“Bwng” sing yiengj ndeu, hap bya hap rungh, aen sing yiengj neix, youq aen sigij gaxgonq caet betcib nienzdaih co, gyoengq lwgnyez laj- mbanj ceiq sug lo. Aen sing yiengj neix, hawj ndawrungh lajmbanj mbouj caiq caemrwg, baenz ndaejnyi aen sing yiengj neix, gyoengq lwgnyez ndawmbanj bouxboux iet gyaeuj hwnjdaeuj, yaephe gyoengqde couh youq gyangmbanj buet hwnjdaeuj, doq buet doq hemq. “Goeng dek haeuxyangz daeuj lo! Goeng dek haeuxyangz daeuj lo.”

Gou dwg youq dieg ndaem haeuxyangz majhung, “dek haeux- yangz” gienh saeh neix, dwg seizhaenx lajmbanj gienh saeh ceiq mizyinx ndeu, hix dwg gienh saeh hawj gou daengx ciuh mbouj lumz.

Baez dingq daengz aen sing dek haeuxyangz, daengx mbanj lwgnyez bouxboux sim hai naj riu, saetsaet diuqdiuq riengz sing yiengj bae ra goeng dek haeuxyangz, mizmbangj lwgnyez couh bae ranz nauh bohmeh vaiq dawz haeuxyangz bae dek.

Goeng dek haeuxyangz dwg vunz daj baihrog daeuj, hajcib bi baedauq, naj ndaem gyaeuj nyungq, fwngz reuq noh co, mbouj miz vunz cam gvaq de ranz youq gizlawz, hix mbouj miz vunz cam de geijlai bi, baenzranz mbouj caengz gij saeh neix. Hoeng de daeuj daengz ndawmbanj, ndawmbanj couh raeujrub, couh angqyangz, vunzmbanj bouxboux dawz de dangq vunzcaen.

Guh faenh hong neix mbouj yungh heuh, goeng dek haeuxyangz daeuj daengz ndawmbanj, ra giz dieghoengq he, gyaq ndei aen rek dek haeuxyangz, couh hai feiz cauj haeuxyangz.

Rek daih’it dwg de aeu haeux- yangz cihgeij daeuj cauj. Cauj ndaej le, de baez biengj hai fa rek, “bwng” sing yiengj ndeu, ndawmbanj mbouj miz gizlawz mbouj ndaej nyi. Lwgnyez couh riengz sing yiengj daeuj daengz giz dieg dek haeuxyangz. Gij haeuxyangzva ngamq dek okdaeuj, hau lumj siet mboeng lumj faiq, goeng dek haeuxyangz couh dawz gij haeux- yangzva boux gaem boux gaem faen hawj gyoengq lwgnyez gwn, doq faen doq naeuz:“Bouxlawz yaek dek couh bae ranz aeu haeuxyangz daeuj vaiqdi lo, mbouj miz vunz dek gou couh gvaq mbanj wnq bae lo.”

Lwgnyez ndaej gwn di haeux- yangzva neix le, mbouj gvaqyinx, youh dingq daengz goeng dek haeuxyangz baenzneix naeuz, bouxboux simgip, vaiqvaiq buet maranz nauh bohmeh aeu haeuxyangz daeuj dek.

Mizmbangj bohmeh ndei gangj, gyoengqde gyau song gak ngaenz hawj lwgnyez le, daek song gaen haeux- yangz couh gaem loz riuj daeh caeuq lwgnyez guhdoih bae giz dek haeux- yangz. Mizmbangj lwgnyez ndawranz gungzhoj, mbouj miz ngaenz roxnaeuz mbouj miz haeuxyangz baenzlai, cij ndei ndwn youq giz dek haeuxyangz neix yawj nauhyied, caj vunz dek ndaej le, cam aeu geij naed haeux- yangzva cimzcimz, gejgej ngah.

Aen rek dek haeuxyangz cang ndaej song gaen haeuxyangz, cang noix mbouj ndaej, cang lai hix mbouj baenz. Dek haeuxyangz aeu gag boux gag daiq fwnz daeuj, dek rek haeuxyangz ndeu itbuen yungh haj gaen fwnz baedauq, lajmbanj ndaw- rungh maz mbouj miz, fwnz cungj miz, doenghboux dek haeuxyangz cungj dwg daiq fwnz daeuj lailai bae, mbouj miz saekdi sim’in, yienghneix couh boux lw di boux lw di, mizseiz boux daeuj doeklaeng hix mbouj yungh daiq fwnz lo.

Dek haeuxyangz miz boux gonq boux laeng, mwhneix, gyoengq lwg- nyez ndawmbanj cungj dwg gig dingqvah, gyoengqde bouxboux gaem daeh riuj loz, boux gaen boux ndwn baenz hangz ndeu caj dwk.

Aen rek dek haeuxyangz luenz lumj aen doengj iq he nei, gyaeuj he hung gyaeuj he iq, goeng dek haeuxyangz dawz haeuxyangz dauj roengz ndawrek bae le, couh dawz fa rek fung maenh, youq gwnz feiz mbouj dingz baenq aen rek. Geij faencung gvaqbae, haeux cauj yaek daengz seiz cug le, goeng dek haeuxyangz couh hemq naeuz:“Hai rek lo, liz gyae di, liz gyae di.” Seizneix gyoengq lwgnyez yawj nauhyied haenx couh lumj raemxrongz nei boux doi boux doiq dauqlaeng.

