Aucaiz baetbaet song fwngz naeuz mbouj aeu, gyoengqde youh ndek roengz gwnzdaiz bae, naeuz gij gaeq de ciengx gwn diemz lai, di ngaenz neix dwg hawj de bimoq ciengx lai geij duz, haemhneix caengz gwn gaeuq, doq gangj doq yiengq bakdou byaij bae.

Ciepdwk, gyoengq lwg、lwgbawx caeuq lwglan, youh riuj gijmak daengz doiqnaj Aucaiz daeuj, naeuz hawj de menhmenh gwn, gaenq haemh lo, ngoenzcog lij aeu hwnjban, aeu dauq ndawsingz cijndaej.

Okdou seiz gyoengqde lij daengq hawj Aucaiz rib gij vanj gwnzdaiz bae.

Yaepseiz, haxbaenh ndawranz ngamq gyukroegroeg, mwhneix youh caemdikdik lo, fagcim doek roengz gwnznamh cungj ndaejnyi sing.

Aucaiz naengh youq henzdaiz, aen hab dan’gauh caeuq gij mak haenx doxcomz sangsang lumj goengq bya iq nei, lij miz gij ngaenz hoengz- fwgfwg lumj ngaenzfangz haenx. Yawj gij yiengh neix, Aucaiz roxnyinh swhgeij couhlumj duzsiengq ndaw- miuh nei. De yied ngeix yied hozgaek: Vunz caengz dai ne, couh buiz gonq lo!

Aen mauh mbouj sam mbouj seiq haenx lij daenj youq gwnzgyaeuj, Aucaiz couh vut bae, ndwn hwnqdaeuj bae rib vanj gwnzdaiz.

Caet bet daiz byaek rimmbwt- mbwt, gwnz de miz nohmou nohyiengz, nohbit nohbya. Cawzliux deb nohgaeq gwn sat, haujlai cungj mbouj ning gvaq, daegbied dwg geij duzbya, gaxgonq dwg yienghlawz seizneix couh yienghlawz.

Aucaiz fwt siengj daengz dahcej de, danghnaeuz gaxgonq miz gijgwn baenzneix ndei, Dahcej de couh mbouj dai lo. Aucaiz mbouj maij gvaq ngoenzseng, couhdwg vih gienh saeh neix, aenvih dahcej de couhdwg youq ngoenzseng dai bae.

Aucaiz caeuq dahcej seng youq aen seizdaih gwn mbouj miz gwn, daenj mbouj miz daenj. Gaej naeuz nohbit nohgaeq lo, bi daengz haemh cungj gwn byaekndoeng.

Daxmeh dwg mehmaiq, dingq- gangj daxboh bae dangbing dai lix mbouj rox. Seizde caengz faen ndaej reihnaz, daxmeh youh mbouj rox bae lawz ra hong guh, cijndei ngoenz- ngoenz daiq songde haeuj ndoi bae mbaet byaekndoeng, cij cengqgengz dienz dungx. Ciengznienz gwn byaek- ndoeng dahcej yied ngoenz yied byom, de bingh laemx lo.

Seizhaenx mbouj miz ngaenz bae yw, bingh le cij ndaej aeu ganjgyoij daeuj goenj raemx sabsab najbyak, roxnaeuz catcat aenndang. Baenzbingh ninz geij ndwen, dahcej cij lw naeng duk ndok, byom lumj fwnz nei. Ngoenzde dwg ngoenzseng de ndaej cibsam bi, de maeuz daxmeh:“Daxmeh, ngoenzneix dwg ngoenzseng gou, gou naemj gwn baez noh he, ndaej mbouj?”

Daxmeh naemj le, ngaekngaek gyaeuj couh okdou bae lo.

Laengmbanj miz diuz rij ndeu, ndawde ciengz miz bya youz okdaeuj. Daxmeh banhaemh couh okbae lo, cigdaengz banhwnz cij mo ndaej song sam duz bya hung lumj lwgfwngz nei dauqma, aeu raemx cawj le hawj dahcej gwn.

Dahcej ngamq ndoek geij amq, couh naeuz mbouj gwn lo, De naeuz daxmeh:“Meh, gou gwn diuzrieng couh ndaej lo, louz diuzndang hawj daegnuengx, daegnuengx aeu maj ndang ne.”

Daxmeh veq naj ok henz bae vuetvuet raemxda, naeuz:“Mwngz gwn ba, ndaw rek lij miz haujlai dem.”

Dahcej ngauzngauz gyaeuj naeuz:“Gwn mbouj roengz lo, gou yaek ninz yaep ndeu.” De baez ninz, couh mbouj caiq ndiu gvaq lo.

Siengj daengz neix, Aucaiz sim soemjswdswd, caen mbouj maij gvaq ngoenzseng, hoeng gijneix youh dwg gij sim’eiq gyoengq lwglan, de youh mbouj ndei doi.

Yawj gij daiz byaek rimmbwt- mbwt neix, Aucaiz gag damz naeuz:“Baenzlai byaek lw, gou boux dog buenq bi cungj gwn mbouj liux bw.” De ngauzngauz gyaeuj, laebdaeb sousib vanj dawh.（2 sat）