原文（Hoh sei daj 《Mbaj Gyaez Va·Gingj Seizcin》 aeu）：

花褪残红青杏小。燕子飞时，绿水人家绕。枝上柳绵吹又少。天涯何处无芳草！ 墙里秋千墙外道。墙外行人，墙里佳人笑。笑渐不闻声渐悄。多情却被无情恼。

译文：

1

Vacin doiq saeknding,

Makgingq gwnzgo heu,

Roegenq mbinyeuyeu,

Raemxdah geuj mbanjranz.

Gwnznye mbawliux bi,

Rumz ci faiq loenq liux,

Lajbiengz gvangqliuliu,

Nyaheu gyawz mbouj miz.

Ndawsuen miz sau iq,

Bi nungxnengh guh’angq,

Singriu seiqcawq langh,

Boux gyangroen simbaih.

Singriu ciemhciemh iq,

Yaepyet mbouj nyi sing,

Bouxbyaij lij naemj dingq,

Deng fouzcingz nyapsim.

（平果市 Yiz Ciz/余 执）

2

Va doiq saekhoengz lwggingq hix oiq iq. Roegenq mbin seiz, raemx saw riengz ranz lae. Faiq goliux yied loenq yied noix, gwnzbiengz baenz- lawz mbouj miz rum ndei.

Ndawciengz coucien rogciengz loh. Rogciengz vunz gvaq loh, ndawciengz vunz ndei riu. Singriu ciemh iq dingq mbouj nyi, cingz lai cix vih fouzcingz ndatheiq.

（环江毛南族自治县 Veiz Gyah- manj/韦佳满）

3

Vahoengz loenq le, gij mak- gingq venj gwnz ngeiq youh heu youh iq.

Roegenq mbin seiz, gij raemx- dah heuswdswd gvaengz heux aen mbanjranz.

Gij faiq goliux gwnz ngeiq deng rumz ci bae, yied daeuj yied noix lo.

Lajmbwn gizlawz mbouj miz gij rum dwggyaez?

Ndawciengz miz aen bibuengq ndeu, rogciengz miz diuz roen ndeu.

Rogciengz vunz byaij gvaq, ndawciengz dahsau riuhehe.

Gij singriu ciemhciemh dingq mbouj ndaejnyi lo.

Mizcingz cix vih fouzcingz nyapnyuk.

（上林县 Cinz Yez/覃 悦）

4

Vagingq hai gvaq youh cieg loenq bae lo, gwnznge giet ok mak heu oiq. Roegenq mbin gwnzmbwn, raemxdah sawdikdik lae heux ranz- mbanj. Rumz ci faiqliux youh loenq bae, gaej you, dauqcawq cungj miz doenghgo heuyauyau.

Youq ledciengz ndawranz dah- sau naengh mbongjbiu, singriu daj baihndaw cienz ok rogciengz daeuj, loh gvaq cungj dingq ndaejnyi singriu. Ciemhciemh couh bae gyae, dingq mbouj nyi lo, lumjbaenz deng dahsau hozndat yut mbouj leixlangh le siengsim liux.

（西林县 Cwnz Lizciuh/岑立秋）

5

Cin yaek gvaq bak va reuq, gogingq dawz aen heu iqet. Seiz roegenq ma, diuz dah sawdik heux mbanjranz, faiqliux gwnznye ci yaek liux, gwnzdoengh ndawndoeng gizgiz hoengh.

Sau youq ndawciengz bi nungx- nengh, rogciengz gwnzroen vunz ganj loh. Singriu ndawciengz maez vunzroen, yied byaij yied gyae mbouj ndaejnyi, gag maez cix gvaiq sau gyaeu lai.

（平果市 Loz Ginhhungz/罗金宏）

6

Va loenq dawz aen cin baenz. Roegenq mbin foux, raemxdah heux ranz lae. Faiqliux gwnznye deng rumz ci yied noix, gwnzbiengz gizlawz mbouj miz rum ndei.

Ndawciengz miz coucien rog- ciengz dwg loh. Vunz gvaq loh rogciengz, dingqnyi lwgsau ndaw- ciengz riu. Singriu ciemhciemh siusaet dingq mbouj nyi, cingz lai dauq deng fouzcingz sieng.

（西乡塘区 Linz Gozfwnh /林国芬）

7

Seizcin bae donh. Va makgingq reuq loenq, goekva giet ok lwgmakgingq iq heu. Roegenq youq gyangmbwn mbin bae youh mbin dauq. Geu raemxdah saw heux gvaq ranzmbanj. Gij faiqhau gwnz goliux deng rumzcin ci bae yaek cengh lo. Hoeng, dauqcawq raen miz gorum、 gofaex、gofoed、haeuxmiuz mwncup heuyau.

Byaij gvaq henzciengz diuz loh neix, dingqnyi lwgsau ndawyen riu angqfaengz. Nyuenz dwg dahsau youq ndawyen fwngz gaem song geu cag, naengh lwgvid vid bae buengq dauq, angqfaengz angqriu fouxbeij. Gij sing neix daj ndawyen cienz okdaeuj. Aenvih vunz yaek ganj loh, liz ranz haenx yied gyae. Gij sing angqriu dahsau dingq ndi ndaejnyi lo, bouxmbauq gvaq loh fwt roxnyinh gvaqdaeuj, gou mbouj dwg ngeix dahsau neix lai, byawz roxnaeuz ndawsim de miz mbouj miz gou ne, gag ngeix gag naj saepsang.

（都安瑶族自治县 Goeng Lanz/蓝 公）