“Bwng” sing yiengj ndeu, gij haeuxyangz mwhnduj lij baenz naed baenz naed daj ndawrek sinz okdaeuj, naednaed hai va haucancan. Haeux- yangz dek okdaeuj seiz, rox miz mbouj noix sinz okrog bae, seizneix gyoengq lwgnyez couh lumj bang duzrwi nei, cung gvaqbae doxciengj gip gij naed sinz bae gyae, mizfeih fwgfwg gwn hwnjdaeuj.

Mizseiz, vunz daeuj dek haeux- yangz daiq lai, aeu caj baenz buenq ngoenz cij lwnz daengz, gyoengq lwgnyez hix mbouj mbwq, yienznaeuz mbouj caengz daengz de dek, hoeng gyoengqde bae gip gij haeuxyangz sinz gvaq henz bae daeuj gwn, hix angqyangz dangqmaz, ngoenz he mbouj maranz gwn haeux hix mbouj roxnyinh dungx iek.

Song gaen haeuxyangz dek okdaeuj, yaek ndaej loz haeuxyangzva ndeu, gaeuq daengx ranz vunz gwn ciengz he. Gyoengq lwgnyez gyaez dawz haeuxyangzva cang daengz song aen daeh buh bae, miz lengq laeq lwgnyez sim lai damq, couh lienz song aen daeh vaq hix cang rim bae, gwnzndang seiq aen daeh cungj bongzbwdbwd le, lumj lau vunz mbouj rox de miz haeuxyangzva nei, luengq gwnz luengq laj dauqcawq byaij, dauqcawq cienq, doq byaij doq nyaijnyapnyap, gij yienghceij beij gvaq ndwencieng lij angq.

Ranz gou beixnuengx lai, bibi haeux mbouj gaeuq gwn, dek baez haeuxyangz ndeu, couh dangq youq gwnz aen sim daxmeh gvej baez mid he, song gaen haeuxyangz caiq gya di byaekcwx he, couh gaeuq ranz gou gwn ngoenz he lo. Daxmeh cungj sij mbouj ndaej dawz haeuxyangz bae dek, caiq gangj dek baez haeuxyangz ndeu aeu sai song gak ngaenz, daxmeh hix ra mbouj ok gij ngaenz neix.

Doenghbaez goeng dek haeux- yangz daeuj daengz ndawmbanj, dou gig naemj caeuq gyoengq lwgnyez doih itheij bae daengz giz dek haeuxyangz yawj nauhyied, caeuq gyoengqde itheij doxciengj gip gij haeuxyangzva sinz gvaq mbiengj daeuj gwn, hoeng dou cungj mbouj gamj bae gaenh, lau daxmeh gvaiq dou, dou cijndei youq gizgyae muengh dwk.

Bi ndeu seizcou, goeng dek haeuxyangz youh daeuj lo, lwgnyez doih lumj bang duzrwi nei buet gvaqbae. Daxmeh gvaqdaeuj lumh- lumh gyaeuj gou naeuz:“Daih, mwngz dawz song gaen haeuxyangz bae dek ba, geijlai bi daeuj, sou geij beixnuengx caengz ndaej dek gvaq haeuxyangz, daxmeh caen doiq sou mbouj gvaq.” Bihaenx dwg bi daih- ngeih faen reih faen naz daengz ranz, ndawranz haeux gaeuq gwn lo.

Dingq daengz daxmeh yienghneix gangj le, dou seiq beixnuengx boux- boux angq ndaej yaek saet hwnjdaeuj, gou aeu aen loz he cang le song gaen haeuxyangz couh yaek okdou, daxmeh youh ndenq song gak ngaenz hawj gou, naeuz:“Bae ba bae ba! Dek ndaej le, hawj sou gwn donq gaeuq he.” Gou hix mbouj rox daxmeh bae gizlawz aeu ndaej song gak ngaenz neix.

Song gaen haeuxyangz dek okdaeuj, aen loz cang ndaej mojlwtlwt, dou geij beixnuengx doq gwn haeux- yangzva, doq guhdoih ram loz maranz, gwnzloh yamqyamq yousim, couh lau gij haeuxyangzva ndawloz loenq bae.

Daxmeh dawz haeuxyangzva faen hawj dou, bouxboux daehbuh daehvaq cungj cang rim caez, raen dou gwn ndaej meihmwdmwd, aen naj daxmeh riu ndaej lumj duj va ngamq hai nei.

Daxmeh naeuz:“Raeuz saedceij ngoenz beij ngoenz ndei lo, baezlaeng goeng dek haeuxyangz daeuj, sou couh bae dek ba.”

“Caen ha?” Dou bouxboux byaengq da, lumj mbouj daiq saenq gij vah daxmeh nei.

Yaep da ndeu, seizgan couh gvaq bae geij cib bi lo, goeng dek haeuxyangz caiq mbouj raen haeuj mbanj daeuj, gwnzhaw dauqcawq miz haeuxyangzva gai, gij haeuxyangzva gwnzhaw miz sanq baenz naed, miz nap baenz gep, miz giet baenz gaemz, gak cungj gak yiengh, caih vunz maij cungj lawz couh cawx cungj haenx.

Ranz gou geij beixnuengx bouxboux cungj baenzgya lo, ranzranz gwn mbouj you daenj mbouj heiq lo, cawz le gvaq cieng aeu cawx di haeuxyangzva, bingzseiz mbouj miz geijlai boux maij gwn gijneix. Hoeng seiz iq “dek haeuxyangz” gij saeh haenx lij hawj dou ciengzciengz dauqngeix, roxnyinh gij vaiqvued caeuq angqyangz seizhaenx mizyinx dangqmaz, nanznanz mbouj lumz.