Angqhoh “Song Hoih ” Ndaej Ciuhai

Byadah naj riu fwj hoengzmaeq,

Gwnzbiengz daihdeih caez ndwetdouq(nauhyied);

Vunzlai ciengq go youh diuqfoux,

Angqcoux guek raeuz hai “Song Hoih”.

Bineix sam nyied caen sim diemz,

Daibyauj veijyenz haeuj daengz Ging;

Yaenglwnh guekgya daih saehcingz,

Vih raeuz bouxminz naemj fukheiq.

Duzroeg gwnzndoeng haen guhdoih,

Daengx guek “Song Hoih” ok cingsaenz;

Heuh gyoengq beixnuengx roengzrengz haen(ak),

Doxgiet guh baenz diuzcag ndaij.

Roq gyong roq nyenz youh diuqfoux,

Rwenz doh biengz raeuz caeuq biengz wnq;

“Song Hoih” cingzsaenz doengzcaez lwnh,

Gou guh mwngz hwnj nauhhumhum.

Ciengx bya soujsien yaek vat daemz,

Ndaem naz soujsien yaek bwh gyaj;

Senhconz gunghcoz mbouj doxcaj,

Baihgwnz baihlaj eufwen gonq.

Baekging Yinzminz Daveidangz,

Daibyauj haeuj cangz dingq baugau;

Coenzcoenz gawqgawq cungj dijbauj,

Doengh boux daibyauj angqfaengfaeng.

Cwngfuj gunghcoz aen baugau,

Diuzdiuz cungyau yaek aeu rox;

Guekgya cungjlij cungj gangj doh,

Beksingq aeu rox coq ndawhoz.

Dauqngeix Gaxgonq Gij Cingzcik

Dauqngeix bi’gvaq gij hong daeuj,

Youh dawz haj bi gunghcoz baiz;

2022 cungyau lai,

Dangj raeuz ciuhai Ngeihcib Daih.

Miuzveh guek raeuz lamzdoz hung,

Mienhdoiq fwnrumz mbouj doiq mbaek;

Gaijgwz fazcanj yinvu naek,

Ciuqyiengh dingj aek bae mbouj dingz.

Dangj daeuj daiqlingx raeuz bouxminz,

Binghraq itdingh yaek fuengz ndei;

Ginghci yaek onj guh hwnjbae,

Fazcanj guh ndei gij ancienz.

Gwih max fad bien buet cij vaiq,

Rumzcin ci lai va cij hoengz;

Dangj caeuq bouxminz doengz yunghgoeng,

Guekgya cij hoengh hwnj dieg sang.

Gyadaih hungzgvanh diuzgung ndi(ndei),

Saedyienh ginghci ndaej bingzonj;

Fazcanj cizlieng hwnjfoenfoen,

Sevei ngoenzngoenz ndaej onjdingh.

Bi gvaqdaeuj neix mbouj yungzheih,

Aeu ndaej cingzcik bouxboux angq;

Guek raeuz saehnieb onj fazcanj,

Cienz baengh aendangj daeuj guh dongh.

Haj bi daeuj neix caen mbouj sung(seng),

Guh lumj duzlungz roengz dan yiemj;

Cienz baengh dangj raeuz daeuj ceijdiemj,

Baizcawz yungyiemj yat hwnjbae.

Haj bi ndwenngoenz mbouj bingzciengz,

Lajmbwn gwnzbiengz saehcingz laux(hung);

Miz Dangjcunghyangh daeuj lingjdauj,

Gingsouh gaujniemh ciuqyiengh hingz.

Seiqgyaiq ngoenzngoenz bienq mbouj dingz,

Binghraq yakdoeg youh cungdongj;

Ndawguek ginghci nod doxroengz,

Raeuz deng lai coengz(caengz) daeuj gaujniemh.

Dwk hingz fuzbinz gunggenqciengq,

Cienzmienh guh baenz haeuj siujgangh;

Saedyienh bak bi muzbyauh angq,

Youh yiengq muzbyauh bak bi moq.

Ginghci fazcanj hwnj mbaek sang,

Swnghcanj cungjciz demgya lai;

Gunghyez nungzyez yamqdin vaiq,

Gaiq raeuz naengzlig ndaej daezswng.

Duetgungz gunggeng cungj hingz doh,

Gohgi cauxmoq gig yienhda;

Ginghci gezgou ndaej youhva,

Ca ndei gihcuj sezsih raeuz.

Gaijgwz hailangh haeujlaeg lai,

Swnghdai vanzging gaij engq ndei;

Bouxminz swnghoz engq vuenheij,

Saeh angq saeh ndei gangj mbouj caez.

Gawjbanh Bwzgingh Dungh’auvei,

Dunghcanzauvei itheij banh;

Aulinzbizgwz doengz fazcanj,

Caez gangj cingzngeih engq doxgiet.

Haj Bi Doxdaeuj Guh Gij Hong

Haj bi daeuj neix hong mbouj noix,

Gangj daeuj baenz roix lai vuzsuq(soq);

Ciuq Dangjcunghyangh daeuj busuj,

Doengzcaez hwnqguh hengz mbouj dingz.

