz gij doenghyiengh roxnaeuz lwgnyez doegsaw haicei daengj, caemhcaiq hwnq ranz roxnaeuz aeu bawx, cungj dwg baengh ciengx mou gai le ndaej di ngaenz, duzmou couh lumjbaenz aen “ngaenzhangz iq” ranzvunz lajmbanj ndeu.

Ciengx mou couh aeu mbaet byaekcwx ma gueng hawj mou gwn, ndigah gij hong mbaet byaekcwx doiq ban gou caen sug raixcaix. Aenvih gyoengq vunz hung ngoenznaengz cungj nyaengq gij hong reihnaz, gij byaekcwx mou gwn haenx, dingzlai dwg gyoengq lwgnyez banringz bae doenghnaz mbaet. Ra byaekcwx couh bienqbaenz faenh “cozye” lwgnyez lajmbanj cuengqhag maranz aeu guh lo. Geiqndaej mwh youq lajmbanj doeg siujyoz, banhaet cuengqhag caeux, aiq dwg banhaet 10 diemj cung baedauq couh cuengqhag lo. Daengz cuengqhag seiz, dou gaenjgip maranz, ganjvaiq gwn cuk le, couh aemq aen lamzcuk ndeu, caeuq gyoengq doengzdoih bae doenghnaz mbaet byaekcwx lo.

Youq seizcin, menhmenh raeuj hwnjdaeuj, raemxfwn cungcuk, youq laj dinbya henz mbieng, gak cungj vacwx nywjcwx maj ndaej deih- yaenyaen, moix gaiq moix gaiq cungj heuswdswd dem, duzmou haenq ngah gwn. Byaekcwx miz byaek- begva、go’ngaih、mbawsang doengh gij nywj oiq roxnaeuz mbaw oiq. Youq doenghnaz, dou maeuq youq ndaw reihnaz menhmenh ra, yungh fwngz daiq rag beng, roxnaeuz mbaet, dawz gij byaekcwx cuengq roengz lamzcuk. Ra aen cungdaeuz baedauq, gij byaekcwx ndaw lamzcuk hix rim- rwgrwg lo, gij haeuxgwn duzmou ngoenzneix hix ra ndaej gaeuq lo. Aemq aen lamzcuk miz ngeihcib lai gaen naek daj doenghnaz maranz, byaij yaek song goengleix gyae, doiq lwgnyez dou daeuj gangj hix dwg gij hong mbouj mbaeu bw. Byaij youq gwnz loh iq lajmbanj ngutngut ngeujngeuj, diuz cag lamzcuk laeg youq gwnz mbaq, dwgrengz dangqmaz. Byaij ndaej geij bak mij, youh aeu vuenh mbaq aemq, yienghneix vuenh geij baez gvaq, song mbaq cungj deng laeg ok geij diuz yaenq saekhoengz, roxnyinh miz di in. Ngamq byaij haeuj bakdou ranz, duzmou lumj nyouq ndaej gij feih ndeigwn ma daengz nei, sikhaek youq rienghmou “u u” swenj hwnjdaeuj, caemhcaiq yungh diuz galaeng daeb deih、 diuz gagonq benz hwnj rienghmou, siengj bin okdaeuj. Gou ganjvaiq dawz gij byaekcwx vit haeuj rienghmou bae, gyoengqde gaenjfofo gwn hwnjdaeuj, haeb ndaej henz bak cungj nem rim gij raemx- byaek saekheu. Gueng sat mou, hix gaenh banringzgvaq song diemjcung, gou youh aeu gaenjgip bae hagdangz doegsaw lo. Faenh “cozye” mbaet byaekmou neix, itcig buenx gou daengz siujyoz bizye bae.

Cawzliux ngoenznaengz bae mbaet byaekmou, bingzseiz lij aeu sai haujlai seizgan bae dajleix duzmou bw. Lumjbaenz aeu ciuqseiz dajsauq rienghmou, cingleix haexmou, hawj rienghmou seuqsetset bae. Duzmou ngoenznaengz ok gij haexmou haeu- saengsaeng, hawj vunz nanz nyouq, hoeng neix hix dwg gij bwnh ceiq ndei. Dawz gij haexmou cingleix okdaeuj doi hwnjdaeuj, menhmenh oemq bi ndeu, hix com ndaej haujlai bwnh bw. Bi ndeu ciengx song duz mou, couh lumjbaenz ndawranz miz aen cang bwnh iq nei.

Duzmou gwn ndaej yienghneix rwix, couh maj ndaej menh lai lo, mizseiz aeu bi buenq roxnaeuz song bi cij majhung. Majhung le dingzlai dwg gai hawj bouxcanghbuenq, dawz bae gak dieg hawciengz gaj, gai hawj gyoengqvunz. Gek geij bi, ndaw ranz gou hix gaj duzmou ndeu, gai bae buenq lai, dawz gij daepmou、dungxmou、 bwtmou、 saejmou caeuq di nohmou, cingj beixnuengx daeuj caez gwn donq ngaiz ndeu. Seizhaenx, hix dwg ngoenzciet ceiq angqyangz gyoengq lwgnyez lo, gyoengqvunz ndaej gwn donq nohmou ndeu. Aenvih duzmou dwg gag gueng ciengx, ciengx ndaej hix nanz, nohmou nadwddwd. Aeu daeuj cauj, cuengq di gyu caeuq ciengqyouz, gijwnq boiqliuh couh mbouj cuengq, feih hom byoengq ndaeng, ndeigwn raixcaix. Ranz ndeu cauj nohmou, cib ranz vunz cungj nyouq ndaej gij feih hom. Daegbied dwg cawj dungxsaej mou ndeu, saejoiq nadwddwd, youh byoiq youh hom, nyex ndaej dou myaiz laedidi, bouxboux gwn ndaej gokbak youz lwenqdwkdwk.

Seizneix, lajmbanj gij monzloh ra cienz lai lo, aen cienzbau gyoengq vunz hix ngoenz beij ngoenz bongz hwnjdaeuj lo. Seizneix bouxguhnaz ciengx mou noix lai lo, ciengx mou gaenq bienqbaenz aen canjyez conh- yezva、gveihmozva, gak aen conhyez yangjcizcangz sanj youq hawsing lajmbanj. Youq ndawde, duzmou cujyau gwn gij swzliu gunghcangj swnghcanj, yungh gij fuengfap vaiq maj, ciengx sam haj ndwen couh okriengh buek ndeu. Gwnz hawciengz nohmou hix lai hwnjdaeuj, gyoengq- vunz caiq hix mbouj aenvih nohmou noix youheiq lo. Hoeng gou roxnyinh nohmou seizneix, cungj mbouj miz gij feihdauh nohmou seiz iq gou gwn.

Youq gij mozsiz conhyezva swnghcanj seizneix, baenzlawz bauj- cingq soqliengh gung’wngq, youh baujcingq binjciz nohmou, habhoz gij iugouz gyoengqvunz yaek gwn gijgwn swnghdai saekheu, coicaenh ancienz gwn doxgaiq. Hoeng, mboujguenj baenzlawz, gij feih hom nohmou seiz lwgnyez, daengz seizneix cungj hawj vunz lumz mbouj ndaej, gij cingzgingj seiz iq gwn nohmou ndawuk vanzlij seiz mbouj seiz fouz hwnjdaeuj.