原文（Hoh sei daj 《Duzmbaj Gyaez Va·Gingj Seizcin》 aeu）：

花褪残红青杏小。燕子飞时，绿水人家绕。枝上柳绵吹又少。天涯何处无芳草！墙里秋千墙外道。墙外行人，墙里佳人笑。笑渐不闻声渐悄。多情却被无情恼。

译文：

1

Va reuq mbouj caiq nding，

Makgingq ngamq dawz moq；

Naednaed venj byai go,

Saihoz soemjswdswd.

Roegenq mbin gwnzmbwn，

Raemx humx riengz mbanj byaij;

Goliux faiq mbouj lai，

Gaej gvaiq nya caengz loeg.

Bi nungxnengh ndawciengz,

Singriu riengz rumz byaij;

Rogciengz vunz gvaq lai,

Gaij dingzdin mbouj yamq.

Singriu ciemhciemh iq，

Mbouj miz vunz gangj vah;

Ndwn youq rogciengz caj,

Naj nyaeuq sim youh danh.

（西林县 Vangz Civeij/黄志伟）

2

Seizcin yaek gvaqbae, dujva gaenq gyaeb lo. Gwnz nyefaex makgingq gaenq giet ok haujlai mak iq. Duz roegenq mbin youq gwnzmbwn, diuz dah sawdikdik hopndaet aen mbanj. Gwnz goliux, faiqliux deng rumz boq ndaej menhmenh noix lo. Hoeng gaej yousim, gizgiz cungj raen haujlai nywj heu.

Baihndaw ciengzhumx miz boux dahsau cingq bi yungxyaz, vunz byaij gvaq baihrog ciengzhumx, lij dingqnyi singriu dahsau. Menh- menh, singriu couh dingq mbouj raen lo. Lumjnaeuz swhgeij mizcingz deng dahsau fouzcingz sienghaih.

（平果市 Lij Vwnzmei/李文妹）

3

Va reuq loenq doek, gogingq dawz mak oiq, roegenq mbin gyangmbwn, raemxsaw heux mbanjranz. Faiqliux deng rumz gienj ringxret. Lajbiengz gizgiz miz nywj oiq. Nuengx youq gyanghongh bi nungxnengh, singriu bongh rwz vunz gvaq loh, doq byaij doq gyae mbouj nyi sing, lumj deng dahnuengx fouzcingz ndek.

（宾阳县 Lingz Sauvaz/凌少华）

4

Va mbouj caiq hoengz, makgingq heu did ok nyefaex daeuj. Duz roegenq youq gwnzmbwn mbin bae mbin dauq, gadah raemx cinghriri lae youq henzmbanj. Rumz ci faiqliux loenq yaek liux, hoeng mbouj yungh lau, gizgiz cungj miz faex heu lumj seizcin. Dahlwgsau youq baihndaw ciengz bi nungxnengh, singriu cienz ok baihrog ciengz daeuj, gig ndeidingq. Yaep le, singriu dahsau baihndaw ciengz ciemhciemh mbouj ndaejnyi, gyoengqvunz gig doeknaiq byaij gvaq baihrog. Lumjnaeuz dwg Dahsau haih gyoengqde siengsim nei.

（平果市 Luz Lilanz/陆丽兰）

5

Seizcin yaek caenh, vahoengz reuqloenq, gomakgingq gaenq maj ok mak iq heu saep haenx. Roegenq mbin gvaq mbwn, raemxdah sawdik hopheux mbanjranz vunz.

Faiqliux gwnz nga deng rumz ci ndaej yied daeuj yied noix. Mbwn gvangq loh gyae, gizlawz mbouj miz nywj ndei ne! Ndawciengz coucien venj ndaej sang, dahsau cingq baed coucien.

Rogciengz dwg diuz roen iq, gij vunz byaij gvaq cungj dingqnyi singriu ndawciengz. Singriu ciemhciemh couh dingq mbouj nyi lo, menhmenh siusanq lo. Boux byaij loh simnyap lo, lumjnaeuz gij cingz lai swhgeij deng dahsau fouzcingz sieng nei.

（凤山县 Bwz Haij/白 海)

6

Va loenq le,

Byaifaex giet makgingq iq.

Roegenq mbin youq gwnzmbwn,

Dahsaw heux gvaq mbanjranz vunz.

Faiqliux deng rumzcin boq noix,

Lajmbwn gizgiz cungj raen nywj mwn nywj heu.

Baihndaw ciengz,

Miz lwgsau bi yungxyaz.

Rogciengz miz vunz byaij gvaq,

Ndaejnyi ndawciengz lwgsau riu.

Singriu yied daeuj yied dingq mbouj nyi lo,

Lumjnaeuz bouxmizsim deng bouxfouzcingz sieng.

（右江区 Liz Siujlingz/黎小龙）