Cauxmoq hungzgvanh diuzgung ndi(ndei),

Baujciz ginghci yinhhengz doeng;

Yienznaeuz binghraq daeuj cungdongj,

Ciuqyiengh haenqndongj bongh mbouj dingzj.

Ciuqseiz dwk hingz gunghgenhcan,

Duetgungz ranzranz cungj miz faenh;

Gungjgu cwngzgoj guh ndaej haenq,

Cienzmienh guh baenz siujgangh caez.

Cungdenj lingjyiz cungj yawjnaek,

Gij mbaek gvanhgen haenq gaijgwz;

Sicangz hozliz lai baenz bwx(doi),

Hawj vunz gwx guh gwx miz rengz.

Haeujlaeg saedhengz canloz hoengh,

Cauxmoq haidoengh fazcanj bae;

Doidoengh canjyez gezgou ndei,

Youhva hwnjbae youh swng gaep.

Gya’gvangq ndawguek gij sihgiuz,

Swnghhoz duh raeuz engqgya van;

Doicaenh gihyiz caez fazcanj,

Ndawsingz lajmbanj yienghyiengh moq.

Guekgya haeuxgwn bauj ancienz,

Daihlig saedhengz canloz moq;

Lajmbanj hwngvuengh guhfofo,

Doq(Caux) guh nungzyez yendaiva.

Mbegvangq doiq rog guh hailangh,

Gij saehhangh neix gig giendingh;

Haeujlaeg doengz leih caeuq doengz hingz,

Gozci ginghmou hozcoz lengj.

Swnghdai vanzging baujhoh coek(lai),

Coicaenh saegloeg bae fazcanj;

Raemxloeg byaheu dwg ngaenz fanh,

Dihdan(Daemqdanq) fazcanj bouxboux maez(angq).

Haeujrengz baujcang caeuq gaijndei,

Beksingq sim hae(hai) vuenyungz lai;

Sevei saehnieb fazcanj vaiq,

Gwnzbiengz gaiqgaiq bauj goengbingz.

Cwngfuj eifap daeuj guh saeh,

Sevei ceihleix cauxmoq ndi(ndei);

Vwnzmingz hengzfap cungj genhciz,

Sevei dagiz ndaej onjdingh.

Minzcuz cunghgyau caeuq gyauzvu,

Gij hong hengzguh cauxmoq ndei;

Gungjgu fazcanj youh doxgyaez,

Minzcuz gvanheih yienghsiengq moq.

Dangj doiq bingdoih lingjdauj ndei,

Gozfangz ginhdui cingzcik daih;

Gij bengwz hung hix miz lai,

Gaiqgaiq cungj vih bauj guekgya.

Hong Gangj Au Daiz hix yienhda,

Eiciuq yenfaz bae guenjleix;

Faenmbek guekgya cix fanjdui,

Song hamq gvanhaeh caez doidoengh.

Maqmuengh Ngoenzcog Engqgya Ndei

Bineix cwngfuj dwg vuenh gaiq,

Maqmuengh daihlaeng engqgya mungj(ak);

Moqnaj lij aeu roengzrengz hung,

Yaek aeu yunghgoeng bae hengzguh.

Roengzrengz gyagvangq vunz sihgiuz,

Hawj beksingq raeuz engqgya ndei;

Hoizfuk mbegvangq gij siuhfei,

Baij youq veici(dieg) giz gonq haenx.

Canjnieb dijhi yaek gungjgu,

Gyavaiq hwnqguh yendaiva;

Gohgi cauxmoq roengzrengz ca,

Cwngzgoj cienjvaq cij guh baenz.

Doeksaed “song aen mbouj doenghngauz”,

Gozgi hengzgauj gaijgwz ndi(ndei);

Daezsang gozgi gingcwnghliz,

Onjdingh sicangz miz saenqsim.

Engq daih ligdoh bae supyinx,

Leihyungh vaiswh dawz haeujdaeuj;

Mbegvangq hawciengz gij cinjhaeuj,

Doiq cincuzgouj engq guh ndei.

Mizyauq fuengzre caeuq vaqgaij(gej),

Cungdaih ginghci ginhyungz yiemj;

Dijhi gaijgwz guh daengz diemj,

Ginhyungz genhguenj guh ndei caez.

Onjdingh haeuxgwn guh swnghcanj,

Doicaenh lajmbanj ndaej hwngvuengh;

Suijli gensez mbouj ndaej cuengq,

Hai gvangq diuz luengq(mieng) hawj minz fouq.

Doidoengh fazcanj fanghsi oek(ak),

Saekloeg cienjhingz haenqrengz ca;

Mbouj hawj vanzging deng uqlah,

Fazcanj ginghci guh sinzvanz.

Gihbwnj minzswngh miz baujcang,

Fazcanj sevei gij saehnieb;

Ranzyouq baujcang guh daengz dieg,

Bouxlaux bouxnyieg ciuqgoq caez.

Aen seizdaih moq gihyi moq,

Ngoenzcog swnghhoz engq vuenyungz;

Aen bak bi moq youh gawjdoengh,

Raeuz caez yunghgoeng buet coh naj.

Gwnz rin gyaq giuz onj bak bi,

Dangj vih bouxminz guh saeh ak;

“Song Hoih” cingsaenz ronghsagsag,

Cungqvunz fad max riengz dangj byaij.